Read Angami Naga Capiko 21 Bible Online

Capiko 21 - Angami Naga bible

Capiko 21

¹Israelkoe Mizpa nu vor kengulie di Jihova ki, “Úko nuonuo thenuko puorei pie Benjaminko ki penyilie lho zo” idi rüseshü.

²Mu themiakoe Bethel nu vorlie di sünhie thevatie ketso Ukepenuopfü mhodzünu ba di kra shiekhoui bata.

³Ukoe sie, “O, Jihova Israel Kepenuopfü kiüdi thie Israel seyie nu seyie puo pejüwaketuo hau vorta mu?” ita.

⁴Süsie nhie themiakoe rüna sielie di rüsuoba puo chülie di kethe ruosuo mu vitho ruosuo khashü.

⁵Siro themiakoe sie, “Israel seyie nu supuo Jihova mhodzünu vor kengu mota ga?” ita. Kekreilamonyü ukoe kehoupuorei Mizpa nu Jihova mhodzünu vorkemo-u bu “Sia zotuo” idi rüsewaketa la.

⁶Siro Israelkoe uko siezedzürie Benjaminko la unousuolie di sie, “Thie Israel nu seyie puo dathewate.

⁷Tsie rhei baluocüko nupfünuo la kedipuo chü ro vita? Kekreilamonyü we uko nuonuo pie uko ki penyilie lhoükecü Jihova mhodzünu rüsewate eru,” ita.

⁸Siro ukoe sie, “Thie Israel nu seyie kiu Mizpa nu Jihova mhodzünu vor mota ga?” idi pfhüsie. Sitse Jabesh-gilid themiako miapuorei kehou nu vor mocü ngulieta.

⁹Ukoe themiako pfhükesie nu Jabesh-gilid themia puorei tuokemo ngulieketa la.

¹⁰Süla kehoue themia kethepfutho nyie kerekenie ketsepie Jabesh-gilid nu shü di uko ki die hakemhie khashü, “Vo di zhiecha pie Jabesh Gilid nu kebako thenumia rei mu nhicumia rei bie phrewalie.

¹¹Niekoe hakemhie chütuo idi uko ki: Vo di thepfumia mu thenumia thepfu zezhüwaketa pete dukhriwalie.”

¹²Mu ukoe Jabesh-gilid nu kelhouko donu rüünuomia phouse zocü mia krie dia ngulie. Sidi ukoe süko ze Kanan kijü Shilo razhüchü nu vorta.

¹³Süsie kehouue pete vitho die ketsepie Rimmon tsiekrie nu keba Benjaminko ki shüshü.

¹⁴Sitse Benjaminkoe la vorlie mu Jabesh-gilid thenuko perhei sekebako pie uko tsüshü, derei süko uko la tso mota.

¹⁵Siro themiakoe Benjaminko la unoumezhielie, kekreilamonyü, Jihova-e Israel seyieu shüphrowaketa la.

¹⁶Sitse kehou nu phichükoe sie, “Benjamin nu thenuko dukhri phrewate-e ru uko kimhie di thepfu rhei baluocüko nupfünuo la kedipuo chü ro vita?” ilie.

¹⁷Sidi ukoe sie, “Rhei baluocüko la kayie pejülie kenjü, süu Israel nu seyie puo pejü tseiwa molieketuo la.

¹⁸Derei uko we u nuonuo pie uko ki penyilie kenjü, kekreilamonyü Israelkoe Benjaminmia nupfünuo khapie ketsüu bu rüsepfücie,” idi rüsewaketa la.

¹⁹Siro uko lasie, “Harie, Bethel mhotsa mu Bethel nunu Shekem nu kekho chadiu niathutsa mu Lebanon pekhrotsa keba Shilo rüna nu teicie kepra Jihova la thenyi puo babaya” isi.

²⁰Süla ukoe Benjaminko tarho di uko ki, “Nieko vo di khubelie nu la di pfhe balie,

²¹sidi Shilo nu rüünuoko nashütuoü par ro, khubelie nunu pra di Shilo rüümia nieko tse telie di nie nupfünuo chüketuo la ze Benjamin kijü nu votaliecie.

²²Siro uko puonuoko mu uko prünuoko hieko gei panya vor ro, hieko uko ki, ‘Hieko la uko ngumezhiewaliecie, kekreilamonyü hiekoe uko nupfünuo la terhü nu uko tse telie mote mu nieko rei nie thuo pie uko tsükeshü puo mo, moliro nieko rei rüseu nu jotatuo muü’ siwatuo” sita.

²³Süla Benjaminkoe sükemhie chülie; di nashüko donunu uko nupfünuo chüketuo la uko tse telie di ze vota, sidi ukoe uko kayie kijü nu la vorlie mu uko nadiko chü lalie di sünu balie.

²⁴Siro Israelkoe thechü süu nunu tuo se u thuo u seyie u thinuo mu u kayie kijü nu la vo phreta.

²⁵Süki Israel nu kedi tuo mo; mu kehoupuo rei puo thuo puo mhodzü ki mezhüükecüu chütuo zo.