Read Angami Naga Pesikeshü 22 Bible Online

Pesikeshü 22 - Angami Naga bible

Pesikeshü 22

¹Süsie teigeidielieu[68] kerheirüu tha a kie, mevapie kristal mhie, Ukepenuopfü mu Tekuonuou kedibau nunu kru par,

²sidi kruse nadiu chaü metsuo nu tsu. Siro kerüu khie lutsahatsa kerheiprü bo ba, mu süu thekhrümetsei puo si vü di teicie puo nu va kerekenie vüya; tsiu süu nyüko se seyie neiüko chü keshürhoya.

³Sünu rüse puorei ba salie lho. Derei Ukepenuopfü mu tekuonuou kediba sünu batuo, mu puo kituoko puo rüsuotuo;

⁴uko puo zie ngutuo, mu uko teikhie gei puo za tuo.

⁵tsiu sünu teizei ba salie lho; uko mitubou morei niaki se morei vi, Niepuu Ukepenuopfü thuo uko kezie chütuo, tsiu uko telhekechachie dituo.

⁶Sitse puo a ki, “Die hako ketho mu pelelie sü, kekreilamonyü siedzekesiko ruopfü Niepuu Ukepenuopfüe mhachü mhataketuoko se puo kituoko[69] pengushütuoü puo dielieu ketseshü” sita.

⁷“Harie, a mhai vorzhie! Kehoupuorei leshüda hau nu siedzekesidie thupieketuoko chüüzeyakezhamia thejakepfütho” si.

⁸A, Johan mha hako si mu nguwe. Mu a mha hako si mu ngucü ki, ae mha hako pie a pengukeshü teigeidielieu phi nu puo rüsuotuoü zere tsu,

⁹derei puo a ki, “No ci hie! A rei n ze n zenuoko siedzekesiko ze, mu leshüda hau nu dieko chüüzeyakezha mia kituo kechümia puo zowe. Ukepenuopfü rüsuolie!” si.

¹⁰Mu puo a ki, “Leshüda hau nu siedzekesi dieko mohor vüwa hie, puotei penuo teiketa la.

¹¹Mhakesuo chüyakecümia bu kesuo chü ba zolie, mu rhukecümia bu rhu ba zolie, mu miathomia bu miatho ba zolie, tsiu kemesamia bu mesa ba zolie” si.

¹²“Harie, A mhai vorzhie; kehoupuorei puo mhatho khekisü chüpie tsüketuo la a zhakhra setuo.

¹³Ae Alfa mu Omega, therieu mu thelau” si.

¹⁴Kehoupuorei u pfhenei menyiwa di kerheiprübo-u nu volie kesümia mu kharuko ze di nadiu nu lelie kesümia thejakepfütho.

¹⁵Derei tefüko mu themouko mu pierüüko mia kedukhriko tsiu terhuorhi kerüsuoko, siro tijükecü mhatho chü u neikezha khe chazoutsa batuo.

¹⁶“A, Jisu, kehouko la zhapu die hau a dielieu ketsepie nieko kishüzhie. A David mieu mu puo yieu, khisemvüu zo” si.

¹⁷Sitse Ruopfüu mu yasapfüe, “Vorlie” isi. Mu kehoupuorei rünyükezhamia, “Vorliecie” silie. Tsiu kehoupuorei keterhüu vorliecie. Kehoupuorei kerheidzüu mengukezhamia methuo di lieliecie.

¹⁸A kehoupuorei leshüda hau nu siedzekesi dieko kesiu bu menuolienuya: Kehoupuorei mha huo pie süko pe ro, Ukepenuopfü rei leshüda hau nu thupie keba thepeko pie puo petuo;

¹⁹kehoupuorei leshüda hau nu siedzekesidieko vawa ro, Ukepenuopfü rei leshüda hau nu thupieketuo nadi kemesau mu kerheiprübo-u geinu puo ya pejüwatuo.

²⁰Mha hako zhapu chükeshüu puya, “Ketho zo, a mhai vortuo” Amen. Vorlie, Niepu Jisu!

²¹Niepuu Jisu ngukemezhie bu kemesako pete ze baliecie. Amen.