Read Angami Naga Capiko 2 Bible Online

Capiko 2 - Angami Naga bible

Capiko 2

¹Siro Jihova dielieue Gilgal nunu Bokim nu khor di Israelko ki, “A Ijipt nunu nieko zepar di a khapie nie puonuoko tsütuoü di rüsekeshü kijüu nu nieko ze vorshü. Sidi a nieko ki, ‘A nieko ze dietseidiekho keshüu mhakipuorei varhuowalie lho.

²Mu niekoe rüna hau nu kelhouko ze dietseidiekho puorei chülie lho; niekoe uko ruosuobako bietshebietshawatuo,’ sishü. Derei nieko kiüdi a pfhe ze mo haita ga? Nieko kedipuo chüwata ga?

³Süla a tsie nieko ki puya, a nieko mhodzünu uko whuoshülie lho uko bu nieko ngumvümia chü, mu uko rhuoko bu nie la kebie puo chütuotuo” sishü.

⁴Jihovae dielieue mha süko Israelko ki pushü tse, themiako kra shiekhouita.

⁵Sidi ukoe thechü süu za pie Bokim[2] chüta, mu uko süu nunu Jihova ki ruosuo chüshü.

⁶Süsie Joshua Israelko khashüwa tse, ukoe u thetse nu kayie kijü pevielietuoü vota.

⁷Joshua kerhei chie mu puo ze kelhou phichüko, u thuo Jihovae Israel la mhachükeshü pete si mu ngukecüko kerhei ki we themiako Jihova lie chü vor.

⁸Siro Nun nuou Jihova kituou Joshua cie krie puo di ker lhoulie di siata.

⁹Sidi ukoe Gash kijüthou pesotsa, Efraim kijüthou rüna puo kayie vie Timnath-here nunu puo khruwa.

¹⁰Mu thephou süu sia theketa sie, Jihova si kemo morei puoe Israel la mhachükeshü si kemo phou kesa puo sierta.

¹¹Siro Israelkoe Jihova mhingu ki mhakesuo chüta, sidi uko Baal rhuoko liechü tuota;

¹²mu Ijipt nunu uko zeparkeshü Jihova uko puonuoko Kepenuopfüu khawata; sidi ukoe uko houpfükeba themiako rhuo kekreiko medzi mu nerhutsu süko rüsuota, sidi ukoe Jihova nou vakemeyiewata.

¹³Ukoe Jihova khawa di Baal mu Ashtarot lie chüketa la.

¹⁴Jihova nouyieu Israel gei tusieketa geinu puoe uko khapie mhavakecüko dzienu shüwa, sidi süko bu uko vie vata, puoe uko zepie ngumvümia uko houpfü kebako dzienu shüwa, sidi ukoe uko ngumvümia mhodzü thalie kenjüta.

¹⁵Jihovae phrakeshü tuoi, Israelkoe kehourapuo terhü chüpra zorei, Jihova dzieu uko petsou mu uko penyüwawata; sidi ukoe theziekejü chüta.

¹⁶Sitse Jihovae uko donu capimia pesieshü, sidi sükoe mhavakecüko dzie nunu uko kelashü.

¹⁷Sizoürei Israel-e uko capimiako die rei rünyü mo; sidi terhuo kekrei ze kepieü di nerhu tsu uko rüsuotuota. Ukoe uko puonuoko ze kevor chau nunu rürei mhata, Jihova diekhakeshüko dieze chü mota, ukoe uko zho medzi mota.

¹⁸Jihovae capimia pesieshü uko tsü ro, puoe capiu zetuo, mu capiu rheiketuo chie uko ngumvümia dzie nunu uko kelalielie vor; mia uko pese mu kemvü chükecü la ukoe melokeba Jihovae sishü di puo nou mezhiekelie la.

¹⁹Derei capiu siata tse, ukoe rürei lata di terhuo kekrei medzi mu süko lie chü, mu nerhu tsu uko rüsuo di, uko puonuoko ki rei suokuota. Ukoe uko nou kekhrü mu mha kesuo kechüko nunu rüdi mvüta.

²⁰Süla Jihovae puo nou kerüpeu tu sier Israel petsouta di, “Seyie haue a uko puonuoko ki dietseidiekho khakeshüu varhuokewa mu a pfhe rünyü moketa la,

²¹a rei tsieyawinu Joshua siaketa ki seyie kro puo whuowa mokebako uko mhodzünu nu whuolie lhote” sita.

²²A süko geinu Israel dojü di, uko puonuoko Jihova chau ze kevor tuoi süu zelietuo mo mo shi ikecü silieketuo la.

²³Sidi Jihovae seyie süko whuo mhawa mo di uko khapie bata, mu puoe uko khapie Joshua dzienu rei shü di süko whuokewa chü mo.