Read Angami Naga Capiko 8 Bible Online

Capiko 8 - Angami Naga bible

Capiko 8

¹Süla Efraim themiakoe Gideon ki, “No kiüdi hieko gei haita ga? Nieko Midianko whuoketuo ki kiüdi hieko kie mo ga?” ita. Sidi ukoe Gideon kerhie phita.

²Derei puoe uko ki, “A nieko ki kedipuo chü rükrülie di mu? Efraim khubesi meteko zorei Ebiezer khubesi lieyieu ki vikuo moü me?

³Ukepenuopfüe Midian krüta Oreb mu Zib unie khapie nieko dzienu shüshüe. A we kedipuo chüpie süko ze kemejülie vituomu?” sishü. Puoe hau pushü tse, puo gei uko neikemo-u rükreta.

⁴Gideon mu puo zeketuo mia krie seko phisiatazhü zorei ukoe whuozhü zo, sidi Jordan nu vor tsolie di süu cieprata.

⁵Siro puoe Sukot themiako ki, “Niakhrüda huo khapie a zeketuo themiako tsüshücie, ukoe phisia tuote, mu a tsie rei Midian kedi Zeba mu Zalmuna unie whuozhü zo,” si.

⁶Derei Sukot nu kezhakoe sie, “Zeba mu Zalmuna unie tsie n dzienu bate me? Moro hie kiüdi niekhrüda pie n rüpfhünuoko tsülie vituo ga?” ita.

⁷Sitse Gideon sie, “O siro, Jihovae Zeba mu Zalmuna kha a dzienu shüwata ro, a rayhanu zohu mu kikhahu pie nieko vüshütuo ho” sishü.

⁸Sünunu puoe Penuel nu kho, di uko ki sükemhie pushü, derei Penuelmiakoe Sukotmiako pukeshü tuoi puta.

⁹Süla puoe Penuelmiako ki, “A kuolie di la vor ro, a dahou hau bierhuo tseiwatuo” sishü.

¹⁰Tsiu Zeba mu Zalmuna unie rüpfhünuo donu sia keshako; mu zhiecha kepie mia nyie krie puo di mepfü we kata.

¹¹Süsie Gideon-e Noba mu Jogbeha niathutsa rüve chau zekho di vokhrüpfükeba rüpfhünuoko whuo.

¹²Sitse Midian kedi Zeba mu Zalmuna unie tata, derei puo unie whuo zo vo di unie telie, sidi rüpfhünuo pete phruo kemidewa.

¹³Siro Gideon Joash nuoue Heres chakhrau ze di terhü nunu la vorcü ki,

¹⁴puoe Sukotmia khriesamia puo telie di puo ketsoshü, sitse khriesaue Sukot nu kezhako mu pehüko mia hietheniethenie za thupie puo tsü.

¹⁵Sitse Gideon-e Sukotko ki vor di sie, “Harie nieko a ki, ‘Zeba mu Zalmuna unie tsie n dzienu bate me? Moro hie kiüdi niekhrüda pie phisiatuoketa n rüpfhünuoko tsülie vituo ga?’ ikeba nie haki zo vorte,” sishü.

¹⁶Sidi puoe rayhanu kikhahuko se vor di pie Sukot nu phichü pehüko pechü di uko pethashü.

¹⁷Mu puoe Penuel dahou bierhuowa, di dahou nu themiako gei phrewa.

¹⁸Siro puo Zeba mu Zalmuna unie ki, “Niekoe Tabor nu geikewako themia kikecü kropuo ga?” si. Unie sie, “Uko pete rei n tuoi zo, uko rei kedimia nuonuo mhie zo” sishü.

¹⁹Sitse Gideon-e la sie, “Cüko a siezedzüriemia phre ho, a zuo kethopfü nuoko zo. Jihovae rheiketuo tuoi, nieko rei uko perheikeshü siewe, a rei nieko dukhrilie lhociü,” sishü.

²⁰Sidi puoe rürei par puo nuo nuorieu Jether ki, “Sielie di unie dukhriwalie” sishü. Derei Jether-e puo zhiecha zou mo zo, puoe medzü baluocü la michie rei sata.

²¹Sitse Zeba mu Zalmuna unie sie, “N thuo sielie di hienie biewaliecie, phichümia puo thuo puo meseu chükecü mese zo,” sita. Süla Gideon sielie di phi unie dukhriwa; di unie ut vo gei khepieketuo rütso vieko pielie.

²²Siro Israelko sie Gideon ki, “No hie mho ditacie, n nuou mu n tsunuo pete rei sa di; noe Midianko dzie nunu hie kelashücü la,” sita.

²³Derei Gideon uko ki, “A nieko mho dilie lho, morei a nuonuo bu rei dilie lho. Jihova thuo nie mho dituo,” sishü.

²⁴Sidi puoe uko ki, “A nieko ki mhapuo chaya, süu nie kehoupuorei terhü mhava nu ngukelie suna nyieko khashücie,” sishü. (Uko Ishmaelmiacü la suna nyie seya).

²⁵Themiakoe puo ki, “Hieko neisiei di süko khashütuowe,” sishü. Sidi ukoe pfhe puo khrashülie di terhü mhava nu ngukelie u ya nunu suna nyieko kelhoupie sünu shüshü.

²⁶Mu puoe chakelie rütso vie, kheloloi di keliekecüko, mu Midian kedimia seyakecü pfhe teimeziekecüko mu uko ut vo gei kekhe nyako sa phrükemo suna nyieko zorei puo mesi shekel nyie puo di kriethenie ngulieta.

²⁷Gideon-e süu pie efod puo chülie sidi puo rüna Ofra nu pie balie, mu Israel pete-e süu geinu thethe lieta, sidi süu Gideon mu puo kikruko la ciephrie puo chüta.

²⁸Sidi Midianko Israelko mhodzünu rünuonhi bata, mu uko rüka lasier mota. Sidi rünaue Gideon teiki cie hiedia la mene balie.

²⁹Siro Joash nuou Gideon-e puo kinu la vor lhou bata.

³⁰Mu siro puoe puo kimia kekra bacü la puo nuo thepfumia hiethenie lhoulie.

³¹Siro Shekem nu keba puo pelipfüpfü rei thepfumia puo penuo puo tsü, mu puoe puo za pie Abimelek chülie.

³²Mu Joash nuou Gideon-e tsa phi ba di sia, sidi puo pie Abiezermia rüna Ofra nu puo puo Joash mekhru nu khruwa.

³³Gideon siata tse, Israelkoe hadzü mhie lata mu Baalko ze thethe lieta. Ukoe Baal-berith idi pie uko rhuo chüta.

³⁴Mu ukoe lutsahatsa ngumvümia dzie nunu uko kelakeshü Jihova uko Kepenuopfü rükra mota;

³⁵mu ukoe Jerubal (süu Gideon) Israel gei mha kevi chükeshü peteko la rei uko kinumiako gei vishülie mota.