Read Angami Naga Capiko 4 Bible Online

Capiko 4 - Angami Naga bible

Capiko 4

¹Ehud se sie, Israelkoe Jihova mhinguki mha kesuo chü lata.

²Süla Jihovae uko zepie Hazor nu di keba Kanan kediu Jabin dzie nu shüwa. Puo rüpfhünuo mhokezhau Sisera, süue Haroshet-ha-goim nu ba.

³Jabin-e thegi gari krie thepfü ba mu puo zho suo se di cie mepfü Israelko pese vor, süla Israelkoe Jihova ki kekhruo cha mu meloshü.

⁴Siro sükisü Debora, Lapidot kimiapfü siedzekesi chü di Israel capi chü ba.

⁵Puoe Efraim kijüthou rüna nu Rama mu Bethel unie donu kukuobo puo khro baya, sidi Israelko bu puo capi pfhü puo ki khorya.

⁶Puoe Naftali nu keba Kadesh rüna nu Abinoam nuou Barak kelieshü di puo ki, “Jihova, Israel Kepenuopfü n ki puya, ‘Tuo volie di Naftali mu Zebulun unie themia nyie ker ze n salie di Tabor kijüthou gei volie.

⁷Sitse ae Jabin rüpfhünuo mho kezhau Sisera meshü ze parshütuo, sidi puo bu puo gariko mu rüpfhünuo krodi zepar Kishon Rüu nu shü di khapie n dzienu shütuo’ ” sishü.

⁸Barak-e puo ki, “No a ze votuo üro a votuo, derei no a ze vo lho üro a volie lho” sita.

⁹Sitse hapfü sie, “A n ze votuo, derei noe hakemhie di votuoüketa la, kuokelie theza keviu n vie chülie lhote, Jihovae Sisera pie thenumiapfü puo dzienu shüwatatuokecü la,” sishü. Sidi Debora-e sie di Barak ze Kadesh nu kho.

¹⁰Siro Barak-e Zebulun mu Naftali seyieko kiepie Kadesh nu shülie mu terhümiavimia mia nyie ker pie puo salie di kho, mu Debora rei puo ze kho.

¹¹Tsiu Kenmia[3] Heber-e vo Kadesh khieki Elon-zananim nu keba phriebo-u khieki nu puo razhüchü chülie. Puoe Mosa meiu Hobab yie Kenmia kekreiko khawa di tuo kreita.

¹²Abinoam nuou Barak-e Tabor kijüthou gei khota ükecü Sisera-e silie tse,

¹³Siserae puo thegi gari kriethepfüko mu puo themiako pete kieshü, di Heroshet-ha-goim nunu Kishon Rüu nu vo.

¹⁴Sitse Debora-e Barak ki, “Sielie, Jihovae n ze tuotuo, mu thie Jihovae Sisera penyüpie n dzienu shüwatuo,” sishü. Süla Barak-e Tabor kijüthou geinu themia nyie ker ze di puo siemedzi tsu.

¹⁵Mu Barak-e puo rüpfhünuo ze uko bievü tse, Jihovae Sisera mu puo gariko mu themiako pete chü pie kebvükebie phrewa; siro Sisera puo gari geinu kerlie di phithuo tata,

¹⁶derei Baraka-e gariko mu rüpfhünuoko whuo zo tsu Haroshet-ha-goim tso. Sidi Sisera rüpfhünuo krodi pete geiwa, miapuorei peshashü mo.

¹⁷Siro Sisera-e pephi tase Kenmia Heber kimia Jael pfheki nu lelie, kekreilamonyü Hazor Jabin kediu mu Kenmia Heber kinumiako donu kezekevi bakecü la.

¹⁸Jael-e Sisera ze kesetuoü par di, puo ki, “Lerliecie, a niepuu, michie hiecie,” ishü. Süla puoe tuo lelie, sitse Jael-e pfhe pie puo whewa.

¹⁹Sitse puo hapfü ki, “Dzü pie a bu kriecie, a terhüthorte” isi. Ru puo chüzhü nunu mithunudzü rupie puo bu krielie di puo kevie lawa.

²⁰Siro puoe hapfü ki, “No pfheki kikha ki thalie, di themia kehoupuo vor n ketso di, ‘Mia huo hanu ba me?’ iro, no ‘Molie,’ iwacie,” sishü.

²¹Sisera-e puo kenyiepfü ze pesou phi zhüta tse Jael-e pesikhuoi di puo pfheki kezhie seithie mu seivü pielie di pie puo nyietei nu zhietsu kijü tsowa, sitse puo siata.

²²Tsiu Barak-e Sisera whuo vor tse, Jael-e par puo ze kese di puo ki, “Haki lerlie, no puo pfhü ketuou pie n pekieshütuo” sishü. Süla puoe le ru, Sisera sü kijü nu siazhü di ngulie, mu pfheki kezhie seithieu rei puo nyietei nu zhiepfüzhü.

²³Sünhie Ukepenuopfü Israelko bu Kananmia kediu Jabin mho kuokelie khashü.

²⁴Ukoe Kanan kediu Jabin peka tseiwa kemochie puo pesüpemvü di kuo miemieta.