Read Angami Naga Capiko 7 Bible Online

Capiko 7 - Angami Naga bible

Capiko 7

¹Sitse Jerubal (süu Gideon) mu puo rüpfhünuoko khiserüna sielie di vo Harod dzüluo khiekinu uko razhüchü chü balie, siro Midianko razhüchüu uko mhotsatie Moreh kijüthou kepenuo razhau nu balie.

²Jihovae Gideon ki, “A bu Midianko khapie n themiako dzienu shüketuo a la rüpfhünuoko krathor. Israel-e a ki kemholie di, ‘A dzie thuo a kelalie’ italie vicü la.

³Süla tsie rüpfhünuoko ki pheshieshü di, ‘Kehoupuorei michie mu peketako bu kinu la votalie,’ iwalie” sishü. Gideon-e uko dojüshü ru;[8] mia nyie mepfüekenie lata, mu mia nyie ker balie.

⁴Siro Jihovae Gideon ki, “Rüpfhünuoko tsie rei krathor; uko ze dzü nu tsulie, mu a n la uko dojüshütuo. Mu a n ki, ‘Hau bu n ze votuo’ ikeshüu bu votuo, derei n ki ‘Hau bu n ze volie lho’ ikeshüu bu volie lho,” sishü.

⁵Süla Gideon-e rüpfhünuoko ze dzü nu tsulie, sitse Jihovae Gideon ki, “Kehoupuo rei tefü tuoi puo meü se dzü meyokecüu kha kreipie bawalie, süsütuoi khoutou tsu di dzü kekrieu rei,” sishü.

⁶Ru u dziepie dzü tapie sie u me nu shü di krie mu meyokecü mia krie se; derei kekreiko pete khoutou tsu dzü krie.

⁷Jihovae Gideon ki, “Meyokecü mia krie seko ze di n kelashütuo. Sidi Midianko khapie n dzienu shütuo; mu kekreiko pete bu u thuo u kinu la votalie,” sishü.

⁸Sidi Gideon-e Israel keshako pete ketsepie u kinu shüwa, di mia krie seko ze balie, mu rüpfhünuokoe nouvako mu ketsüko pielie. Mu Midianko rüpfhünuo razhüchüu sü uko khrotsa razha nu bata.

⁹Süzhü Jihovae puo ki die khashü di, “Sielie di tsu razhüchüu relie, a süu khapie n dzienu shüwaketa la.

¹⁰Derei no ke re michie ro, n kituou Pura zelie di razhüchüu nu kecie;

¹¹siro noe uko kedipuo puba shiü sishü tse, razhüchüu reketuo la kethepfu ngulietuo,” sishü. Süla Gideon-e puo kituou Pura zelie di razhüchüu rükhouba gei tsu.

¹²Ru Midianko, Amalekko mu niathutsa themiako rei sa di razhau nu kuprie kekra tuoi thapfü zhü; mu uko utko phrü hukeliepfü mo, krakrapie dzükezha khie theshünyo mhiei zo.

¹³Gideon-e ke tsolie ru, mia puoe puo zeu ki puo mho pu ba, sidi puo pukecü, “A a mho puo pema, mu harie, barli thou pie kechü niakhrüda puo puo kekuo re se di rütou se Miadiako razhüchüu nu tsur pfhekiu va di puo bie ketsükhewa, sidi süu tetsu dapfüzhüta,” sishü.

¹⁴Puo zeue sie, “Hau mhakekrei puorei mo, Joash nuou Gideon zhiechau zo, puoe Israelmia puo, Ukepenuopfüe Midianko mu rüpfhünuo pete khapie puo dzienu shüwate,” si.

¹⁵Gideon-e themiau mho mu puoca pukeshüu sishü tse, puo Jihova rüsuota; puoe Israel razhüchü nu la vorlie di uko kie di sie, “Sielie, Jihovae Midianko rüpfhünuo pete pie nie dzienu shüwate,” sishü.

¹⁶Sidi puo mia krie seko kezapie kro se chülie, di uko peteko dzienu ketsü mu lipfhü kemethuo kha phreshü, mu lipfhüko nu mitu rei khashü,

¹⁷puoe uko ki, “A meho toulie, di a chatha medzilie, ae razhüchüu carhuo nu volietuo, a kechü tuoi chülie.

¹⁸Sidi a mu a zeketuoko pete ketsü khoushü tse, razhüchüu khie peteko nu nieko rei ketsükhou di hamhiei shieshülie, ‘Jihova la mu Gideon la,’ ishülie;” si.

¹⁹Sidi Gideon mu mia krie puo puo zeketuoko khisoteiluo rükhou sedekecü ki, mu rükhou kevalilie therieki vor razhüchüu tsolie; sidi ukoe ketsüko khoushü, mu uko dzienu pieketuo lipfhüko biephroshü.

²⁰Sitse kro seko pete rei ketsüko khoushü mu lipfhüko biephroshü, ukoe u dzie u vitsa pie mitu pie mu u zatsa pie ketsüko pie di khouketuo la, sidi uko shie di, “Jihova la mu Gideon la zhiecha puo!” sishü.

²¹Ukoe mia puo puo u thuo u tha nu razhüchü houpfü thalie tse; Midianko pete melie shiekhoui di ta vüta.

²²Ukoe ketsü krie seko khou phreshü tse, Jihovae Midianko chüpie uko bu zhiecha se huohuo bieta; sidi rüpfhünuoko tase Zerera[9] tsatie Bet-shita ketso nunu Tabat khieki Abel-mehola rie ketso vota.

²³Siro Naftali nu Asher mu Manasseh pete nu Israelko kieshü, di uko Midianko whuo.

²⁴Siro Gideon-e dieliemia ketsepie Efraim kijüthou rüna pete nu shü di uko ki, “Ker di Midianko perhiecie, di Jordan rüu mu rücüko nu khaliecie mu Bet-bara ketso lieliecie” sishü. Sidi Efraim themiako pete kieshü, di ukoe Jordan rüu nunu vo Bet-bara ketso lielieta.

²⁵Ukoe Midianko krüta kenie Oreb, mu Zib unie telie; uko Oreb tsiekrieu kinu Oreb dukhriwa mu Zib khubedzü kethechü kinu Zib dukhriwa. Ukoe Midianko whuo mu ukoe Oreb mu Zib unie tsü pie Jordan khie kekreitsatie Gideon ki vor.