Read Angami Naga Pesikeshü 6 Bible Online

Pesikeshü 6 - Angami Naga bible

Pesikeshü 6

¹Süsie a ngukecü Tekuonuoue mohor thenieko puo phreishü, sitse khunuo rheiketuo diako puo puo pfhe teikese tuoi, “Vorlie[14]” icü kepu si.

²A meho sie, ru gura kekra puo ngu! Sügei ketuou theü puo pie; keditsüre puo pie puo tsüwa, mu puo mia penyü mu kuolietuoü di parta.

³Siro puo mohor kenieu phreikeshü ki, khunuo rheiketuo kenieu sie, “Vorlie[15],” idi kepu a si.

⁴Mu sünu gura merieyharacü puo par[16], sügei ketuou bu kijü gei kezekeviu chü setanushü, sitse themiako huoniehuo dukhrituo; tsiu zhiecha kezha puo pie puo tsü.

⁵Siro puo mohor seu phreikeshü ki, khunuo rheiketuo seu sie, “Vorlie[17]” idi kepu a si. Mu puo meho sie ru gura ketei puo par! Mu süu geiketuou dzie nu roshükhou pie tuo,

⁶mu a khunuo rheiketuo diako donu nu mhapfhe kemhie puo sikecü, “Khunhie zhakhra thoulha zharha puo[18], mu khunhie zhakhra berli zha rha setuo,[19] derei Oliv tier mu zu we pekawa hie” si.

⁷Siro puo mohor diau phreikeshü ki, khunuo rheiketuo diau sie, “Vorlie[20]!” idi kepu pfhe a si.

⁸Sidi a meho sie ru gura menyiecü puo ngu! Mu süu geiketuou za Kesia isi, siro Hades puo medzi tuo, sidi zhiecha pekriekecü mu kechükenyü pie dukhrituoü, tsiu nhanu khunuoko se di kijüu za dia za puo mho mha pekaketuo la kekuo pie unie tsüwa.

⁹Siro puo mohor pengou-u phreikeshü ki, Ukepenuopfü dieu mu zhapu dieko la mia bu u dukhriwaketa ruopfüko ruosuobau khro keba a ngu;

¹⁰süko melie u rhiechü di, “Kekuotho Niepuu, mesa mu kethocüu, kichiepuo no kijü nu kelhouko gei u nyiekecü mu khepu lie mo ba zotuo ga?” sishü.

¹¹Süsie pfhe kekra pie uko tsü phreshü sidi uko kituo kechü,[21] mu uko kezeko,[22] uko mhie di dukhriketuoko tseilie kemochie rülei za balienu di uko ki puwa.

¹²Süsie puo mohor sorou-u phreikeshü ki kiükishü kemerie chüta, mu niaki gakhropfhe tuoi teimekie tsiu khrüluo thezie tuoita,

¹³tsiu khriedi bu vor teisei chiedesi mekemoko heriekewa tuoi teigei themvüko rürie kijü tsuta.

¹⁴Siro leshütshü tshükeshü tuoi tei rei ngu mota, mu kijüthouko tsiu kijü rüchütsokemoko pete u tha nunu rüdi phreta.

¹⁵Sitse kijü nu kediko mu mia kekhayakezhako, mu chüpahi mhokezhako mu kenyiko tsiu kekuoko, mu kehoupuorei, kediemia mu kemoko pete vo keciekiko mu kijüthou gei tsiekhieko donu rüshüta,

¹⁶sidi kijüthouko mu tsiekrieko kie di, “Me tsur hie vupfüliecie sidi kediba gei kebau mhingu nunu mu Tekuonuou noupfhü nunu hie kevieshücie;

¹⁷kekreilamonyü sünie noupfhü kere teisozhau vorte, mu supuonie süu hielie vi ta?” ita.