Read Angami Naga Capiko 6 Bible Online

Capiko 6 - Angami Naga bible

Capiko 6

¹Israelkoe Jihova mhingu nu mha kesuo chüta, süla puoe uko khapie cie thenie Midianmia dzie nu shüwa.

²Siro Midiankoe Israelko mho kuolie, Israelkoe kijüthou kouko nu, tsiepfüko nu kudako chüpie uko keyachü rüshü di lhou.

³Sizomonyü Israelkoe lie cieshü di lhoupar ro, Midianko, Amelekko mu niathutsa seyieko vor uko retataya.

⁴Ukoe vor lie nu razhüchü chülie di chiebieko bie pesuo zo vo Gaza tso, tsiu tekuo, thudo mu Gada rei Israelko la mhapuorei peshashü motaya.

⁵Ukoe khor ro krapie kuprie tuoi di uko kiriko mu uko pfhekiko sa se khorütaya; uko themiako mu utko rei phrü kekralie kenjü zotaya, sidi ukoe ler ro kijüu va votaya.

⁶Midiankoe Israelko pesethorketa la, ukoe Jihova ki kekhruo cha di u mezhiemeloshü.

⁷Israelkoe Midianko la Jihova ki rükhruoshü tse,

⁸puoe siedzekesimia puo ketseshü, di uko ki, “Jihova Israel Kepenuopfü hakemhie puya; a Ijipt nunu nieko ze parshü, mu kediekechü kijü nunu nieko zeparshü;

⁹ae Ijiptmiako mu nieko kepeseko kinu nieko zeparshü. A nieko mhodzünu nu uko whuowa, di uko kijü pie nieko tsü;

¹⁰tsiu a nieko ki, ‘Ae Jihova nie Kepenuopfü zo, mu nie bu uko kijü nu keba Amormia rhuoko rüsuo hie’ sishü. Derei niekoe a die rünyü mote” sishü.

¹¹Tsieu Jihova dielieu tsur Ofra nu Phriebo-u khro balie, süu Abiezermia Joash vie, süki puo nuou Gideon-e Midianko therhie di khubedzü kethechü nunu thoulha vüba.

¹²Sitse Jihova dielieu puo pengushü di puo ki, “Jihova n ze tuo zo, no terhümiaviu” isi.

¹³Derei Gideon-e puo ki, “Derei kezhau, Jihovae hieko ze tuo zo üro, kiüdi mha hako pete hie gei vorta ga? Mu hie puonuokoe puo mhatho u ngoko pie hie kie di, ‘Ijipt nunu Jihovae n ze parshü mo me?’ isiya. Di siro tsiewe Jihovae hie khakegewa di hie bu Mediamia dzienu tuote” ita.

¹⁴Sitse Jihova rürei par di puo ki, “N gei kekuo keba pete se vo Mediamia dzienu Israelko shüphraliecie, a thuo n ketseshüzhie ho” isi.

¹⁵Derei Gideon la sie, “Jihova kimhie di a Israel kelalie vituo mu? A chienuo sü Manasseh yieko donu kecüthoe, mu a rei a kikru donu kecütho-u sa” sita.

¹⁶Sitse Jihovae puo ki, “A n zetuo zotuo, mu noe Midianmia pete pie mia puo tuoi uko bie phrewatuo” sishü.

¹⁷Ru Gideon-e sie, “Tsie a n mhingu ki n neipfü ba üro, no a rüchükecü zasi puo kha a pengushücie.

¹⁸A ngumezhie di a bu mha se vor n mhodzünu khashü kemochie thechü hau nunu rüdita hiecie” sishü. Puoe pu sa di, “No la vor kemochie a ba zotuo” si.

¹⁹Süla Gideon-e puo kinu le di temvünuo yopuo dukhripie chalie, mu thou efa puo, khreiüshükemo niekhrüda chülie; themuoko pie merha nu shülie, mu gadzü pie li puo nu shülie, sidi puoe süko se par phriebo-u khronu puo tsüshü.

²⁰Sitse Jihova dielieu puo ki, “Themuo mu khreiüshükemo niekhrüdako pie tsiekrie hau gei shülie, di gadzü rupie süko gei shülie” sishü. Puoe sükemhie chüshü.

²¹Sitse Jihova dielieue kethe puo dzienu ketuou tie pie themuo mu khreiüshükemo niekhrüdako kethushü; siru tsiekrieu geinu mi tu par di themuo mu khreiüshükemo niekhrüdako the pejüwa; süsie Jihova dielieu puo mhingu nunu ngu sa mota.

