Read Angami Naga Capiko 20 Bible Online

Capiko 20 - Angami Naga bible

Capiko 20

¹Siro Dan nunu Beersheba ketso mu Gilid kijü nu rei sa di Israel themia pete kropuo chü parlie, sidi Mizpa nunu Niepuu mhodzünu kengulie.

²Sidi Israel seyie pete nu krütako mu themia pete vor Kepenuopfü themiako kehouu nu thalie, süko pete zhiecha kepiemia nyie krie dia,

³(Benjaminko rei Israelko Mizpa nu khoketa sibata.) Tsiu Israelkoe sie, “Mha kesuo hau kedipuo mhie di parta ga? Hieki pushücie” ita.

⁴Sitse siaketapfü nupfuu Leviue sie “A Benjamin kijü Gibia nu sozhü chütatuoü di a pelipfü ze vorlie,

⁵ru Gibia themiako a petsouta di theva vo a keba kiu houlie mu a dukhrikewa leta. Mu ukoe a pelipfü ze vo shükhriwa.

⁶Sidi ae a pelipfü mo-u pielie di khrie petsepie Israel seyie keba kijü pete nu shü, ukoe Israelmia donu mha kesuo mu kerütsekecü mhatho puo chüketa la.

⁷Süla tsie, nie Israelko pete rei hau la kedipuo chütie shiü nie kele mu mhasi pushüi” sishü.

⁸Sitse themia hako sielie di diepuo chü di sie, “Uko mia puo bu rei puo pfheki nu morei puo kinu rei la volie lho.

⁹Sidi uko Gibia gei hakemhiei chütuo, uko dape di themia huo bu kho Gibia bietuo.

¹⁰Mu Israel seyie pete nu ker za puo bu rüpfünuoko la kecüca kesetuo. Sidi rüpfhünuoko Benjamin rüna Gibia nu vorlie tse uko bu Gibia themiako Israel nu kerüzhü mhatho kechü zhakhra chüshü uko gei shütuo.”

¹¹Sidi Israelmiako pete nadiu perhieketuo la kengulie, di keze puo chülie.

¹²Siro Israel seyieko themia ketse pie Benjamin seyieko pete kishü di sie, “Nieko donu kerüzhü mhatho kikecü puo chüta ga?

¹³Tsie Gibia nu themia kerüzhü kechüko khashü hie dzienu shüwalie, sidi hie bu uko dukhriwa di Israel nu kerüzhü pejüwalie” sishü. Derei Benjamin themiakoe uko siezedzürie Israelko pfhe rünyü mota.

¹⁴Sidi ukoe Israel ze kegeituoü di uko nadiko nunu vor Gibia nu kengulie.

¹⁵Mu khunhie nu Benjaminkoe zhiecha kepie mia nyie mepfüesorou kengulieta, sizomonyü Gibia nu kelhou themia kedakelie mia krie thenie salie.

¹⁶Themiako pete donu kedakekelie krie thenie sükosü pevi di tsiediro geinu ketsie kedipie thaprü puorei vajowaya kemomia phre.

¹⁷Mu Benjaminko sakemo Israelko rei zhiecha kepie mia nyie krie dia, hako pete terhü themia phre.

¹⁸Israelkoe Bethel nu kholie di Ukepenuopfü medo rüsa di sie, “Benjamin nuoko ze kegeiketuo la hieko thinuo kiu bu kho rietuo ga?” isi. Sitse Jihovae, “Juda yieko bu kho rietuo” sishü.

¹⁹Süla süsie duü Israelkoe khise sielie di Gibia kepenuo kinu razhüchü chü balie.

²⁰Sidi Israelkoe Gibia nu Benjaminko ze terhü chütuoü dojülie.

²¹Sitse Benjaminkoe Gibia nunu par di sünhie rüyachü nunu Israel themia nyie mepfüekenie geiwa.

²²(23)[25] Sitse Israelmiakoe kho di Jihova mhodzünu thekrüchü zo ba theva tso di Jihova ki, “Hieko bu hieko siedzürie Benjaminko ze terhüchü la ketuo la khotuo mo lho ga?” sishü. Ru Jihovae uko ki “Kho uko perhie zotuo” sita.

²³(22) Süla Israelkoe thepfu lalie di kerie nhie tuoi terhü chüketuo la thechü nu vo dojü lalie.

²⁴Sidi zha kenie nhie Israelkoe Benjaminko ze terhüchütuoü di kho.

²⁵Derei hanhie rei Benjaminkoe Gibia nunu uko petsou par di Israelko mia nyie kerethetha gei lawa, süko pete zhiecha kepie themia phre.

