Read Angami Naga Pesikeshü 4 Bible Online

Pesikeshü 4 - Angami Naga bible

Pesikeshü 4

¹Hau sie a ngu lakecü teigei kikha puo khrüpie tha! Mu mhapfhe kerie, ketsü pfhe tuoi di a rüchücü si, sidi sie, “Haki khorliecie, sitse a hau sie kedipuo chütuo shicü pie n pekietuo.”

²Sitse vapuonu a Ruopfüu[11] ze thata, mu teigei kediba puo ba, mu kediba gei mia puo ba!

³Siro sügei kebau ngupie jasper mu Karnelia tsie kememhie, mu emerald tsiepfü mhiecü pfhesei japie kedibau houpfü ba.

⁴Mu kediba süu kediba mepfüedia bu houpfü ba, mu kediba süko geinu pehümia mepfüedia, u pfhenei kekra se mu suna keditsüre pfü di ba.

⁵Kediba süu geinu teikemela pfhe mu teikese pfheko par. Siro kediba süu mhodzünu mitu thenie tu ba, süko Ukepenuopfü ruopfü thenieko;

⁶mu kedibau mhodzünu kristalpfü kemhie khrüva dzükezha tuoicü puo zhü. Siro kedibau tsei peteko nu puo mhi thuo tshukecü khunuo kerhei dia ba, puo mhodzütsa mu puo sietsa.

⁷Kerieu ngupie losha tuoi, kenieu ngupie thudo tuoi, seu ngupie themia zie tuoi mu diau ngupie tsüüra pruoketuo tuoi zo.

⁸Siro khunuo kerhei diako gei puo u shü sorourou nyi, mu süko u mhi thuo puo noutsa mu puo mhotsa tshupfü. Teizeiteiso süko temo keli di, Kemesa, kemesa, kemesa, Niepuu Ukepenuopfü Kuokejokejüu, thiedzü rei tsiedo rei mu thiesie vorketuou” ibaya.

⁹Siro khunuo kerheiko zapuzayie, therhu mu kethezie khapie kedibau gei keba telhekechachie rheituoyakezhau tsükeshü ki,

¹⁰pehümia mepfüediako tsu kedibau gei keba telhekechachie rheituoyakezhau rüsuo. Sidi uko keditsüreko kelhoupie kedibau mhodzünu shü di sie,

¹¹“Hie Niepuu mu hie Kepenuopfü, no sü zayie mu therhu tsiu kekuo lielie kesüu zo, no mha peteko chüshücü la, mu n medo la süko tuo mu chükelie zokecü la” iya.