Read Angami Naga Pesikeshü 7 Bible Online

Pesikeshü 7 - Angami Naga bible

Pesikeshü 7

¹Süsie a teigeidieliemia dia kijü kediako nu teikhrie bu kijüu morei dzükezhau morei seiboko puorei hewa molieketuo la teikhrie diako khapfü ketha ngu.

²Sitse a teigeidieliemia kekrei puo rheituoyakezha Ukepenuopfü mohor pie di niathutsa nu tuo parkezhü ngu, mu puo melie puo rhiechü di teigeidielie diako kijü mu dzükezha pekawalie kevi kekuo pie tsüwaketako kieshü,

³sidi sie, “Hieko bu Ukepenuopfü kituoko[23] teikhie gei mohor vülie kemochie, nieko kijüu morei dzükezhau morei seiboko pekawa hieluocie” ita.

⁴Siro mohor-u pie u teikhie gei vülieketako mia lakh puo di nyie hiediaedia üdi kepu a si, sidi Israelmia seyie pete nu mohor-u vülie:

⁵Juda yiemia zasi vükelie nyie kerekenie, Reuben yiemia nyie kerekenie, Gad yiemia nyie kerekenie.

⁶Asher yiemia nyie kerekenie, Naftali yiemia nyie kerekenie, Manasseh yiemia nyie kerekenie,

⁷Simeon yiemia nyie kerekenie, Levi yiemia nyie kerekenie, Isakar yiemia nyie kerekenie,

⁸Zebulun yiemia nyie kerekenie, Josef yiemia nyie kerekenie, Benjamin yiemia mohor vükelieko nyie kerekenie.

⁹Hau sie a meho lashü ru, miapuorei phrü hulie kelho krodi puo tuo, süko seyie pedekejüko nu, u seyie pete nu mu themia tsiu die neiünei pete nu, siro u pfhenei kekra se phre mu u dzie nu kukuo co pie di kedibau mu Tekuonuou mhodzünu tha.

¹⁰Mu uko melie u rhiechü di sie, “Kelakelie sü kediba gei keba Ukepenuopfü mu Tekuonuo vie zowe” itha.

¹¹Mu teigeidieliemia pete kedibau mu pehüko mu khunuo rheiketuo diako houpfü tha, sidi ukoe kedibau mhodzünu zerepfü di Ukepenuopfü rüsuo,

¹²Sidi tsali chücü, “Amen! Theja mu zayie tsiu mhasi mu thetshe mu therhu, mu kekuo, mu niepu kechü kechachie Ukepenuopfü vie, Amen” si.

¹³Süsie pehüko mia puo sie a ki, “Pfhenei kekra seketuo hako suomia ga? Mu uko kirapuonu vor ga?” si.

¹⁴Sitse a puo ki, “Kepethau, hau sikecü sü no zo” sishü. Sitse puo a ki, “Hako mia bu u pechüpenyü phikewa nunu vorwe; uko u pfheneiko Tekuonuou zie nunu u pfheneiko menyi pekraliete.

¹⁵Mha hau la ukoe Ukepenuopfü mhodzü thaya, sidi teizeiteiso puo rüsuoki nunu puo rüsuoya, mu kediba gei kebaue uko yalietuo.

¹⁶Ukoe merü salie lho, mu terhü rei sa lho; niaki uko thelie lho, morei kele puorei uko phie pechülie lho;

¹⁷Kekreilamonyü kedibau metsuo nu keba Tekuonuou bu uko kepfheu chütuo, mu puo uko chatha ze kerhei dzüluou nu votuo, Ukepenuopfü thuo u mhi nunu uko mhidzü süwatuo” isi.