²²Gideon-e süu Jihova zoücü si toulie tse, puo ngo di sie, “A khruohishücie, Niepuu UKEPENUOPFÜ! A sü mhotsou Jihova dielieu nguwate.”

²³Derei Jihovae puo ki, “N gei keviu chülie, michie hie, no siatalie lho,” sishü.

²⁴Süla Gideon-e sünunu Jihova la ruosuoba puo chüshü di süu zapie, “Jihovae vitho-u we” sishü. Süu thie ketso rei Abizerko rüna Ofra nu ba.

²⁵Süzhü sü Jihovae puo ki, “N puo thudo kenieu, cie thenieketau selie, sidi n puo vie Baal rüsuobau bierhuowalie, di puo kiki kebau Ashera co-u wiwalie;

²⁶sidi dahou hau mezü geinu Ukepenuopfü Jihova la ketsie pfhe menuopie ruosuoba puo chülie. Sidi no wikewa Ashera co-u pie seidi chülie di thelie, mu sügeinu thudo pie kethe ruosuo khashücie” sishü.

²⁷Süla Gideon-e puo kituomia ker ze puo salie di Jihovae puo ki pukeshü mhiei chülie, derei puo puo kinumiako mu rüna nu themiako keprei la, khinhie gei süu chü michie di theva geinu chü.

²⁸Rüna nu themiakoe khiserüna sier tse, ukoe Baal rüsuobau tsekezhü, mu sükhieki Ashera co-u rei wiwaketa, siro ruosuoba kesa puo chülie di thudo kenieu pie ruosuokhakeshü ngulie.

²⁹Sitse ukoe huoniehuo üse, “Supuonie hau chüshü ga?” sita. Uko hau ketsokega kevo ki, mia uko ki, “Joash nuou Gideon-e hau chüshü” sidi pu.

³⁰Sitse rüna nu themiako vor di Joash ki, “N nuou ze parshücie, puo bu sia molie kenjü! Puoe Baal ruosuobau bierhuowa, mu Ashera co-u rei wiwaketa la” sita.

³¹Derei Joash-e puo petsouketa peteko ki, “Nieko Baal la mia perhietieya me? Morei nie puo zhawhetieya me? Kehoupuorei puo la mia perhieyakezhau khiseyaluokecü nu puo bu siata zotuo. Puoe terhuo ketho puo üliro, puo ruosuobau bierhuowaketa la puo thuo puo la mia perhieliecie” sishü.

³²Süla sünhie yawinu Gideon üse, Jerubal idi kieta, süu Joash-e “Baal bu puo thuo puo perhieliecie” iya, puoe puo ruosuobau bierhuowaketa la.

³³Sitse Midianko, Amalekko mu niathutsa themiako pete vor kengulie, sidi Jordan cieparlie di Jezril Razhau nunu uko razhüchü chü balie.

³⁴Siro Jihova ruopfüu Gideon gei vorlie; mu puo ketsüu khoushü, sidi Abiezritko kie di puo siemedzilienushü.

³⁵Puoe dieliemia ketsepie Manasseh kijü pete nu shü, di uko bu puo siemedzilienushü. Puoe dieliemia ketsepie Asher, Zebulun mu Naftali nu rei shü, mu uko rei puo ze kesiedzituoü kho.

³⁶Tsiu Gideon-e Ukepenuopfü ki, “No pukeshü tuoi, a dzie geinu Israel kelashütuoü ro, n kepu mhie

³⁷ae tekuomie bepie shienu khapie zhütuo; mu tekuomie gei thezei va mu kijü pete gei sophre bakecü sie, noe pukeshü mhiei a dzieu pie Israel kelalietuoükecü silietuo” sishü.

³⁸Sitse sükemhie tou chüta. Gideon-e süsieduü rüna sie di tekuomieko theshü ru, tekuomie geinu thezei hiebou puo tshulie kevi thelie.

³⁹Siro Gideon-e Ukepenuopfü ki, “A gei n noumeyieta hiecie, a bu va puo tekuomie pie dojü lashücie; tsiu va tekuomie rübei gei so, mu kijü pete thezei bu zhüliecie” sishü.

⁴⁰Mu süzhü Ukepenuopfüe sükemhie chüshü. Süsie duü tekuomie rübei so mu kijü pete gei thezei zhü.