Read Angami Naga Pesikeshü 16 Bible Online

Pesikeshü 16 - Angami Naga bible

Pesikeshü 16

¹Süsie a rüsuokiu nunu mhapfhe puo meyie phi di teigeidielie thenieko ki, “Vo di Ukepenuopfü noupfhü khouko rupie kijüu gei shücie!” icü kepu si.

²Süla teigeidielie kerieu vo di puo khouu rupie kijüu geishü, sitse nhachüu zasi pfüketuoko mu süu miarhi rüsuoyakezhako gei kechüpfü kemerie chü parta.

³Süsie teigeidielie kenieu puo khouu rupie dzükezha nu shü, sitse dzü pete kesiamia zie tuoita, mu dzükezha nu khunuo pete siata.

⁴Süsie teigeidielie seu puo khouu rupie kerüko mu dzümhidzürüko nu shü, sitse süko thezie mevita.

⁵Sitse a sie dzü mho teigeidielieue, “Noe mezhü, he-i Kemesau, tsiedo rei mu thiedzü rei ketuou, noe mha hako nyie pepishüte eru;

⁶kekreilamonyü ukoe kemesako mu siedzekesiko zie pekru, noe uko bu thezie kriecü la. Süue uko ngulie kesüu zo!” idi kepu si.

⁷Sitse ae rüsuobau nunu mha pu lakecü si, “Uwe, Niepuu Ukepenuopfü, Kuokejokejüu, n capiko sü ketho mu mezhü zo!” isi.

⁸Siro teigeidielie diau puo khouu rupie niakiu geishü, sidi mi kekuo bu themiako theketuo khashü;

⁹sidi kele kemeriekecü bu uko thewa, sizorei ukoe thepe hako mho kekuo kebau Ukepenuopfü zau rüseta, sidi ukoe thenou kedi mvü mu zayie se puo tsü mvüta.

¹⁰Süsie teigeidielie pengou-u puo khouu rupie nhachüu kediba geishü, sitse puo kedirüvie nu zeiboui vorta; themiako u kechü toupfü u meü medu zota,

¹¹sidi uko kechü mu kechüpfüko la teigei ketuo Ukepenuopfü rüseta, sirei uko mhathoko nunu rüreilie mo.

¹²Süsie teigeidielie sorou-u puo khouu rupie Eufrat rüdiu nushü, mu niathutsa kediko bu vorlieketuo cha kesepie tsüketuo la süu rüko sota.

¹³Mu a kerhu ruopfü se, guorünuo tuoikecü, tinyhüu me nunu, nhachüu me nunu mu ketijü siedzekesiu me nunu parkezhü ngu.

¹⁴Sükoe ungomhatho chüyakezha terhuokesuoko ruopfüko zo, hakoe Kuokejokejü Ukepenuopfü teisozha kezha nhie puo ze terhükegeiketuo la kijü nu kediko pete pfhü kengutuoü prata.

¹⁵(“Harie, ae kerügumia mhie di voryie. Methuo di mia bu puo kemenga ngu molieketuo la, pfhenei se,[48] di pfheüla bakeliemia thejakepfütho!”)

¹⁶Mu ukoe süko pfhü kengu ze Ibri die nu Harmagedon ükecü thechü puo nu vota.

¹⁷Süsie teigeidielie thenieu puo khouu rupie teikhrie nushü, mu rüsuokiu kedibau nunu mhapfhe puo shiekhoui di sie, “Süu chüwate!” isi.

¹⁸Sitse teimela phriephriei, mhapfhe kekra, teise mu kiükishü kemerie chüta, sidi themia lhou kevor nu mhakipuorei, kiükishü kemeriekecü sükemhie si chie kemo sierta.

¹⁹Sidi nadi kezhau pro se chüta, tsiu seyieko nadiko tetsu phreta. Mu Ukepenuopfüe Babilon kezhapfü rükralie di süpfü bu puo noupfhü zu hieu krietuoü khashü.

²⁰Mu kijü rüchütsokemoko ta phreta mu kijüthouko ngu mo phreta,

²¹siro prü kezha, puo zorei puo mesi sher hiepengou[49] mese teigeinu krü trur themia vata, siro prü la thepe hau vorketa geinu themiako Ukepenuopfü rüseta, süu thepe kemeriekecü puoketa la.