Read Angami Naga Johan Kenieu 1 Bible Online

Johan Kenieu 1 - Angami Naga bible

Johan Kenieu 1

¹Phichüu ki nu thupie kedakeliepfü mu puo nuonuoko, a ketho-u nunu khrieyakezhako ki shüya, mu a rübei zomonyü, ketho-u siyakezha pete rei nieko khrieya;

²kekreilamonyü ketho-u u nou baya mu kechachie u ze tuo zotuocü la.

³Ukepenuopfü u Puou mu Puou Nuo, Jisu Khrista bu theja, ngukemezhie mu noune khapie u tsü di ketho mu kekhrie nunu u ze baliecie.

⁴N nuonuoko huomia ketho-u nunu u Puou u bu chülienukeshü mhie tuoyakezha dze sikeshü ki kidepuorei a nei shi!

⁵Siro tsiewe, kekhrie thenupfü, a n ki chaya, a thupie n ki shüzhükecü hau diekhakeshü kesa puorei mo, derei we sietsenu ngulieketa u bu huoniehuo khrielienukecüu zo.

⁶Mu kekhrie, puoca we puo diekhakeshüko nu tuokelie; sietse nunu diekhakeshü silieketau sü hau zo, nie sünu tuoliecie.

⁷Mia setuoyakezha kekra par kijü nu tuote, süko Jisu Khrista üse chüüphou chüpfü di lhoukecü phraya mo; themia sikecümia miakesemia mu Khrista ngumvümia zo.

⁸Tseiphrei balie, silie ro we mhatho chülieketako pejüwalie lho, derei süko la nie zhakhra ngu tseilietuo.

⁹Kehoupuorei Khrista kepetha dieu nu balie mo di keyie votayakezhamia Ukepenuopfü vie mo, kehoupuorei kepetha dieu nu bayakezhamia Puou mu Nuou nyite.

¹⁰Huomianie kepethadie hau se mo di nieko ki vorya ro, puo ze nie kinu vo hie morei puo kelu rei hie.

¹¹themia sikecümia keluyakezhamia puo mhatho kesuokechüko ze puo chüta zo.

¹²A mha kekra n ki thushüketuo ba zoürei, a leshü mu kethudzü rübei kirei a thuo zo n ki vor di mhotsou n ze kerüchükecü le ba, sidi u kenei bu tseilieketuo la.

¹³Kedakelie n siezepfü nuonuoko n kelushü ho.[1]