Read Angami Naga Pesikeshü 20 Bible Online

Pesikeshü 20 - Angami Naga bible

Pesikeshü 20

¹Süsie a teigeidieliemia puo puo dzie nu thekhe kesoutho cabiu mu thegiro kemesi puo se di teigei nu kerkezhü ngu.

²Sidi puo tinyhüu, thiedzü tinyhüu, süu Terhuokesuou mu Satan-u telie di teicie nyie puo puo phapie bawata,

³sidi puo kelhoupie thekhe kesoutho nu shüwa, siro teicie nyie puo tseita kemochie puo bu seyieko se sa molieketuo la süu khawa mu mohor rei vüwa. Hasie puotei keduo yopuo la puo phrei lashütuo.

⁴Süsie a kediba kro puo ngu ru süko gei kebako bu mia nyie pepiketuo la kekuopie tsüwa. Siro a Jisu zhapuu[62] mu Ukepenuopfü dieu la mia bu u tsü ziekewa ruopfüko rei ngu. Sükoe nhachüu morei süu miarhi rüsuo mo mu süu zasi rei u teikhie gei mu u dzie nu vü mo. Süko rhei lalie di Khrista ze teicie nyie puo kedi chü.

⁵(Kesia keshako teicie nyie puo tseita kemochie rhei lalie mo.) Hauha rheilakesie therieu.

⁶Kehoupuorei rheilakesie therieu nu u ya kenyimia mesa mu thejakepfütho. Kesia kenieu süko mho puo kekuo jüte, süko bu Ukepenuopfü mu Khrista zievoko chü di teicie nyie puo puo ze dituo.

⁷Siro teicie nyie puo tseita tse, kediekiu nunu Satan phrei lashütuo

⁸mu puo kijü ke diako nu cüreketuo seyie neiüko selietuoü tuo pratuo, süu Gog mu Magog zo, mu terhü kegeiketuo la süko pfhü kengulietuo; mu süko krapie dzükezha khie theshünyo tuoi.

⁹Siro ukoe kijüu pfüthe vo kemesako razhüchüu mu nadi u keneitho-u houpfülie. Sitse teigei nu[63] mi tetsur di süko peka phrewa.

¹⁰Mu terhuokesuou, uko sewaketau kelhoupie mizie mu mitsie nu shüwa, sünu nhachüu mu ketijü siedzekesiu rei ba, sünu teizeiteiso telhekechachie uko pechütuo.

¹¹Süsie a kediba kekra kezha puo mu sügei mia puo keba ngu, kijüu mu teiu puo mhingu kinu tata, mu unie la thechü ngu salie mota.

¹²Sitse a kesiamia kecü rei kezha rei kedibau mhodzü tha di ngu, süsie leshüdako lhalie. Mu leshüda kekrei puo rei lhalie, süu kerheiprü leshüdau. Siro kesiamiako mhatho, leshüdako nu thupiekezhüu medzi di uko nyie kecü.

¹³Siro dzükezhau kesiamia puo nu ketuoko khashü, tsiu kesia mu Hades rei unie nu ketuo kesiamiako khashü, sidi themia pedekejüko u mhatho kheki sü chü u dienya kecü

¹⁴Süsie Kesia mu Hades kelhoupie mizie nu shüwa. Mizie, hauha kesia kenieu;

¹⁵mu kehoupuorei u za thupie kerheiprü leshüda nu zhükemoko kelhoupie mizieu nu shüwa.