Read Angami Naga Pesikeshü 11 Bible Online

Pesikeshü 11 - Angami Naga bible

Pesikeshü 11

¹Süsie mha kemejüsei tuoikecü kethe puo pie a tsü di sie a ki, “Vor di Ukepenuopfü rüsuokiu mu ruosuobau tsiu sünu rüsuokezhako mejücie,

²derei rüsuoki kitie tsatieko we mejü hie; süu khapie balie, süu pie seyieko tsüwaketa la, mu ukoe khrü hiediaekenie nadi kemesau kedetuo.

³A gakhropfhe dziekecü a zhapumia kenie ketseshü di sünie bu zha nyie puo krie kenie di hiesorou siedzekesi die puketuo kekuo khashütuo” sita.

⁴Hanieha kijü Niepuu mhodzü thayakezha Olivbonie mu mitunie zo.

⁵Mu miapuonie sünie pechütuo üro, unie me nunu mi par di unie ngumvüko pekawaya; süla kehoupuorei unie pekawa kenyümia hamhie di dukhriwatuo.

⁶Unie teiu khalieketuo kekuo ba, süla unie siedzekesi die kepu ki teirü motatuo, tsiu unie dzüko chü kedipie thezie mevilie kevi kekuo ba; mu unie medo chü di tsiekenuo, thepetheruo kehoupuorei se kijüu pechülie vi.

⁷Siro sünie zhapu chü tseikewa sie, thekhe kesou nunu kepar nhachüu sünie ze kegeituo sidi unie penyüwa mu unie dukhriwatuo,

⁸mu unie kesiamo khapie nadi kezha, siedze die nu[28] Sodom mu Ijipt üyakecü, unie Niepuu pie goukewa nadiu chaü nu zhüwatuo.

⁹Themia neiüko, mu seyieko tsiu dieko mu seyieko teisozha se di puotie unie kesiamo mehotuo mu unie khru mvütatuocü la;

¹⁰mu kijü gei themiako unie se la u nei phi di nyituo mu mha methuo pie ketsütuo, siedzekesi hanie-e kijü nu kelhouko pechü vorkecü la.

¹¹Siro zha se di puotie sie, Ukepenuopfü ki nu kerhei thesüu[29] unie gei vorlie, sitse unie siethalie, mu unie kenguko pete kedethewa.

¹²Süsie unie[30] mhapfhe puo shiekhoui di teigeinu unie ki, “Hagei sierlie!” icü si. Sidi unie ngumvüko unie meho ketha nu unie kimhou geinu teigei sieta.

¹³Süki kiükishü kemerieta, mu nadiu ker za puo pekawa, kiükikeshü sünu mia nyie thenie biekhriwa, mu keshako michie phi di teigeiketuo Ukepenuopfü tsheürhuta.

¹⁴Theshiethemei va kenieu vote. Siro theshiethemei va seu mhai vorzhie.

¹⁵Süsie teigeidielie thenieu puo tsüu khoushü, mu teigeinu mhapfhe kemerie chü di sie, “Cüsie kijü kedikechü sü u Niepuu mu puo Khristau vie chüte, mu puo telhekechachie ditatuo” ishü.

¹⁶Süsie pehümia mepfüediako Ukepenuopfü kediba mhodzünu u kediba gei bayakezhako zeretsu di Ukepenuopfü rüsuota,

¹⁷Mu keli di, “Niepuu Ukepenuopfü Kuokejokejüu, tsiedo mu thiedzü rei ketuou hie n tsheya, no n kekuo kezha se di sedeketa la.

¹⁸Seyieko meyiemehüpfü ba, derei n noupfhü vorte, kesiako nyie kecüketuo teiu, n kituoko[31], siedzekesiko mu n za preiyakezha, kezha kecü pete, zhakhra chüpie tsüketuo, mu kijüu pekayakezhako pekaketuo teiu vorte,” isi.

¹⁹Sitse teigei Ukepenuopfü rüsuokiu khrüshü, mu dietseidiekho bouu puo rüsuokiu nu ba di ngu, sitse teimela vavai, mhapfhe mu teikese pfhe, kiükishü, tsiu prü krü kemerie chü vorta.