Read Angami Naga Pesikeshü 3 Bible Online

Pesikeshü 3 - Angami Naga bible

Pesikeshü 3

¹“Thupie Sardia nu kehou nu teigeidielieu ki keshü: Hako Ukepenuopfü ruopfü thenieko mu themvü thenie kebau ki nu kevor die: “A n mhathoko si; noe rhei keba zau se ba, derei no siate.

²Colie, sidi no n gei keba, siata nyünuo kebau chü kemeteiliecie, n mhathoko Ukepenuopfü mhodzü vi tseikecü a ngulie kemo la.

³Süla no silieketau mu ngulieketau rükraliecie; di süu chüüzelie, tsiu thenou kedilie. No colie mo liro, a kerügumia mhie n ki vortuo, mu no a n ki vorketuo teiu silie lho.

⁴Sirei nie tsierei Sardia nu themia huoyo u pfhenei perhuwa kemo batuo; sükoe pfhenei kekra se di a ze tuotuo ukoe silie kesümiacü la.

⁵Nie kuolie üro, nie rei süko mhie di pfhenei kekra setuo, mu kerhei leshüdau nu nie za vawa lho; sidi a Puou mu puo dielieko mhodzünu nie za phratuo.

⁶Kehoupuorei u nyie kenyimia bu Ruopfüue kehouko ki kepu pfhe rünyüliecie.

⁷“Thupie Filadelfia nu kehou nu teigeidielieu ki keshü: Hako kemesau, ketho-u, David cabi sekezhau, puo khrüshü ro miapuorei khalie kelho-u, khawa ro miapuorei khrülie kelho-u ki nu kevor die.

⁸“A n mhathoko si. Harie, a miapuorei khawalie kelho kikha khrüpie ketha puo khapie n mhodzünu shüshü ho. A n kekuo keduo yopuo keba si, mu si shierei no a dieu se ba mu a za phra mvüta molie.

⁹A Satan sinagog nunu u thuo uü Judamia üya; derei mo, tijüyakezha zo, a uko bu vor n phiki khoutou tsutuo, sitse ukoe a n khrieyakecü silietuo.

¹⁰No kegepfü baliekezha a dieu se bakelie la, kijü nu kelhouko dojüketuo la kemezhiekecü kijü pete nu kevor teiu nu a n rüguolietuo.

¹¹A mhai vorzhie; no mha baketau thezetsa zolie, sitse miapuorei n keditsüreu se setalie lho.

¹²No kuolie liro, a n bu a Kepenuopfü rüsuokiu nu co puo chütuo, sidi n bu mhakipuorei süu tsetalie lho. Sidi a n geinu a Kepenuopfü zau mu a Kepenuopfü nadiu za Jerusalem kesau teigeinu a Kepenuopfü ki nu tsurketuou za thushütuo, mu a za kesau rei thushütuo.

¹³Kehoupuorei u nyiekenyimia bu Ruopfüe kehouko ki kepu pfheu rünyüliecie.

¹⁴“Thupie Laodikia nu kehou nu teigeidielieu ki keshü: Amen-u, dietho mu ketho zhapuu, Ukepenuopfü mhachükeshü bo-u[10] ki nu kevor die:

¹⁵“A n mhathoko si; no meku rei mo, le rei mo. No meku morei lecü we a neituo mu ru.

¹⁶Süla no meku morei le rei mo, di lewicü la, a a me nunu n melouwatuo übate.

¹⁷Kekreilamonyü no sie, ‘A mhanyi, a kruoliete, mu a mhapuorei se sa morei vi’ siya. Sidi no tseütsa, zie se, jütsopfhü, mhiciemia mu methuocümia zeciü siya mo.

¹⁸Mhanyilieketuo la a n bu a ki nu mi pie the kemesakewa suna, siro n kemenga whelieketuo pfhe kekra; mu mha ngulieketuo la n mhi keva daru khrülienu tarhoshüya.

¹⁹A kehoupuorei khrieyakezha khe ruo mu pechü di pethaya. Süla thethochü di thenou kediliecie.

²⁰Harie! A kikha ki tha di kikha ketou thaya; kehoupuorei a pfhe si di kikha khrüshü ro a puo ki le di puo ze hietuo mu puo rei a ze hietuo.

²¹Kuolieyakezhamia, a kuolie di a Puou kediba gei puo ze baketa tuoi a sümia bu a ze a kediba gei balietuo.

²²Kehoupuorei u nyie kenyimia bu Ruopfüe kehouko ki kepu pfhe rünyüliecie.”