Read Angami Naga Pesikeshü 17 Bible Online

Pesikeshü 17 - Angami Naga bible

Pesikeshü 17

¹Süsie mha khou thenie pieketha teigeidielie thenieko mia puo vor di sie a ki, “Vorliecie, sitse dzü kekra mho bayakezha thethenu kezhapfü siazha a thashü n kietuo,

²kijü gei kediko puo ze pieü chü, tsiu kijü nu themiako puo pieü zuu krie meze” si.

³Sidi puo ruopfüu[50] nunu a ze rayha nu vota, mu thenumiapfü puo nhachü merieyharakecü puo geinu Ukepenuopfü ketha theza thupie tshupfükecü puo gei ba ngu, mu süu puo tsü thenie mu puo kia ker ba.

⁴Siro thenu süpfü pfhe meriemege mu merieyharacü, suna pie kechü cümenyie, ketsie puoma kere mu mukutpfü se kerütso, mu puo rügerüzhücü mha kerütsecüko mu mha kerhu neiü tshukepfü suna pie kechü hie puo pie,

⁵mu puo teikhie gei puoca kesou za puo thupfü tuo; “Babilon kezhapfü, kijü nu kerütsekecüko mu thethenuko zuopfü” isi.

⁶Siro thenu süpfü kemesako zie mu Jisu zhapu chüyakezhako zie krie di meze keba a ngu. Sidi a puo ngushü tse a ngothorta.

⁷Derei teigeidielieu a ki, “No kiüdi n ngoya ga? A thenupfü dze kesouu, mu puo toupfüketuo nhachü puo tsü thenie mu puo kia kerkecü ca pupie n kietuo.

⁸Thiedzü nhachü no kenguu tuoi, derei tsiewe tuo moketau thekhe kesoutho nunu par di mha peka voketuo tei vorzhie. Siro kijüu chükelie mhodzü kerheiprü leshüdau nu u za thulie kemo kijüu gei lhouketuoko, nhachü süu mehoshü di u ngo phitatuo, süu thiedzü tuo di tsie tuo mota mu süu la vorketuo la.

⁹“Hau nu mhakesi nou se morosuote: Tsü thenieko sü thenupfü bayakezha kijüthou thenieko; ukoe kedimia thenieko rei zo,

¹⁰süko donu pengou tetsute, mia puo rhei ba mu kekreiu vor moluo, mu puo vorcü ki, puotei keduo yopuo rübei bacü zotuo.

¹¹Siro nhachü thiedzü tuo derei tsie tuo moketa süue thethaute, sirei süu thenieu nunu par, mu süu keka nu voketuou zo.

¹²Mu no kengu kia kerko ro kedi kerko, sirei kedirüvie kha uko tsü moluo, derei kekuo khapie uko tsü di uko bu kedimia mhie nhachüu ze bavüdo puo dituo.

¹³Hako keze nou puo chü phreya, mu uko kezha mu kekuo pie nhachüu tsüya;

¹⁴Ukoe Tekuonuou ze terhü chütuo, sirei Tekuonuou uko penyüwatuo, puo niepuko mho Niepuu mu kediko mho Kediucü la, mu kielieketako, mu kedakelieko tsiu kediethoko puo ze tuo” isi.

¹⁵Mu puo a ki, “Thethenupfü ba chükecü no kengu dzüko sü themia, mu themia krodi mu seyieko tsiu dieko zo.

¹⁶Mu no kengu kia kerko, süko mu nhachüu keze thethenupfü ngumvütuo, sidi ukoe puo bie pesuo mu bie kemethuowatuo; ukoe puo chü cülietuo mu mi pie puo thewatuo.

¹⁷Ukepenuopfüe puo dieko chü tsei vorlie kemochie süko bu keze nou puo chü di mhachüketuo mu nhachüu bu diketuo kekuo pie tsüwaketa la.

¹⁸No kengu thenupfü sü kijüu gei kediko kekhayakezha nadi kezhapfü zo” sita.