²⁶Sitse Israelmiako pete Bethel nu kholie di Jihova mhodzünu kra mu mevo ba thevatie tso; siro kethe rüsuo mu vitho rüsuo khapie Jihova tsü.

²⁷Sidi Israelko Jihova medo rüsa lashü. (süki Ukepenuopfü dietseidiekho bouu sünu ba,

²⁸mu Aron nuou Eliazar nuo Finehas süki tha di lietho chüya). Uko sie, “Hieko bu kho hie siedzürie Benjaminko ze keperhie latuo mo lho ga?” idi ketsoshü. Sitse Jihovae sie, “Nieko kholie, sodu we a uko khapie nieko dzienu shüwatuocü la” ishü

²⁹Süla Israelkoe rüshü vo di Gibia houpfü balie.

³⁰Ukoe sidi zha se nhie Benjaminko bietuoü kho, sidi hadzü kemhie Gibia petsou di dojü balie.

³¹Sitse Benjaminkoe uko petsou par, sidi nadiu ze kepecie vota. Uko kekrei ki tuoi chaü nu Israelko whuo, vü mu dukhri ivota, sidi Bethel kekho chau nu mu Gibia kekho chau nu icü Israelko mia ser dukhriwata;

³²Sidi Benjaminkoe “Thie rei kerieu va tuoi uko penyüwatie” itha tse, Israelkoe sie, “Uko tashü di uko meshü ze chadiu nu pralie khe” itha.

³³Sidi Israelko pete u chü nunu sielie di Baal-tamar nu dojüpfü balie. Siro Gibia niakratsa nu rüshükeba Israelko rei ta parlie.

³⁴Mu sidi Israelko rei kedakelie mia nyie kerko sie Gibia petsoulie. Terhü re seta, derei Benjaminkoe kepeka uko penuo baketa lelie mota.

³⁵Jihovae Israel mhodzünu Benjaminko penyüshü, mu sünhie Israelko Benjaminko mia nyie mepfüepengou di krie puo dukhriwa mu hako pete zhiecha kepiemia phre.

³⁶Sügeinu Benjaminkoe mialhoketa ngulie[26]. Israelko Gibia bieketuo la uko themia keviepie kebako pele di Benjaminko cha perieshü,

³⁷Mu themia rüshükebako vapuochü par Gibia relie, sidi zhiecha pie nadiu nu keba pete biewa.

³⁸Israelko mu rüshükebakoe kedova kebau sü, nadiu nunu mikhu kezha puo bu siertuo,

³⁹sitse Israel pete rürei la vorlie di terhüchütuo, isipie ba. Siro Benjaminkoe Israelmiako whuovü mu dukhrivü di mia ser geiwa, sidi ukoe sie, “Rütho kerieu mhiei tsieu va rei penyüliete,” isie.

⁴⁰Derei nadiu nunu mikhu sieta tse, Benjaminkoe rürei la vor meho ru, nadiu pete mikhu chü teigei khoketa ngu.

⁴¹Siro Israelko rürei la vor uko petsouta tse Benjaminko kedethewata; kekreilamonyü ukoe kepekau penuo batakecü la.

⁴²Süla ukoe Israelko mhodzünu ta se nhatsa vavü, derei uko terhü therhielie kenjüta. Mu Israelko rünako nu parlie di uko bievü.

⁴³Ukoe Benjaminko houlie, di uko whuo zo vo Gibia niathutsa tso, mu cha nu uko dukhri vo tso.

⁴⁴Sidi Benjamin themia nyie kerethetha geiwa, mu hako pete rei terhü miavimia phre.

⁴⁵Siro Benjaminkoe rürei se ta nhatsa nu lelie di Rimmon tsiekrieutsa vo, mu cha nu Israelko bu mia nyie pengou biewa. Siro Israelkoe kekreiko whuo zo Gidomtsa vo di mia nyie kenie dukhriwa.

⁴⁶Sidi sünhie Benjaminko biekewa pete kesa zhiecha kepie mia nyie mepfüepengou, hako pete rei terhü miavimia phre.

⁴⁷Derei mia krie sorou we rüreilie di ta se nhatsa nu Rimmon tsiekrieu nu vota, di khrü dia sünu bata.

⁴⁸Israelmiako pesie vo Benjamin petsou vü, di zhiecha pie uko pete siro khunuo rei mu kekreiko rei ngukelie pete biewa. Sizomonyü uko kevor rünako pete mi pie thewa.