Read Angami Naga Juda 1 Bible Online

Juda 1 - Angami Naga bible

Juda 1

¹Juda, Jisu Khrista kituou[1], mu Jakob siezeu, Thupie kielieketa Ukepenuopfü u Puou khriepfüketa mu Jisu Khrista bu rüguose tuoketako kishü ho.

²Ngukemezhie, noune mu kekhrieu bu nie ketshu chü baliecie.

³Kekhrieko, a nieko ki vierhe chüketa kelakelie dzeu le a teitso chü di thupie nieko ki shütuoü kesie ki, a bu mha puo thupie nieko kishü di nie hüpie thiedzü va puo chü khapie kemesako ki shükewa kepeleu la nie hie chü tuonucü pu morokesuo lete.

⁴Kekreilamonyü ketho leya kemo huo gou u donu lerketa la, süko Ukepenuopfü kinu kepar ngukemezhieu bie kedipie kerüyo nu shüwate, tsiu süko u Niepuu mu u mho kezha puo rübei zokecüu Jisu Khrista phra mvüya, thiedzü nu süko pejoketuo thupie tuote.

⁵Siro nieko hau si bata zorei, Niepuu va puo chü Ijipt nunu puo themiako kelashü, derei kenuotsa pele moketako pekawaketa dzeu se nie tarho lashü nyüya.

⁶Mu thiedzü teigeidieliemia kro puo u thau se balie mota, sidi u kelhouchü keviu khawaketako, puoe süko khapie kezeiu khrükhro nu phapie ketsokecü teisozhau pfhe bate.

⁷Sütuoi, Sodom mu Gomora tsiu sükhieümhou nadiko u thuo u khapie pieü mu lhenu zhokemo menguko nu shü,[2] süla kechachie miu nu siazha ngukelie thakie puo chüshüta zo.

⁸Sirei sümhie tou di u mhogei tuoiketuo themia hako rei u thuo u chü u phou bie perhu mu u mho kezha kechü rei rünyü mo, mu pesogei ketuo zapuzayie kechümia rei krenyü tuoya.

⁹Derei Mikael teigeidielie kezhau thuo rei thiedzü Mosa Mo-u dze terhuo kerüzhüu ze kemeü di keprüli kesie ki puo kre di puo pejoshü michie di sie, “Niepuu thuo n ruotuo” sita

¹⁰Derei themia hako mha dze sikemo-u rei krenyü tuoya, mu u thuo u nou nu si ütuo rei uko khunuo u pfhe u va siya kemoko tuoi mha süko nunu kataya.

¹¹Süko we ce chülietie! Kekreilamonyü ukoe Kain chau zete, mu u kepra le di Balam kekrüketau nu vote, mu Kora mha kebvü sie di kaketa nu lete.

¹²Hakoe nie kekhrie heko nu mha va perhucüko,[3] ukoe michie mo di nie ze hieya, sidi u thuo u vachüya.[4] Ukoe teikhrie bu hepfüketuo tseünhuo kemo kimhou kro puo, therü ki puo si vüshüya kemo seibo, kesia sie rei siakecü, puo mieko shüloukewa kro puo zo;

¹³Uko ngae dzü rüpfhü tuoi meluo tuoya zo; uko kezei kesoutho nu kechachie khapie bawaketuo rühou ketuo themvüko zo.

¹⁴Siro süko dze rei Adam geinu lhou kepar phou thenieu, Inok siedzekesi die pu di sie, “Harie, Niepuu puo kemesako nyienyieko ze voryie[5];

¹⁵sidi themia pete ketsotuo, mu pele kemoko mhatho chükewa pete, tsiu pele kemo kephoumako puo gei die kere pukewa kheko kejo thashü kietuo” sipiezhü.

¹⁶Themia hakoe panyapara mu u vie se u nei tseilie kemomia; uko die u zhazie pu khuboupfü, u mevi puo la mha kese dieko pu tuoya.

¹⁷Derei a khrieko, nieko we thiedzü u Niepu Jisu Khrista apostelko pushüwaketako rükraliecie;

¹⁸Ukoe nie ki, “Puotei thelatsa themia ketho le kemo rüyo u thuo u medo chütuoyakezha mha krenyü zokecü kro puo siertuo” ishü zocü la.

¹⁹Themia hako mha pfüphroshüyakezha kro puo zo, chüüphou mengu bu uko shüta ketuou sie uko Ruopfüu ba mo.

²⁰Derei a khrieko, kepele kemesatho geinu memie sieliecie; kemesa Ruopfüu nunu memie zoliecie; kemesa Ruopfü nunu kecha chülie;

²¹nie ze kechachie kerhei nu voketuo[6] u Niepuu Jisu Khrista ngukemezhieu pfhe keba kize nie thuo nie khapie Ukepenuopfü kekhrieu nu ba zolie.

²²Siro kenoudo kebako ngumezhielie.

²³Mi nunu huomia mezalie di kelashülie; mu michie di huomia ngumezhielie, chüüphou mengu nunu u perhuwaketako uko pfheneiko zorei rütselie.

²⁴Cüsie, nieko phi mesüketuo nunu nieko rüguose tuolie keviu mu nie bu jota mo mu nie neisiei di nie pie zayie chü zokecü puo keba nushülie keviu,

²⁵u Niepuu Jisu Khrista geinu puo rübei Ukepenuopfü zokecü u kelakelieu bu nnhie nnhie nu rei, tsiedo rei mu kechachie rei zayie, kezha kedi mu kekuou chüliecie. Amen.