Read Angami Naga Capiko 16 Bible Online

Capiko 16 - Angami Naga bible

Capiko 16

¹Siro khunhie Samson-e Gaza nu ke, ru puoe thethenumiapfü puo ngushü tse süpfü kinu le di bata,

²Sitse mia Gazamiako ki, “Samson hanu vor bate” sishü. Süla uko thechü houlie di teizeizha pete nadiu kharu kiki nu puo la bata. Ukoe teizeizhau pete kemekrie ba, ukoe lecü, “Úko khisoteiluo ketso puo pfhe batuo, sidi puo dukhriwa petuo zotuo” iba.

³Derei Samson-e khisoteiluo ketso zhü di süsie sielie di nadiu kharuu mu puo conie theze pielie di piechie sielie, siro puo seiphiu rei sapie puo bouka gei shülie, sidi pete piekho Hebron mhodzünu keba kijüthou mezhü gei shüwa.

⁴Hasie ki, puoe Sorek razha nu keba thenumiapfü puo, puo za Delila ücüpfü ngu puo neita.

⁵Sitse Filistinmia pehükoe süpfü ki vor di sie puo ki, “No puo selie di puo bu puo kekuo kezha, siro puo phalie di puo penyülieketuo do se n ki pushü di hieko bu silie ro, hieko mia puo raka krie kerepuokrükrü pie n tsütuo,” sishü

⁶Süla Delila-e Samson ki vor di puo ki, “N pezierei n kekuo kezha mu kimhie di n phalie ro kekreimia bu n penyülietie shikecü se a ki pushücie” sishü.

⁷Sitse Samson-e puo ki, “Ukoe theüro kesa pesowa kemo thenie se a phalie ro, siro, a rei kekreimia kemhie kuo motatuo,” sishü.

⁸Sitse Filistin kezhakoe theü ro kesa peso kemo thenie se vor Delila tsüshü, ru puoe süko pie Samson phalie.

⁹Siro puoe themia bu kinutsheku nu rüshü balie di puo ki, “Samson, Filistinko n biewatuoü vorzhie” sishü. Derei puoe mi bu kelo thekecü tuoi theü roko kegothe phrewa. Sidi uko bu puo gei kerükrü kekuo kebau ca silie mota.

¹⁰Sitse Delila Samson ki, “Harie, no kecürü do se a bie kezhasewate, n pezierei kedipuo se n phalie di n penyülietuo shiü a ki pushü zocie” silie,

¹¹Ru puoe sie, “Kero kesa se mo zoluokecü se a phalie ro, a rei kekreimia mhiei kuo motatuo” sishü.

¹²Süla Delila-e kero kesa se vorlie di süko pie puo phalie, puo ki, “Samson, Filistinko n biewatuoüzhie ho” sishü. (Themiakoe kinutsheku nu pfheba). Derei Samson-e puo bouka geinu keroko ciethepie kelo keciethe chüwa.

¹³Sitse Delila-e Samson ki, “No tsie ketso rei a seba zo, kikemhie di n kekuo phalietuo shi a ki pushücie” sishü. Ru puoe sie, “Noe a tsütha kechiekecü thenieko pie thegi sa dowa di ru kemeteipie bawa ro, kekreimia mhiei di a rei thachütatuo” sishü.

¹⁴Süla puo zekezhü ki Delila-e puo tsütha chiekecü thenieko kerei pie thegi gei phawa, sidi mha pie pha kemeteiwa. Sidi puo ki, “Samson, Filistinko n biewatuoüzhie ho” sishü. Derei puoe zekezhü nu cosier di thegi pete mu puo keruko sa shüpfüta.

¹⁵Süla Delila-e puo ki, “N nou pete a gei ba mo di kiüdi, ‘A n khrielie’ icü a ki pulie vituo mu, no va se a bie kezhasewate, mu n kekuo kirapuo ba shi a ki pushü mote” sita.

¹⁶Mu teisonhie Delila-e die pu puo keyhukezhiethor batacü, süu sipie puo kechakhriwa kemopfü chü zota.

¹⁷Süla puoe ketho-u se puo ki pu di sie, “Tsüpfü puorei pie a tsü gei shü mo zoluo; süu a zuo va nu tuoluokecü nu Ukepenuopfü la a khapie Nazirmia[17] chüwate. Süla a tsü thiewa ro a kekuo jütatuo mu a rei kekreimia mhiei thachütatuo,” sishü.

¹⁸Siro Delila-e puo puo nou ketho se pukeshü ngushü tse, puo Filistin pehüko kelieshü di uko ki, “Tsieuva we khorlieluo, puo puo nou ketho se a ki pushüte ho,” sishü. Sitse Filistin pehükoe uko dzienu raka theze se di puo ki khor.

¹⁹Ru Delila-e Samson bu puo do geinu zezhüta, sitse puoe mia puo kielie di süu bu puo tsütha kechiekecü thenieko thiewa.

²⁰Süsie Delila-e puo kenyhushü di sie, “Samson, Filistinko n biewatuoüzhie ho” sishü, ru puoe puo keze nu cosier di, lecü, “Kekrei ki tuoi ‘A a thuo a kezhaphrilietuo’ isie.” Mu puo Jihova puo khawaketa si mo.

²¹Sidi Filistinko bu puo telie di puo mhinie kerülawa, di puo ze Gaza nu tsurta; siro uko thegiro se puo phalie di puo bu kedieki nu thou gekecü chü.

²²Sirei puo tsütha thiekewako the lavüta.

²³Tsiu Filistin kedinuoko uko rhuou Dagon ki ruosuo kezha puo khashütuoü mu süu la uko kenei tei chütuoü kengulie, di ukoe sie, “U rhuou u ngumvüu Samson khapie u dzienu shüwate” sita.

²⁴Siro ukoe puo ngu tse sie uko rhuou tshe di, “U rhuou u ngumvüu pie u dzienu shüshüte u rüna kepekau, u themia kekra dukhrikewau” isiba.

²⁵Sidi ukoe uko nei za partse sie, shie di “Samson kieshülie, puo bu rüzhüpie uko kie tuomu,” isi. Sidi uko kedieki nunu Samson ze vorlie, mu puoe rüzhüpie uko kie, siro ukoe puo bu co kenie donu thalie.

²⁶Siro Samson-e puo dzie teshü ketuo khriesayo ki, “A bu kiu ketou conie bieshücie sitse a sünie vakhriepfülietuomu” isi.

²⁷Siro Filistin kedi pengouko tsiu thenumia rei thepfumia rei ki süu ketshu chüpfüba; mu kikhrugei ketso mia nyie se mese ba di Samson rüzhükeshü meho ba.

²⁸Sitse Samson-e Jihova ki rükhruo di, “He-i, Niepuu UKEPENUOPFÜ; a rükrashücie, a n ki chaya; tsieu va la rübei a chüpekuo lashücie, he-i, Kepenuopfü, sidi a bu va puo chü a mhinie la Filistinko gei a khepuliecie” sishü.

²⁹Sidi puo kiu toupfükeba co metsuo nie bu puo vitsa mu puo zatsa pie mehilie.

³⁰Sidi Samson-e sie, “A bu Filistinko ze siatacie,” ishü di puo kekuo pete khashü; sitse kiu metsu kediko mu sünu keba themia pete vakhriwa. Sidi puo kerheiki dukhrikelieko kirei puo se nhie dukhrikewako krakuota.

³¹Süsie puo siezedzürieko mu puo kinumiako pete tsu di puo mo-u sekhor Zora mu Eshtaol donu puo puo Manoa mekhru nunu khruwa. Puoe cie mepfü Israel capi chü.