Read Angami Naga Pesikeshü 8 Bible Online

Pesikeshü 8 - Angami Naga bible

Pesikeshü 8

¹Siro Tekuonuou zasi thenieu phreikeshü ki, teigei bavüdo puotie mese kemekrie bata.

²Mu a teigeidieliemia thenie Ukepenuopfü mhodzünu ketha ngu, tsiu ketsü thenie pie uko tsüshü.

³Sitse teigeidieliemia kekrei puo tuo par, mu puo suna pie kechü mharekethengu bou puo pie di phir ruosuobau khieki thata, siro puo bu kemesako pete kecha sa kesalie di pie kedibau mhodzü ki keba suna ruosuobau gei khashüketuo la mia mharekethengu khapie puo tsü phishü.

⁴Mu teigeidielieu dzie nunu mharekethengu thekeshüu, kemesako kecha kechüko sa di khu Ukepenuopfü mhodzünu khota.

⁵Süsie teigeidielieu mharekethengu bou-u pielie di ruosuobau geinu mi pie mharekethengu bou tshulie di kelhoupie kijü nu shüwa. Sitse teise, puo pfhe chü, teimela phriephriei mu kiükishü vorta.

⁶Süsie teigeidielie theniekoe ketsü thenieko khoushütuoü dojülie.

⁷Teigeidielie kerieu puo tsüu khoushü, ru prü mu mi thezie sa kerei di rü kijü tsurta, sitse kijüu se za puo, mu seiboko se za puo thewa, siro nha kepejo pete thewa.

⁸Teigeidielie kenieu puo tsüu khoushü, mu kijüthou tu kemerie chü keba tuoikecü puo kelhoupie dzükezha nu shü.

⁹Sitse dzükezha za se za puo thezie chüta, tsiu dzükezha nu ketuo khunuoko se za puo siata, mu rouko rei se za puo pekawa.

¹⁰Teigeidielie seu puo tsüu khoushü, mu teigei nu themvü kezha puo mitu tuoi di rürie kerüko se za puo mu dzüluo dzüko nu tsuta.

¹¹Themvü süu za “Ciena” isi. Sitse dzüko se za puo ciena chüta, mu themia kekra dzüu la siata, süu pfhüketa la.

¹²Teigeidielie diau puo tsüu khoushü, ru niakiu se za puo mu khrüu se za puo, mu themvüko se za puo pekawa, sidi süko kezie se za puo zeita; sidi teisozha se za puo zie mota mu theva rei sükemhie chüta.

¹³Süsie a meho sie, ru tsüüra puo teimeluo nu pruo di mha pu puo rhiechü di, “Teigeidielie kekrei seko u tsü khoushütuoüzhie mu kijü gei lhouketuoko we ce, ce, ce, chülietie!” isi.