Read Angami Naga Pesikeshü 12 Bible Online

Pesikeshü 12 - Angami Naga bible

Pesikeshü 12

¹Teigeinu zasi kezha puo ngu: thenumiapfü puo niaki dzie, khrüu kedepfü, mu puo tsü gei themvü kerekenie keditsüre pfü.

²Puo nuonipfü tuo mu penuoketuo la nuonuo vachü chü ruorüi tha.

³Süsie zasi kezha puo teigei la par: tinyhü kemerie kezha puo, puo tsü thenie mu puo kia ker, mu puo tsü gei keditsüre thenie ba.

⁴Puo meiu pie teigei themvüko se za puo tshopie kijü shüwa. Siro tinyhüu thenu penuotuoükezhüpfü mhodzünu tha, thenupfü penuoshü ro puo nuou mezulietuoü di.

⁵Mu puo thepfunuomia yopuo penuolie, nuo süyo thegi the se themia lhouketuo pete kekhatuo[32]. Derei süpfü nuoyo sese Ukepenuopfü mu puo kedibau nu vota;

⁶mu thenupfü ta se rayha nu vota, thechü süu Ukepenuopfü thuo puo la kesepie ba, sidi mia bu zha nyie puo krie kenie di hiesorou puo thekeketuo la.

⁷Süsie teigei terhü chüsierta; Mikael mu puo dielieko tinyhüu ze kegei. Siro tinyhüu mu puo dielieko rei mia ze kegeita,

⁸derei uko mia lhota, mu teigei uko la thechü puorei ba sa mota.

⁹Siro tinyhü kezhau, kerieki tinyhü, puo üse Terhuokesuou mu Satan üya, kijü pete seketsikezhau, puo kelhoupie kijü nu shüwa, puo sa di puo dielieko kelhouwa.

¹⁰Süsie a teigeinu mhapfhe kemeyie se puo si: “Tsiewe Ukepenuopfü ki nu kelakelie mu kekuo tsiu Ukepenuopfü kedi mu puo Khristau kekuo vorte ho, kekreilamonyü teizeiteiso rülei mo di, Ukepenuopfü mhodzünu u zeko[33] tha mu pejo kebau chü kelhouwate:

¹¹Derei Tekuonuo zieu mu uko zhapu dieu la puo penyüliete, uko kesiatienu rei u phou khrieta kemo la.

¹²Süla teiko mu sünu lhou ketuo pete, nie neiliecie. Derei kijü mu dzükezha we ce chülietie, terhuokesuou puotei tsaketa si di, puo nou rüpe se di nieko ki tsurketa la!” idi kepu a si.

¹³Süsie tinyhüe puo kelhoupie kijüu gei shüwaketa ngulie tse, thepfunuomia puo penuokeshüpfü whuota[34].

¹⁴Derei thenupfü bu tinyhüu ki nu ta rayha nu vota di, puotei puo la, mu puotei huo la, mu puoteipuotie la, mia bu puo theketuoü pruotaketuo la tsüürapfü kezhapfü shü kenie pie puo tsü.

¹⁵Sitse dzüdi bu süpfü zoupfütaketuo la tinyhüu puo me nunu dzü kepfhüpie kerü tuoishü.

¹⁶Derei kijüu vor thenupfü khruohilie, süu mekuoshü di teinyhüu me nunu kerü kepar-u mezulie.

¹⁷Süsie tinhyüu thenupfü ngu puo noumeyiecü pfü vo süpfü nuonuo kezhako, Ukepenuopfü diekhakeshü chüüzeyakezhako mu Jisu zhapu zeyakezhako ze kegeituoü prata.

¹⁸Süsie tinyhüu[35] vo dzükezha khieki theshünyo nu thata.