Read Angami Naga Capiko 15 Bible Online

Capiko 15 - Angami Naga bible

Capiko 15

¹Süsie pechaba mo di thoulha kere teiki, Samson-e temvünuoyo puo pielie di puo kimia ze keseshütuoü vo. Puoe sie, “A a kimia kibou nu letuolie” sishü. Derei puo puoe puo bu lemvüta.

²Hapfü puou sie, “A we no puo ngumecü kethotaücü le tou bata zo, süla a puo pie n zeu tsüwate. Puo siezepfü puo ki ngu zivikuo mo me? Puo sounu puo siezepfü lielietacie” sita.

³Sitse Samson-e uko ki, “Tsieu va we a Filistinko gei kelhie mhatho chüshü rei kejo-u a tsügei mo ho” sita.

⁴Samson-e pra di meseru krie se telie, di kenienie di uko mei pele phrewa, puoe sidi mitukhro puopuo pie kenie mei donu phashüshü.

⁵Sidi mi pie mitukhroko theshü di meseruko khapie Filistinko lie nu chiebie pete, mu Oliv zieko rei thephrewa.

⁶Filistinkoe ketso di “Supuoe mhatho hakemhie chüshü ga?” isie ru, ukoe sie “Timna nyau Samson ücü silie, kekreilamonyü Timna-e Samson kimia pie Samson zeu tsükewa la” sita. Süla Filistinkoe khor di Timna mu puo nuopfü unie thekhriwa.

⁷Sitse Samson-e uko ki, “Nieko haikecü sie, a nieko gei a khepulie kemochie khawalie lho” sishü.

⁸Mu puo puorhie suo di uko perhie di themia kekra dukhriwa. Sidi puoe tsu Etam tsiepfü puo nu bata.

⁹Sitse Filistinkoe khor di Juda nu uko razhüchü chülie, sidi Lehi rünau re.

¹⁰Ru Judamiakoe uko ki, “Nieko kidi khor hieko reya ga?” si. Ukoe sie, “Hiekoe Samson tepie phalietuoü di khorlie, puo hieko gei chükeshü tuoi, puo gei chüshütuoü di,” si.

¹¹Sitse Juda nunu mia nyie se Etam tsiepfüu nu tsu di Samson ki, “Filistinko u mho kedichü bacü no si mo me? No hieko gei kedipuo chüshüta ga?” si. Ru puoe sie, “Ukoe a gei chükeshü mhiei uko gei chükeshü zo,” sita.

¹²Sitse ukoe puo ki, “Hiekoe n phalie di n khapie Filistinko tsüwatuoü di tsurwe” sita. Samson-e uko ki, “Nieko thuo zowe a biewalie lhoükecü rüseshü a kiecie” si.

¹³Ukoe sie, “U zo, hie n phapie uko dzienu keshü zotuo, hieko n dukhriwalie lho” sishü. Sidi ukoe kero kesa kenie pie puo phalie di tsiekrieu nunu puo zekhor.

¹⁴Puoe Lehi nu khorlie tse, Filistinkoe puo ze kesetuoü di shie vor. Sitse Jihova Ruopfüu puo gei kuo kemerie chü vorta, mu kero puo bou gei kebako gakhro ro tuketa mhieta, mu puo dzie kephako te sisita.

¹⁵Siro puoe gada mecoru kesa puo ngulie di süu chü pielie, di süu pie mia nyie puo dukhriwa.

¹⁶Sidi Samson-e keli di, “Gada mecoru puo pielie ru, mia nyie a thuo dukhrishüe, Gada mecoru puo pielie ru uko biepie pfhe kesekebashüe” sishü.

¹⁷Puoe pu tseiwa tse, puo dzie nunu gada mecoru kelhouwa, sidi thechü süu za pie Ramath-Lehi[15] chüta.

¹⁸Puoe terhüthortacü la, Jihova ki melo di, “No kuopezhakelie khapie n kituou tsüshüte, mu tsie a bu terhü di siatatuo me? Sidi u zhürekemoko dzienu letatuo me?” ishü.

¹⁹Sitse Jihovae Lehi nu keba thechü kerükuu shükhoshü, di sünunu dzü rüluo par, Samson-e süu krielie tse, puo kekuo la vorlie, di rhei lalie. Süla dzüluo süu üse En-hakor[16] chüta, süu thie ketso Lehi nu ba zo.

²⁰Mu Samson-e Filistinko teiki cie mepfü Israel capi chü.