Read Angami Naga Capiko 9 Bible Online

Capiko 9 - Angami Naga bible

Capiko 9

¹Jerubal nuou Abimelek-e Shekem nu keba ki puo zuo prünuoko mu puo zuo thinuomiako pete ki hakemhiei pushü.

²“Vo di Shekemmiako pete ketsocie, ‘Nieko la kiu vituoütuo shi? Jerubal nuo thepfu hiethenieko pete bu nie mhodikecüu tuo mo, mia puo bu nieko mho dikecüu tuo shi?’ Siro a sü nie chü nie zie geinu sierkecü rei rükracie” sishü.

³Sidi puo zuo kinumiakoe puo dieko pie Shekem themiako pete ki pushü tse, ukoe Abimelek siedzikechüu uko neita, uko sie “Puo sü u siezedzürie zo mu” idi.

⁴Sidi ukoe Baal-berith rüsuokiu nunu, raka hiethenie chüpie puo tsüshü, ru Abimelek-e süko pie mha kesuo chücü u khrakemo kropuo zhakhrü pie puo siedzi chülie.

⁵Sidi puoe Ofra nu puo puo ki kho, di puo siezedzürie Jerubal nuo thepfu hiethenieko ze vo ketsie puo geinu dukhri phrewa, derei Jerubal nuo nhicutho-u Jotham gei peshawa, puoe rüshüketa la.

⁶Sitse Shekemmiako mu Bath-Millomiako pete vor kengulie, di ukoe vo phrie bodiu kiki nu Abimelek pie kedi chülie.

⁷Jotham-e süu sishü tse, puo Gerizim kijüthou zügei kho thalie di, uko ki hakemhie pu shiekhoui di sie, “A die rünyüliecie, nie Shekem nu niepuko, themiako, Jihova bu nieko pfhe rünyülieketuo la.

⁸Thiedzü va puo seibokoe tier pie kedi puo kenhe pie uko mho dituoü di tuopra. Sidi uko Olivbo ki, ‘Hie mho kedi chücie’ ishü.

⁹Derei Oliv bo-ue sie, ‘A bu a tierko, terhuomia rei mu themia rei bie ketherhu shüyakecüko khawa di vo seiboko mho rülorülie zhatuo me?’

¹⁰Süsieu va seibokoe vor di chiedebo-u ki, ‘No vor di hie mho di tacie’ sishü.

¹¹Derei Chiedebo-u sie uko ki, ‘A bu a si kevi kemouko vüshü mo di vo seiboko mho rülorülie zhatuo me?’ sita.

¹²Sitse ukoe vo khubero-u ki, ‘No vor di hiemho kedi chütacie,’ si.

¹³Derei khubero-u sie uko ki, ‘A bu terhuomia rei mu themia rei neichülieyakezha a khubedzü keviu khawa, di vo seiboko mho rülorülie zhatuo me?’ sita.

¹⁴Sitse seibo petekoe vor mvüteibo-u ki, ‘No vor di hie mho kedi chü zocie’ isi.

¹⁵Sitse mvüteibo-ue seiboko ki, ‘Nieko nou ketho di a bu nieko mho dituoükecü la tier pie a kenhe nyüya ro, vor di a khrükhro rüzhüliecie, derei simoro, mi bu mvütei geinu par Labanon nu sedarboko thepejüwacie.’

¹⁶“Siro tsie, niekoe Abimelek pie kedi chükeshü ki nie nou ketho mu mezhü di ro? Mu nie Jerubal mu puo kinumia gei mha kevi chüshü, mu puo mhathoko ngulie kesü tuoi puo gei vishü ro?

¹⁷A puo we nie la terhüchü, mu puo phou rei khashü khrie mo di Midian dzie nunu nie kelashü,

¹⁸derei thie nie-e a puo kinuko perhie sieta, sidi puo mu thepfu hiethenieko ketsie puo geinu dukhriwa, di puo diepfü nuou Abimelek üse nie siezedzüriemia üdi pie Shekem themiako mho kedi chüwate;

¹⁹mu haidi nie-e thie Jerubal mu puo kinuko gei chükeshü nie nou ketho mu puotou zoü ro, Abimelek nie neiliecie, mu puo bu nie gei rei puo neiliecie;

²⁰derei simoüro, Abimelek geinu mi bu tupar Shekem mu Beth-Millo niepuko thepejüwacie; mu mi bu Shekem mu Bethe-Millomiako geinu par di Abimelek the pejüwacie!” sishü.

²¹Süsie Jotham-e puo dzürieu Abimelek keprei la ta vo Beer nu bata.

²²Siro Abimelek-e Israel mho cie se di,

²³Ukepenuopfüe Abimelek mu Shekem niepuko donu kesuo ruopfü puo ketseshü, sitse Shekem niepukoe Abimelek gei kelhie do rhüsieta.

²⁴Hau chükeshü, Jerubal nuo hiethenieko dukhrikewa zie khepuu pie uko siezeu Abimelek mu puo khruohipie puo bu puo siedzürieko dukhrikewa Shekem niepuko gei shüketuo la.

²⁵Siro Shekem niepukoe puo petsou di themia keviepie kijüthouko gei ba di cha süu nu kevoko kechükede mu u vie selielieta; mu süu si vo Abimelek tsota.

²⁶Tsiu siro Ebed nuou Gaal-e puo dzürieko ze di Shekem nu vorlie mu Shekem niepuko bu puo pelelie kesü chülie.

²⁷Mu ukoe lie nu tsu di khubesi rielie, di puodzü thelie, di thehe chü. Sitse ukoe uko rhuou rüsuoki nu vo di cü mu krie ba di sie Abimelek rüseta.

