Read Angami Naga Capiko 18 Bible Online

Capiko 18 - Angami Naga bible

Capiko 18

¹Süteiki Israel nu kedimia tuo mo; tsiu Dan seyiekoe uko thuo lhou baketuo la kijü puo pfhüba, Israel donu süketso rei kijü uko ya chüshü mo zokecü la.

²Süla Danmiakoe uko seyie pete donu Zora mu Eshtaol nunu kethepfu mia pengou kedalie di uko bu kijüu pfhü mu rieshünu di uko ketseshü. Dankoe uko ki, “Vo kijü rie menuoshülie” sishü. Sidi uko Efraim kijüthou rünau gei vorlie tse Mika kinu le balie.

³Ukoe sünu bacü ki Levimia khriesau diepu silieta, süla ukoe puo ki vo di, “Supuo n ze vorshü ga? No haki nu kedipuo chü ba ga? Kiüdi haki baga?” sishü.

⁴Sitse puoe uko ki, “Mika mha luuhau a la keseshü, mu a zhakhrü pie a bu puo zievo chü batelie,” sishü.

⁵Ukoe lasie puo ki, “Hieko rüve hau puotoulie tuo mo mo shiü Ukepenuopfü medo ketsoshücie,” sita.

⁶Sitse Zievo-ue uko ki, “Jihova mhi-e nieko rüve gei ba zo, nie nou mene di tuo volie” sishü.

⁷Sitse mia pengoukoe tuo lashü di Laish nu vorlie. Mu uko themia süko khrukhre phi di lhoukeba ngushü, Sidonmia kemhiei sei mu zei, mu kemichie keprei jü, siro kishükinyi u kelhuochü di lhoukeba ngushü. Sükoe Sidonmia kinu kepecie phita mu miapuorei ze keperokecü ba mo.

⁸Siro mia pengoukoe Zora mu Eshtaol nu la vorlie tse, uko themiako sie, “Nieko kedipuo si mu ngushü ga?” isi.

⁹Sitse ukoe sie, “Uko sielie di Laish bie khe, hieko vo kijüu nguwate mu vi se zo, haki nu menyho thata hie di le pevielie khe.

¹⁰Nie sünu le ro, themia jüjiecü kro puo ngutuo, mu kijüu rei zha phi zo, siro sünusü mha ketsopfhü kejü kijü vi rükrücü puo Ukepenuopfüe kha nie dzienu shüshüta zo” sishü.

¹¹Süla Danmia mia krie sorou u rünyie dojü se di Zora mu Eshtaol nunu tuoshü;

¹²sidi ukoe kho kezhü ki Juda nu Kiriat-jearim nunu razhüchü chü di balie. Süla thie ketso rei Kiriat-jearim niakratsa thechü hau üse Mahaneh-dan[20] razhüchü üdi kieya.

¹³Uko sünunu Efraim kijüthou rüna nu vorlie di Mika kinu vo balie.

¹⁴Sitse rünau (süu Laish) rücietuoü di mia pengou prakecükoe sie uko seyieko ki, “Niekoe ki hako puo nu efod puo, terafim, siro kepiekechü mu lhopiekechü terhuorhi bakecü si nhie? Mu kedipuo chütie shi leliecie,” sishü.

¹⁵Sitse uko rürei se Leviyiemia khriesa zievo-u kebachü Mika kinu volie, sidi puo dze ketso.

¹⁶Sükisü Danmia krie sorouko terhü la rünyie kesepfü di nadiu kharu kiki tha.

¹⁷Tsiu mhakerücie mia pengouko tuo mezhü kiu nu lelie di rakachü pie kenhekecü terhuorhi mu efod, mu terafim rei chüpielie.[21] Süki zievo-u rei kharu nu rünyie kese krie sorouko ze tha.

¹⁸Siro mia pengoukoe kiu nunu mhanya süko chülie tse, zievo-ue uko ki, “Nieko kedipuo chütieya ga?” idi ketsota.

¹⁹Siru uko sie puo ki, “Kemekrietalie, die puorei pu hie, sidi hieko ze volie hie zievo mu hie krü chütalie. Noe mia puo kikru la zievo kechüu vikuo mo, Israel seyie pfutsanuo puo la zievo chükecüu vikuotuo shi?” sita.

²⁰Zievo-ue hako sishü puo neita, sidi puoe kinu efod, terafim mu terhuorhiko pielie di themiako ze vota.

²¹Sidi ukoe nhicu kecünuoko, kiriko mu mhanyako pie uko mhodzünu shülie di tuo la vota.

²²Mu ukoe Mika kiu nunu tuo petse vota tse Mika-e puo zanuoko kielie di Danmiako whuo vor di uko tsolie.

²³Sidi ukoe Danmiako kie shiekhouishü ru, ukoe rürei la vor puo ki, “Kedipuo la n noumeca di themia hade ze vorzhü ga?” ita.

²⁴Ru puoe sie, “Nieko a chüpiekeba a rhuoko chülie, mu a zievo-u rei zeta, di kiüdi, ‘Kedipuo n noumecaya mu?’ ilietuo mu, a cüsie kedipuo ba sa ta?” sita.

²⁵Sitse Danmiakoe sie puo ki, “No melieshü di mia huo nouchükemeyielie ro, no rei mu n kinuko pete siatuo,” sita.

²⁶Süsie Danmiakoe tuo zo vota, mu Mika-e themia hako puo la kuothorcü ngushü tse, rüreila puo kinu vota.

²⁷Sidi Danmiakoe Mika chüpiekeba vienyako mu zievo-u zelie di mekrie mezakemo nadiu Laish nu themiako si mu zeicüko ki vorlie di zhiecha pie uko bievü, siro mipie uko nadiu rei thewa.

²⁸Süu Sidon ze kepecie phi, mu miapuorei ki pukecü jü, süla miapuorei uko whe di uko shüphrakelie tuo mo, süsü Bet-rehob razhau nu ba. Ukoe nadiu chü lalie, di sünu bata.

²⁹Ukoe süsie nadiu za thokedi pie uko puotsau Israel nuou Dan za chülie, hadzü we nadiu za Laish.

³⁰Danmiakoe terhuorhiko uko thuo uko la khapie balie. Mu Mosa nuo Gershon nuou Jonathan mu puo nuo thepfuko we Dan seyieko nu zievo chü zo vor di kijüu mia bu liekelie tso.

³¹Sidi ukoe Kepenuopfü kiu Shilo nu kebachie Mika-e chükeshü terhuorhiko pie sünu ba tso.