Read Angami Naga Pesikeshü 1 Bible Online

Pesikeshü 1 - Angami Naga bible

Pesikeshü 1

¹Jisu Khrista ki nu pesikeshü, Ukepenuopfüe puo bu mhachü pezitaketuoko se puo kituoko[1] pesishünukecü la kha puo tsükeshü; puoe[2] puo dielieu ketsepie Johan kishü di mha hako pie puo kituou[3] pesipengute,

²puoe Ukepenuopfü dieu mu Jisu Khrista zhapu chüshü mu mha kengu pete rei pushü.

³Kehoupuorei siedzekesi dieko phrü peto tsiu süko rünyülie di sünu thupiekezhüko chüüzeyakezhamia thejakepfütho; kekreilamonyü puoteiu penuoteiketa la.

⁴Johan ki nu thupie Asia nu kehou thenieko ki keshü: Tsiedo mu thiedzü ketuou mu thiesie vorketuou ki nu, mu puo kediba mhodzünu ketha ruopfü thenieko ki nu,

⁵mu kijü kedibako mho kediu, kesiako donu nu rheisiekelie kerietho-u kedietho zhapuu Jisu Khrista ki nu ngukemezhie mu noune bu nieko ze baliecie. U khriekezhau mu puo zie pie kephoumako nunu u rhakeshüu,

⁶u chüpie[4] kedirüvie puo mu puo Kepenuopfü mu puo puo lie kechü zievoko chükeshüu[5], telhe kechachie zayie mu kekuo bu puo gei bakelieu chücie. Amen.

⁷Lerie! Puo kimhou ze tsurzhie; themhi pete puo ngutuo, rüngou pie puo zekeshüko rei, mu puo la kijü nu seyie pete kratuo. Süu si zotuo. Amen.

⁸“A Alfau mu Omegau,” Niepuu Ukepenuopfüe siya, tsiedo mu thiedzü ketuou, mu thiesie rei tuoketuou, Kuokejokejüu.

⁹A Johan, nieko zeu mu Jisu geinu nieko ze mezhie kezakecüu nu mu kedi kechü nu, shügeshühiekecü nu nie ze kepekroyakezhau, Ukepenuopfü dieu mu Jisu zhapu kechü la Patmos kijürüchütsokemo nu ba.[6]

¹⁰Niepuuzha puo nhie a Ruopfüu nu tuo ru, a sietsa nu ketsü kekhou pfhe tuoi di shie petokeshü si,

¹¹sidi sie, “No ngukecüko thulie di pie kehou thenieko ki shücie, süko Efesa, Smurna, Pergama, Thiatira, Sardia, Filadelfia mu Laodikia,” isi.

¹²Sitse a rüchü ketha pfheu mehotuoü reipra, sidi rüreikeshü ki suna pie kechü mituba thenie ngu,

¹³mu mituba süko donu puo ngupie themia Nuou tuoi, puo pfhenei rütshu mu suna terha pie puo merü rhapfü tha.

¹⁴Puo tsü mu puo tsütha krapie chümie kekra tuoi; krapie pekrie tuoi; tsiu puo mhi miü tuoi,

¹⁵puo phi-e mesapie mese kemeva tuoi, miü nunu the keyharapiekezhü tuoi, mu puo pfhe liro dzüdi krukezhü tuoi.

¹⁶Puo dzie puo zatsa themvü thenie thezepie, mu puo me nunu zhiecha lutsahatsa puoü kechü puo par, mu puo zie niaki kezie puo raki tuoi zo.

¹⁷A puo ngushü tse, a tetsu puo phi nu kesiamia tuoi zhüta. Derei puo puo dzie puo zatsa pie a bie di, “No michie hiecie; A therieu mu thelau,

¹⁸mu rheituoyakezhau. A siata, derei harie, a tsie kechachie mu kechachie rhei tuote; tsiu a Kesia mu Hades cabiko seya.

¹⁹No kengu, tsie vieko, siro hasie chü vorketuoko thuliecie.

²⁰No ngu ketha mha kesou a dzie a zatsa themvü thenieko, mu suna pie kechü mituba thenieko themvü theniekoe kehou dielieko, mu mituba thenieko kehou thenieko zo.