²⁸Süki Ebed nuou Gaal-e sie, “Abimelek sü supuo mu, Shekem rei sumia di we puo lie chükecü mese mu? Jerubal nuou, mu puo khronu Zebul unie Shekem krüu Hamormiako theke moü me? Siro we kiüdi puo lie chütuo ga?

²⁹Themia hako bu a dzie nu baücü we! A Abimelek kediwatuo muru, sidi a puo ki, ‘N rüpfhünuo pete ze par di kebiecie’ izotuo muru!” ita.

³⁰Rünau nu kezhau Zebul-e Ebed nuou Gaal dieko sishü tse, puo nou meyiethorta.

³¹Sidi puoe dieliemia ketsepie Aruma nu Abimelek kishü di sie “Harie; Ebed nuou Gaal-e puo siezedzürieko ze Shekem nu vor di ngumvümia die pu di nadiu pfükerhü bate.

³²Süla tsie n rüpfhünuoko zelie di pezi ze vo lienu rüshü balie.

³³Sidi khise niaki thusier mumetha, nadiu nu kenourhei ta lelie; sidi Gaal mu puo themiako n ze kebietuoü par ro, uko gei chülie keviu chüwaliecie,” sishü.

³⁴Sitse Abimelek mu puo rüpfhünuoko pete pezei nu sielie di la dia chü vo Shekem labata.

³⁵Mu Ebed nuou Gaal-e par di nadiu care ki thacü Abimelek mu puo rüpfhünuokoe süu ngushü tse uko rüshüba nunu sierlie,

³⁶Gaal-e süko ngushü mumetha puoe Zebul ki, “Legei kijüthou mezü gei themia tsurzhie!” ishü. Sitse Zebul-e sie, “Luko themia mo, kijüthou khrüko zo” sita.

³⁷Derei Gaal-e pu la di, “Mehoshüi, themiako Tabur-erez nunu tsurzhü ho, mu la puo we Elon-meonenim tsa[10] nu vorzhie” si.

³⁸Sitse Zebul-e puo ki, “Tsiewe no kemelhakecüu kirapuo tuota ga? Noe, ‘Abimelek supuo di, we puo lie chükecü mese me?’ ikebau, rüpfhünuo hako no uko zhasekebako moü me? Tsiewe pra di uko ze kebiecie.”

³⁹Sitse Gaal-e keriechü di Shekem rüpfhünuoko zepra Abimelek ze kegei.

⁴⁰Gaal-e tata, mu Abimelek-e puo whuo zo vo, siro themiako rüzalielie vo nadiu care tso.

⁴¹Sidi Abimelek-e Aruma nu lhou bata, mu Zebul-e Shekem nunu Gaal mu puo siezedzürieko whuowa. Süla uko Shekem nu lhou salie kenjüta.

⁴²Siro süsienhie themiakoe lieko nu tsu tuota. Abimelek-e süu silie tse,

⁴³puoe puo themiako kezapie la se chülie di tsu lieko nu la ba. Sidi themiako nadiu nu parkezhü ngushü tse, puo sielie di uko geiwa.

⁴⁴Siro Abimelek mu puo zeketuo kro-u ta vo nadiu care tieki thalie, mu la kekreinie lie nu ketuoko whuo vo di uko geiwa.

⁴⁵Sidi sünhie zhate Abimelek-e nadiu perhie di süu lielie mu themiako dukhri phrewa. Süsie puo nadiu biepesuowa di metsie pie sünu prushüwa.

⁴⁶Shekem Dahou nu keba niepukoe süu sishü tse, ukoe El-Berith rüsuoki kemeteiu nu leta.

⁴⁷Shekem Dahou nu keba niepukoe sünu vo kengupfü bataücü Abimelek-e silieta.

⁴⁸Sitse Abimelek-e puo zeketuo rüpfhünuoko ze di Zalmon kijüthou gei kholie; sidi puoe seidurü puo pielie di seico khro puo riepie puo bouka gei shülie. Puo zeketuo rüpfhünuoko ki, “A chükeshü tuoi nieko rei chü mhailiecie,” sishü.

⁴⁹Süla rüpfhünuoko pete seikhro rie pielie di Abimelek siemedzi kho di pie kudau vakhrieshülie. Sidi ukoe mi pie dahou theshü; sidi Shekem dahou nu keba themia pete, thenumia mu thepfumia kesa mia nyie puo mese thekhriwa.

⁵⁰Süsie Abimelek-e Thebez nu vo di süu re, di lielie.

⁵¹Derei nadiu nu dahou kemetei se puo ba, mu nadiu thenumia rei thepfumia rei, niepuko pete ta sünu vota; ukoe dahou khalie di dahou mezü gei khota.

⁵²Siro Abimelek-e dahou re di mi pie dahou nu theshütuoü kharu penuo phi.

⁵³Derei thenumiapfü puo thoukege tsie mhoseu kelhou pie puo tsü va di puo tsüru vaphrowa.

⁵⁴Sitse puo rükri puo rünyie kepie khriesau kie di puo ki, “N zhiechau zulie di a geiwalie, mia bu a pu di, ‘Thenumiapfü puo bu puo geiwa shie,’ imolieketuo la” sishü. Ru khriesau puo zhiechau pie puo zekhroshü sitse puo siata.

⁵⁵Mu Israelmiakoe Abimelek siaketa ngu tse, tuo uki nu la vo phreta.

⁵⁶Sidi Ukepenuopfüe Abimelek kejo-u, puoe puo siedzüriemia hiethenieko dukhriwa di puo puo gei kejo chükewau khepu chüshü.

⁵⁷Sizomonyü Ukepenuopfüe Shekemmiako kerüzhü zhakhra pete pie uko gei kha lashü mu Jerubal nuou Jotham rüseu uko gei chü tsei vorta.