Read Angami Naga Pesikeshü 5 Bible Online

Pesikeshü 5 - Angami Naga bible

Pesikeshü 5

¹Süsie a kediba gei kebau dzie puo zatsanu mohor thenie pie vükecü,[12] mu lutsahatsanu thukecü, leshütshü puo pie keba ngu.

²Sitse teigeidieliemia kuo secü puo shie puo rhiechü di sie, “Supuonie leshütshüu lha le di mohorko biewalie kesü ba ga?” idi pukecü a ngu.

³Mu teigei rei morei kijüu gei morei kijüu khro ketuo miapuorei leshü tshüu hielie morei meholie kesü puorei jüta.

⁴Süki a kra phita, leshütshü süu hieshüketuo morei meholie kesü miapuorei ngulie moketa la.

⁵Sitse pehüko mia puoe a ki, “Kra hiecie; Harie, Juda yiemia Loshau mu David Mieu, kuoliete, süla puo leshütshüu mu süu mohor thenieko hielie vite” si.

⁶Süsie a kedibau mu khunuo kerhei diako donu mu pehüko donu Tekuonuo dukhrikewa tuoikecü puo ketha ngu, puo kia thenie mu puo mhi thenie, sükosü ketsepie kijü nu keshü Ukepenuopfü ruopfü thenieko.

⁷Puo tuo phi kediba gei kebau dzie thezatsa nu leshütshüu pielie.

⁸Puo leshütshüu piekelie ki, khunuo kerhei diako mu pehümia mepfüediako Tekuonuou mhodzü zerepfü zhüta, uko dzie nu übou mu suna khou mhare kethengu thepie tshucü se phre, sükoe kemesako kecha chükeshüko.

⁹Sidi uko tsali kesa puo chü: “No rübei leshütshüu pielie sü, mu süu mohorko lhalie sücü zo, n dukhriwa mu n zie pie Ukepenuopfü la seyie nunu mu die tsiu themia donu mu seyie pete nunu kemesako[13] rhaliete;

¹⁰No uko chüpie kedirüvie puo mu Kepenuopfü lie kechü zievomia chüshüte, sidi uko bu kijüu gei di tuo” si.

¹¹Süsie a meho lashü, ru kedibau mu khunuo kerheiko tsiu pehümiako houpfü ketha, teigeidieliemia kekra pfhe sishü, süko nyie kercü nyie ker mu nyiecü nyie ba.

¹²Tsiu tsali chü u rhiechü di, Dukhrikewa tekuonuou kekuo, mu kinyi mu mhasi mu kekuokeyho, mu therhu mu zayie, tsiu thetshe ngulie kesüuwe” sishü.

¹³Süsie a sikecü khunuo neiüko teigei rei, kijü rei, kijü khro rei mu dzü nu ketuoko rei, mu süko nu ketuo pete rei keli di, “Kediba gei kebau mu Tekuonuou bu, telhekechachie thetshe mu therhu, zayie mu kekuou chüliecie!” sishü.

¹⁴Sitse khunuo kerhei diako sie, “Amen,” isi. Mu pehüko zerepfü zhülie di rüsuota.