Read Angami Naga Capiko 3 Bible Online

Capiko 3 - Angami Naga bible

Capiko 3

¹Siro Israelmia Kanan kijü nu terhü chü mo zocüko dojüshüketuo la Jihovae seyie kro puo khapie ba,

²(mu süusü Israelmia thiedzü terhü si mo zokecü phouko bu terhü do silieketuo la).

³Süko Filistinmia kedi pengouko, Kananko pete, mu Sidonko, mu Lebanon kijüthouko gei Hivko pete, Paal-harmon kijüthou nunu vo Hamath ketso.

⁴Süko geinu Israel dojü di uko Jihovae Mosa geinu uko puonuoko ki diekhakeshüko zelietuo mo mo shikecü sishüketuo la.

⁵Mu Israelkoe Kananko, Hitko, Amorko, Perizko, Hivko mu Jebusko donu lhou balie;

⁶mu ukoe süko nuonuo thenuko lielie, mu uko nuonuo thenumia pie kekreiko nuonuo thepfuko ki penyi, di terhuo kekreiko lie chütuota.

⁷Israelkoe Jihova mhingu ki mha kesuo chüta, sidi Jihova uko Kepenuopfü rükra mota, mu ukoe Baal mu Ashera rhuoko liechü tuota.

⁸Süla Jihova nouyieu Israel gei tusieta, sidi puoe uko zepie Aram-naharaim kediu Kushan-rishathaim dzienu shüwa; sidi Israelkoe cie thetha Kushan-rishathaim kituo chü.

⁹Derei Israelkoe Jihova ki uko mezhie rükhruoshü ru, puoe uko shüphrakelie puo piesieshü, süu Kaleb siezeu Kenaz nuo Othniel, puo bu sier di uko shüphralie.

¹⁰Jihova ruopfüu puo gei vorlie; sidi puo Israelko capiu chü di terhü nu pra. Siro Jihovae Aram kediu Khushan-rishathaim khapie Othniel dzienu shü, sidi puo Aram kediu mho kuolie.

¹¹Sidi cie hiedia we kijüu nu noune bu balie. Süsie Kenaz nuou Othniel siata.

¹²Süsie rei Israelkoe Jihova mhingu ki mha kesuo chü lata, mu ukoe Jihova neimo chüketa la Jihovae Moab kediu Eglon chü pekuopie Israel petsoushü.

¹³Sitse Eglon-e Amon mu Amelek themia kiepie puo salie di zekho Israel whuo, sidi ukoe Kukuobo nadiu lielie.

¹⁴Sidi Israelkoe cie kerethetha Moab kediu Eglon kituo chü.

¹⁵Süsie Israelkoe Jihova ki rükhruo lashü ru, Jihovae uko shüphralieketuo puo piesie lashü, süu Benjaminnuomia puo, Gera nuo Ehud, puo dzie pevikecü puo, Israelkoe puo bu Moab kediu Eglon ki khezhanuo se vo.

¹⁶Tsiu Ehud-e zhietenuo puoü lutsahatsa chükecü u thu chiecü puo chüpielie, di süu khapie puodo puo zatsa puo pfhe khroshüpfülie.

¹⁷Sidi puoe khezhanuo se Moab kediu Eglon tsüshü. Eglon-e themia luo sekecü puo.

¹⁸Siro Ehud-e khezhanuo khashüwa tse, puoe khezhanuo pie kevorko ketsepie uko chanu shüwa.

¹⁹Derei puo we Gilgal kepenuo terhuorhi tsie kinu rürei la vo di puo ki, “O kediu, a n ki pekhre die puketuo puo ba,” sishü. Sitse kediu sie, “Hienie bu hienie rübeitalie” si, ru puo khieki ketha pete tuota.

²⁰Sitse puoe kibou peso kemeku bouu nu puo rübei ba ru, Ehud-e puo ki vor di sie, “A Kepenuopfü kinu n la dielie ngukelie puo tuolie,” ishü. Mu kediue puo ba nunu sielie tse,

²¹Ehud-e puo dzie puo vitsa pie puodo puo zatsa nu puo zhietenuo zou pie kediu vadi rhieshü;

²²sidi zhietenuo peteu puoü mu puoto rei lephreta, di puo sieku parta. Siro Ehud-e zhietenuo-u shüzou la mo, sidi puoshuo thuo zhietenuo whelieta.

²³Sitse Ehud-e kifükhro tuo parta, sidi kibou peso-u kikha pete cabi pie puo sa khawa.

²⁴Ehud-e tuo prata tse, kituoko vor. Sidi ukoe kibou pesogei kikha khapie baketa ngulie tse ukoe lecü, “Kibou kemeku-u nunu puo kelei ba mecie” itha.

²⁵Ukoe pfhepfhe tha uko noumecata. Puoe kibou kikhako khrüshü mota tse, ukoe cabi se vor kikhako khrüshü. Ru sünu uko kediu tetsu kiluo nu siazhü ngulie.

²⁶Ukoe menyho baluocü nu Ehud-e tase terhuorhi tsieko cie zo Seira nu vota.

²⁷Puo Efraim kijüthou rüna nu vorlietse, terhü chüketuo la ketsü puo khou pie Israel kieshü, sidi puoe uko krüta chü di kijüthouko geinu uko ze tsur.

²⁸Puo uko ki, “A siemedzilie; Jihovae nie ngumvümia Moabko pie nie dzie nu shüwate,” isi. Süla ukoe puo siemedzi tsu, di ukoe Moabmiako Jordan nu cieprayakezha thechüko lie phrelie, uko mia puo bu rei pralie mo.

²⁹Süu va ukoe Moabmia mia nyie ker geiwa, süko pete rei themia kekuo kethepfumia phre, derei mia puo rei talie mo.

³⁰Sidi sünhie Moab penyüpie Israel khroshülie. Sidi cie hiethetha we kijü nu noune bu balie.

³¹Ehud sie Anath nuou Shamgar sierlie, di puoe thuwhuosei puo pie Filistinmia krie sorou dukhriwa. Puo puo rei Israelmia shüphrashü.