Read Angami Naga Pesikeshü 13 Bible Online

Pesikeshü 13 - Angami Naga bible

Pesikeshü 13

¹Sitse a nhachü puo dzükezha nunu parkezhü ngu, süu puo kia ker mu puo tsü thenie ba; mu puo kiako gei keditsüre ker pfü, mu puo tsüko gei Ukepenuopfü ketha za thupie tuo.

²Mu a ngucü nhachüu khurhü tuoi, puo phi thega phi tuoi mu puo me losha me tuoi. Mu tinyhüu puo kemecakemekhro mu puo kediba tsiu kekuou pie nhachüu tsüwa.

³Puo tsüko puo gei rüza zadi[36] pfüketuo mhiei, derei rüza zadiu meneta. Sünu nu kijü pete u ngopfü nhachüu siemedzita.

⁴Sidi uko tinyhüu rüsuota, süu puo kekuo pie nhachüu tsüwaketa la, mu uko nhachüu rüsuo di, “Supuonie nhachüu mhie ga? Mu supuonie puo perhielietuo ga?” ita.

⁵Nhachüu kemiako di Ukepenuopfü ketha kenyü sikemo kepu tie khashü, mu puo bu thekhrü hiediaekenie kekuo seketuo pie tsüwa.

⁶Puo tiega sie di Ukepenuopfü ketha kenyü sikemo dieu, puo za tha mu puo kebachü, süusü teigei kelhouko pete thata.

⁷Siro puo bu kemesako ze kegei di süko penyüwaketuo[37] kekuo khashüwa. Mu seyie kecükezha pete die mu themia neiüko mho diketuo kekuo rei pie puo tsüwa,

⁸mu kijüu chükelie mhodzü u za thupie dukhrikewa Tekuonuou kerhei leshüdau nu zhüketako zokemo sie, kijü nu lhouketuo pete süu rüsuotatuo.

⁹Süla kehoupuorei u nyie kenyimia bu rünyüliecie:

¹⁰Mia n tepie kedie chüta liro; mia die chü zolie; no zhiecha se mia dukhri ro, zhiecha se n dukhrituo. Hauha kemesako bu shügeshühie mu kepele nu balienu kekieu zo.

¹¹Süsie a nhachü kekrei puo kijü nunu kepar ngu; süu tekuo tuoi puo kia kenie ba, mu tinyhü tuoi diepu.

¹²Siro süu nhachü kerieu kekuo pete se di süu sounu mha kekha, sidi kijüu mu sünu kelhouko pete bu nhachü kerieu, puo rüzapfü[38] meneketau rüsuonuta.

¹³Süu zasi u ngo phicüko chü; themia pete mhingu kinu teigei nu mi se kijü tsur.

¹⁴Sidi süu bu nhachüu sounu zasiko chülieketuo khashüwa, sidi kijü nu lhouketuo pete se ketsi, sidi uko bu zhiecha[39] geinu rüza di rheilalieketa nhachüu kerhu nu puo miarhi puo chülienuta;

¹⁵sidi süu bu kerhei thesü[40] khapie nhachü miarhi geishü di süu bu die pulie mu süu rüsuo mvüketako pete dukhriwaketuo la.

¹⁶Süsie rei süu themia pete, kecükezha, kenyi, kejü, mia diemia mu kemomia pete bu u dzie u zatsa morei u teikhie nu zasi pfü phretuoüta,

¹⁷sidi zasiu, süusü nhachüu za morei nhachüu za khu thupfükemoko mia puo bu rei mha khrü mu zelie kelho chüwa.

¹⁸Hau nu mhasi se morosuo: kehoupuorei mhasimhale kenyimia bu nhachükhuu leshücie, puo khu süu mia puo za sounu bacü la. Süu puo khu krie sorou di hiesorouesorou.[41]