Read Angami Naga Pesikeshü 15 Bible Online

Pesikeshü 15 - Angami Naga bible

Pesikeshü 15

¹Süsie a teigeinu zasi kekrei puo ngu la, zha mu u ngo zokecü puo; teigeidieliemia thenie thepe thenie se tha, süko thepe thelako, süko geinu Ukepenuopfü noupfhüu chü tseiwa.

²Süsie a khrüva mu mi kereikecü dzükezha tuoikecü puo ngu, mu nhachüu mu süu miarhiu tsiu süu za khuu keseko mho kuokelieko, sükoe Ukepenuopfüe pie uko tsükeshü kitharko pie di khrüva tuoikecü dzükezha khieki tha.

³Mu ukoe Ukepenuopfü kituou[45] Mosa tsaliu, mu Tekuonuou tsaliu chü tha! “Kuokejokejüu, Niepuu Ukepenuopfü, n mhathoko zha mu u ngo zalie! N chako sü mezhü mu ketho phre, seyieko Kediu!

⁴Niepuu, supuonie n khrüprei mota mu n za tshe mo ta? N rübei kemesau zocü la. Seyie pete n mhodzünu vor n rüsuotuo, n capiko pie mia pesipengushüwaketa la” si.

⁵Hau sie a mehoshü, ru teigei zhapu pfheki[46] rüsuokiu khrüshü,

⁶mu rüsuokiu nunu teigeidieliemia thenie thepe thenie se di par, linen pfhe[47] mesapie phriephrie zocü se, tsiu suna terha pie u merü nu rhapfü.

⁷Sitse khunuo kerhei diako puoe sie telhekechachie rheituoyakezha Ukepenuopfü noupfhüu tshukecü suna khou thenieko pie teigeidielie thenieko tsü.

⁸Mu Ukepenuopfü kekuo mu zayie nunu kevor mikhuu thuo rüsuokiu tshuta, sidi teigeidielie thenie thepe thenie se kevorko chü tseiwa kemochie miapuorei rüsuokiu nu lelie kenjüta.