Read Angami Naga Capiko 5 Bible Online

Capiko 5 - Angami Naga bible

Capiko 5

¹Sünhie Debora mu Barak unie-e tsali hau kelishü:

²Jihova tsheliecie! Israelko thethochü di kegeikeshüko la, u thuo u neisiei di ukhakeshüko la![4]

³“Rünyüliecie, he-i kediko; he-i nie nyie kedeishücie, he-i kedinuoko, a we Jihova ki kelishütuo, A tsali khoupie Jihova Israel Kepenuopfü ki shütuo.

⁴“O Jihova, no Seir nunu tuo prakeshü nhie; No Edom kijü nunu tuokeshü nhie, kijü shükenieshü, mu teiko rushüwe, kimhouko dzü perushü ketho.

⁵Jihova mhodzünu kijüthouko rünieta, Sinai Jihovau, Jihova, Israel Kepenuopfü mhodzünu.

⁶“Anath nuou Shamgar kelhou teiki, Jael kelhou teiki, chadiko nu rüve kro tuo mote, rüvemiako chatseko nu tuota.

⁷Israel nu liekecieko kro miemiete, uko mhavakelieko nunu luolie, Debora, no siercü la, Israel krüpfü mhie di sier.

⁸Terhuo kekrei kedata tse, nadiu kharuko nu terhü tuota, Israelmia nyie hiedia donu pezhü rüngou kese ngu me?

⁹Israel terhü krütako kitsa, a meloue tuote, u mianyü chü u phou khakeshü la, Jihova tsheliecie!

¹⁰“Pushülie: nie Gada kekra gei kebako, nie phikhra kevi gei kebako, nie cha ze ketuoko.

¹¹Dzü ükecü thechüko nu, tsalikechü pfhe, Jihova kuokelie dze pu shükecü, Israel nu puo liecieko kuokelie. “Sidi Jihova themiako nadi kharuko nu zotsu.

¹²“Colie, colie, Debora! Colie, colie, tsali puo kelishülie! Sierlie, Barak, no tezeketuo diemiako zetacie, he-i, Abinoam nuou.

¹³Sitse pehümia baluocüko tuo tsur; Kekuoko perhietuoü Jihova themiakoe tsur.

¹⁴Efraim nunu ukoe razhau nu[5] tsur,[6] n siemedzi di, Benjamin, n yieko sa di; Makir nunu terhü krütako tsur, mu Zebulun nunu kezhamia the kepieko tsur.

¹⁵Isakar nu kezhako, Debora ze vor, mu, Isakar-e Barak gei diethoshü di; puo sienu unie kedzükrei razha nu tsur. Reuben yiemia donuwe, u melou nu u ketso phita.

¹⁶Kiüdi nieko mia sienu tekuo kroko ze bata ga? tekuo kekie pfhe rünyütuoü di me? Reuben yiemia donu u melou nunu u ketso phita.

¹⁷Gilid-e Jordan khie kekreitsa bata; mu Dan, no kiüdi rouko ze bata ga? Asher-e dzükezha khie bata, sünu rülei chü nu bata.

¹⁸Zebulunkoe kesia krenyü zocü themia; mu Naftali rei sa, rüya chü nu.

¹⁹“Kediko vor, ukoe terhü chü; süsie Kanan nu kediko ze terhü chü, Tanak nu, Megido dzüthou khie kinu; derei uko rakachü puorei valie mo:

²⁰Temvüko teigeinu terhü chü, uko chako nu nie Sisera perhie.

²¹Kishon dzükrue uko zoupfüte, dzükru kere, Kishon rüu dzükru. Tuoshülie, a ruopfü, metei zo di.

²²“Sitse gurako mou pfhe meyie phita, puo gurako phitha prou rüthethe ketsu ki.

²³“Meroz rüsewaliecie, Jihova dielieue puya, puo themiako rüse pesuowalie. Kekreilamonyü ukoe Jihova khruohishütuoü vorkemo la, Jihova khruohi di kekuoko petsou kemo la.

²⁴“Jael bu ruokuothopfü chücie, Kenmia Heber kimiapfü; pfheki nu kelhou ruokuothopfü.

²⁵Puo-e dzü cha ru, puoe thunudzü pie puo tsü; Therhu khounu thunudzü kha se vor puo tsü.

²⁶Puo dzie pie pfheki kezhieu theze, puo zatsa pie seivü pielie, puoe Sisera kepfhüshü, puoe puo tsü bietshieshü, puoe puo tsüle bietshie mu zephashü.

²⁷Puoe rüle ta, tetsuta, puo phinu mele mo zhüta; puo phinu rüle zhüta, puo tetsute; puo tetsuketa kinu, puo siata.

²⁸“Khirki nu puoe mehoshü, Siseranuo zuoe dorü mhitsieku nu meho di,[7] “Kiüdi puo guragari vor menuota mu? Kiüdi puo guragariko pfhe si mo haita mu?

²⁹Mhakesitho puo zepfüko puo die kelashü, ketho, puo thuo puo die kela di:

³⁰‘Uko terhü mhavako ngulie mo di kezalie mo bata me? mia puo la rüümia puo morei kenie; Sisera la thikeliepfhe kezivi, mu u vo gei keshü la khuthu rütso vie kenie, haha pete terhü mhava khuthu rütsoütuo me?’

³¹“Süla n ngumvümiako pete bu ka phretacie, he-i Jihova! Derei n khriethoko bu we, niaki thukesier kekuou mhiei zoliecie!” Sidi rünaue teicie hiedia mene balie.