Read Angami Naga Pesikeshü 21 Bible Online

Pesikeshü 21 - Angami Naga bible

Pesikeshü 21

¹Süsie a tei kesa mu kijü kesa puo ngu; tei kerieu mu kijü kerieu jüte ru, mu dzükezhau rei ba sa mote.

²Sitse a nadi kemesau Jerusalem kesau, yasapfü puo ketsopfü di puo nupfuu ki kevo tuoi, teigeinu Ukepenuopfü ki nunu kerkezhü ngu.

³Sitse kedibau gei mhapfhe meyiemeluokecü puo sie, “Harie, Ukepenuopfü pruu themia donu bate. Puo uko Kepenuopfü chü di uko ze lhoutuo; uko puo themia chütuo, mu Ukepenuopfü thuo uko ze batuo;

⁴puo uko mhi nunu mhidzü pete süwatuo. Kesia ba sa motatuo; thekrü mu kekra tsiu kemezhiekecü ba sa motatuo, mha kerieko jüte” isi.

⁵Sitse kediba gei kebau sie, “Harie, a mha pete chü kesawatuoüzhie” si. Süsie rei puo sie, “Hau thuliecie, hako ketho mu pelelie kesü die zokecü la” si.

⁶Süsie puo a ki, “Süu chüwate! Ae Alfa mu Omega, Therieu mu Thelau. Kehoupuorei keterhüu, puoma chü mo di kerhei dzüluou nunu krielieketuo a khashütuo.

⁷Kehoupuorei kuolieyakezhamia mha hako welietuo, mu a uko Kepenuopfü chütuo mu uko a nuonuo chütuo.

⁸Derei u meloukesuoko, kepele kejüko[64], rhuketako, mia kedukhriko, pierüüko, themouyakecüko, terhuorhi kerüsuoko, mu tijüyakezha pete lawe mi mu mitsie tu sei bayakezha mizie zo, süusü kesia kenieu” isi.

⁹Siro teigeidielie thenieko mha khou thenie nu thepe thelako pie tshupfü di piekethako mia puo a ki phir di sie, “Vorlie, a yasapfü, Tekuonuou kimiapfü thashü n kietuo” si.

¹⁰Süki puo ruopfüu nunu a ze kijüthou kezha kerükrie phi puo gei vota, sidi teigei Ukepenuopfü ki nu tsurkezhü Jerusalem nadi kemesau thapie a kie.

¹¹Süu Ukepenuopfü zayieu thuo ziekruoipfü, mu puo kezie ketsie puoma kere, jasperpfü tuoi, mesapie kristal khrüvapfü tuoi zo.

¹²Puo dahou zha mu rükrie, mu puo kharu kerekenie tsiu kharu kerekenieko khieki teigeidielie kerekenie ba phre, mu kharuko gei Israel seyie kerekenieko za thupie zha;

¹³niathutsa kharu se, pesotsa kharu se, pekhrotsa kharu se, mu niakratsa kharu se.

¹⁴Mu nadiu dahou puo mvüdze kerekenie mu süko gei Tekuonuou apostelko kerekenie za ba.

¹⁵A ze kerüchü ketha teigeidielieu[65] nadiu, puo kharuko mu dahouko mejüketuo la suna pie kechü kemejü the puo pie tuo.

¹⁶Siro nadiu kediako ketou phre, puocha rei puozha rei ketou; mu puoe puo theu pie nadiu mejükesie maildo krie kerepengou[66]; puocha puozha tsiu puo rükrie ketou phre.

¹⁷Siro puo süu dahouu rei mejü sie ru, süu thu krie puo di hiediaedia[67], teigeidielieu se mejükecüu rei themia se mejüyakecüu mhie zo.

¹⁸Puo dahouu jasper tsiepfü pie chü, mu nadiu suna rübei se chü, mesapie khrüva tuoi.

¹⁹Nadiu dahou mvüdzeko ketsie puoma kere neiüpfü se ketso; mvüdze kerieu jasper tsiepfü, kenieu safir, seu agat, diau emerald,

²⁰pengou-u onis, sorou-u carnelian, thenieu krisolite, thethau beril, thepfüu topaz, ker-u krisoprase, kerepuou jasinth, kerekenieu amethist.

²¹Mu kharu kerekeniekoe mukut tsiepfü kerekenie, kharu puo mu mukut tsie puopuo, tsiu nadi chaüu suna kemesa se chü, mhangu khrokecü khrüva tuoi zo.

²²A nadi nu rüsuoki puorei ngu mo, kekreilamonyü süu rüsuokiu sü Niepuu Ukepenuopfü Kuokejokejüu mu Tekuonuou zo.

²³Mu nadiu va pezieketuo la niaki morei khrü se morei vi, Ukepenuopfü kesokezie zayieu thuo süu va pezieshüya, mu Tekuonuou sü süu mituu zocü la.

²⁴Kijü nu seyieko puo kezie süu nu tuotuo, tsiu kijü nu kedimiako u zayie se sünu vortuo.

²⁵Puo kharuko khinhie khawalie lho, mu sünu teizei jü.

²⁶Siro mia bu seyieko therhu mu zayie se sünu vortuo.

²⁷Derei mha mesakemo puorei sünu lelie lho, morei thenga thokechüko tsiu tijükecümia rei sünu lelie lho, derei Tekuonuou kerheiprü leshüdau nu u za thupiezhüketako rübei kele zotuo.