Read Angami Naga Johan Seu 1 Bible Online

Johan Seu 1 - Angami Naga bible

Johan Seu 1

¹Phichüu ki nu thupie a khrieu Gaya, a puo khrie kethoyakezhau tsükeshü.

²Kekhrieu, mha pete bu rei n la puotoulieketuo mu no ruopfü kitsa puotou tuoyacü tuoi n shürho sü a kecha zo.

³U kezemia huo vor di a ki no ketho-u la dietho tuoyakezha pukeshü la a nei phi ba, no ketho-u medzi di tuoyakezha dze.

⁴A nuonuokoe ketho-u medzi di lhou tuoyakezha dze sikelie ki mha a kenei kekrei puorei jü.

⁵Kekhrieu, no u kezemia mu chazoumia gei zorei dietho di mhachü keba dze si;

⁶uko rei no mia khriekecü dze pie kehouu ki zhapu chüya. No Ukepenuopfü mhodzünu chü kezhüu chüshü di uko khruohipie ketseshü ro vituo;

⁷kekreilamonyü uko Khrista la pelekemoko[1] ki kekhruohi puorei se mo di uko rüve sedelieketa la.

⁸Süla we themia sikecümia khruohishü zhü, sitse we ketho-u lietho kechüu nu kedzieselietuo.

⁹A mha huo thupie kehou tsüshüte, derei Diotrifia, krüta chü nyüyakezhau mhakipuorei hie die lie mvü.

¹⁰Süla a vor üro süze puo hie cie hie rhakecü dieko pete kepu votuo. Sizomonyü puo u kezemia kehoutuoü kevorko rei peso mvü, mu süko pesotuoü kesieko rei kha, tsiu sicüko kehou nunu whuowatuoütaya.

¹¹Kekhrieu, mha kesuo dorielie hiecie, derei mha kevi dorielielie. Kehoupuorei mha kevi chüyakezhamia Ukepenuopfü kitsa zo; kehoupuorei mha kesuo chüyakezhamia Ukepenuopfü ngu mo.

¹²Mia pete rei Demetria pu peviya, mu ketho-u rei puo zhapuya. Hie rei süu ketho zoücü zhapu chüya, mu no rei hie kepuu ketho zoücü si ba.

¹³A mha kekra n ki thushüketuo ba, derei a kethusei mu puo dzü rübei se thu nyü mo;

¹⁴mu a n ze kese peziketuo merü ba, mu süzenu a vu thuo mhotsou kerüchütuo.

¹⁵Nouneu bu n ze baliecie. U kezeko rei n kelushü ho. U kezeko za kie zo di kelushücie.