Read Angami Naga Pesikeshü 19 Bible Online

Pesikeshü 19 - Angami Naga bible

Pesikeshü 19

¹Hau sie a teigeinu mia krodi pfhe tuoi kemeriekecü puo si, süu sie, “Haleluya! Kelakelie mu zayie tsiu kekuo Ukepenuopfü vie zo,

²puo capiko ketho mu puotou; puoe thethenu kezhapfü puo pieü se kijüu va perhuketuopfü nyie pepiwate, mu puoe süpfü geinu puo kituoko[55] khepuwate” si.

³Süsie süko shiekhoui la di, “Haleluya! Puo geinu kepar mikhuu kechachie khu seizhü zote” si.

⁴Süsie pehümia mepfüediako mu khunuo kerhei diako zeretsu kediba gei kebau Ukepenuopfü rüsuo, sidi sie, “Amen, Haleluya!” isi.

⁵Sitse kedibau geinu mhapfhe puo vor di sie, “Ukepenuopfü tsheliecie, puo kituoko[56] pete, mu puo preiyakezha pete, kecükezha pete rei” si.

⁶Süsie a mia krodi pfhe tuoi, dzü kekra pfhe mu teise sekecü pfhe mhiekecü si, süu shiekhoui di, “Haleluya! Niepuu, Kuokejokejü Ukepenuopfü sü dite.

⁷U nei mu u noumvülie khe, di puo bu zayie chülie, Tekuonuou nuyie tei tsote, mu yasapfü dojülieketa la;

⁸puo bu seketuo la linen pfhe kemesa phriephriekecü pie puo tsüwate” si. Linen pfhe sü kemesako kemiatho mhathoko.

⁹Sitse teigeidielieu sie a ki, “Hau thuliecie: Tekuonuou nuyie heu nu vonu di kiekelieko thejakepfütho” si. Siro puo a ki, “Hako Ukepenuopfü die ketho zo” sita.

¹⁰Sitse a puo phi nu zeretsu puo rüsuotuoü sie, sirei puo a ki, “No ci hie! A rei Jisu zhapu zeyakezha, no mu n zeko[57] mhie kituomia[58]puo zo. Ukepenuopfü rüsuolie! Kekreilamonyü Jisu[59] zhapu-ue siedzekesidie kepu ruopfüu zocü la” sita.

¹¹Ae tei kokeshü ngu, sitse gura kekra puo tha! Süu gei ketuo üse Kedietho-u mu Ketho-u üya, mu puo kemezhüu se mia capi chü mu terhü chü tuoya.

¹²Puo mhi-e mi tu keba tuoi, mu puo tsü gei keditsüre kekra pfütuo, siro puoe theza puo thupfütuo, puo rübei sie mia kekreimia puorei si mo.

¹³Puoe thezie pie dakecü pfhenei rütshusekecü[60] puo se, mu puo za Ukepenuopfü Dieu.

¹⁴Tsiu teigei rüpfhünuoko linen pfhe mu gura rei krakecü se puo siemedzi tuo.

¹⁵Puo bu se seyieko duketuo la puo me nunu zhiecha puoü hekecü puo par, mu puo thegithe se di süko mho dituo[61] tsiu puoe khube kegebou nunu Kuokejokejüu Ukepenuopfü noupfhüu kemeriekecüu kedewatuo.

¹⁶Puo pfheneiu mu puo do geinu theza puo, “kediko mho Kediu mu niepuko mho Niepuu” icü thupfütuo.

¹⁷Süsie a teigeidielie puo niaki nu tha di ngu, ru puo melie peto phi di sie teigei pruoketuo perako ki, “Vorlie, Ukepenuopfü he kezhau nu kengu phrelie.

¹⁸Kediko chü, kezhamia chü, kekuomia chü, gurako chü mu süko geiketuoko chü, themia pete chü, mia diemia rei mu kemo rei, kecükezha chü cüketuo la” si.

¹⁹Süsie ae nhachüu mu kijü nu kediko mu uko rüpfhünuoko kengulie di gura geiketuou mu puo rüpfhünuoko ze terhü chütuoü ketha ngu.

²⁰Sitse nhachüu, mu ketijü siedzekesiu, süu mhingu kinu zasiko chüpie nhachüu zasi ngukelieko mu puo miarhi kerüsuoko sekelieu rei sa telie. Sidi sünie perhei kelhoupie mitsie tukezhü mizieu nu shüwa.

²¹Mu keshako we gura gei kebau tie nunu zhiecha kepar-u pie dukhriwa. Sidi pera peteko süko chü cü kenyüde cülie.