Read Angami Naga Pesikeshü 10 Bible Online

Pesikeshü 10 - Angami Naga bible

Pesikeshü 10

¹Süsie a teigeidieliemia kemecakemekhro kekrei puo teigeinu tsurkecü ngu kimhou bu puo zepfü mu pfhesei japie puo tsü houpfü; puo zie ngupie niaki tuoi, mu puo phiko liro mico tuoi.

²Puo dzie nu leshütshü kecü yopuo lhapie tuo, puo phi puo zatsa pie dzükezha gei mu puo vitsa pie kijü prapfü tha,

³puo losha mehokecü tuoi shie peto phishü. Mu puo shiekeshü sie, teikese thenieko u pfhe chüshü.

⁴Siro teikese thenieko u pfhe chüshü tse, a thulietuo üsie, derei teigeinu mha pfhe puo sie a ki, “Teikese thenieko mha pukeshüko mohor pie vüwalie, mu süko thu hiecie” isi.

⁵Süsie a ngukecü dzükezha mu kijüu gei ketha teigeidielieu, puo dzie puo zatsa yhapie teigeishü.

⁶Sidi kechachie mu kechachie rheituoyakezhau za se rüse, teigei mu sügei ketuo pete chükeshüu, kijü mu sünu ketuo pete chükeshüu mu dzükezha mu sünu ketuo pete chükeshüu; sidi “Ge sa balie lhote,

⁷derei teigeidielie thenieu puo ketsüu khoukeshü ki, Ukepenuopfü puo kituo[27] siedzekesiko pesishüwaketa tuoi puo pekhrepieketuou chü tseishütuo” sita.

⁸Süsie a teigeinu mhapfhe sikecüu la sie, a ki, “Vo di dzükezha mu kijü prapie ketha teigeidielieu dzie nu lhapie ketha leshütshüyo pieliecie” sita.

⁹Süla a teigeidielieu ki phi di puo bu leshütshü kecüyo pie a tsünu cha; mu puo a ki, “Pielie, di cücie; süu n va nu zowe pfhütuo, derei n me nu zowe mepfhidzü tuoi moutuo” isi.

¹⁰Süla teigeidielieu dzie nunu leshütshü kecüyo pielie di süu cülie; süu a me nu moupie mepfhidzü tuoi, derei a süu cülie tse a va nu zowe pfhüta.

¹¹Sitse uko a ki, “Noe themiako, mu seyieko tsiu dieko mu kediko kekra dze siedze die pu lashü morosuote” isi.