Read Angami Naga Ruth 1 Bible Online

Ruth 1 - Angami Naga bible

Ruth 1

¹Thiedzü capiko bu mhakekhakecü teiki, rüna nu pekrie vorta, sitse Juda nu Bethlehemmia puoe puo kimia mu puo nuonuo thepfumia kenie sa di Moabmia kijü nu vo di lhou tuota.

²Mu themiau za Elimelek, puo kimia za Naomi, siro puo nuo thepfunie za Mahlon mu Kilion; ukoe Juda nu Bethlehem nunu kevor Efratmia. Mu ukoe Moabmia rüna nu vo di sünu lhou bata.

³Derei Naomi nupfu Elimelek siata, sidi Naomi bu puo nuo nie ze themita.

⁴Tsiu unie Moabmiapfü lie phrelie; mia pfü puo za Orpa mu kekreipfü za Ruth. Derei uko teicie ker sünu bakelie sie,

⁵Mahlon mu Kilion unie rei siata, sidi Naomi-e puo nuonie mu puo nupfu rei tuo mota di lhou.

⁶Siro puoe Moab kijü nu keba ki Jihovae kecüca pelhoupie puo themiako tsüshü bata ükecü sishü tse, puo miepfünie ze di puo rüna nu la votatuoü dojülie.

⁷Sidi puoe puo miepfünie ze di uko lhou keba rünau nunu tuota, mu ukoe Juda kijü nu votatuo üdi cha nu vozhü.

⁸Ru Naomi-e puo miepfünie ki, “Nnie kenienie rei nnie zuonuo ki la votacie. Mu nnie kesiamia gei, tsiu a gei chükeshü tuoi Jihova bu nnie gei tseiüvishülie.

⁹Siro Jihova bu nnie mia puopuokecü gei nnie nupfunuo kekrei kinu kerülei khashükelieu chüliecie” sishü. Sidi puoe unie meboshü tse, unie krakhouita.

¹⁰Sidi unie sie puo ki, “Mo, hienie n ze n themiako ki votatuolie” sita.

¹¹Sirei Naomi-e sie, “Lata zoyi, a nuopfünie, nnie kiüdi a ze votieyamu? Nnie nupfunuo chülieketuo a va nu thepfumia ba saluoü memu?

¹²Lata zoyi, a nuopfünie, nnie thuo nnie kitsa la votayi, u nupfunuo puo nyi laketuo la we a tsathorte. Mhanuü ae kemerü baluo ücü le sie zo rei, mu mhanuü tsiezhü a nupfu nyilie di thepfunuomia penuolie zorei;

¹³nnie unie zha siekelie pfhelietuo nyü? Nnie nyhü mo di sünie pfhe balietieya nyü? Mo zolie, a nuopfünie sizomonyü nnie la a noukemezhiekuote, kekreilamonyü Jihova dzie-e sie a petsou baketa la” sita.

¹⁴Sitse unie pfhephra di krakhoui lata, süsie Orpa-e latatuoü puo niapfü meboshü derei Ruth we puo siemedzita.

¹⁵Sirei Naomi-e sie puo ki, “Harie, n siezepfüe puo themia mu puo rhuoko ki la votazhie; mu no rei n siezepfü medzi votayi” sita.

¹⁶Derei Ruth-e sie, “A bu n khawanu morei n siemedzi hienu a ketshü sa hietacie! No kirapuo votuo shi, a rei süra vo zotuo; tsiu no kirapuo batuo shiü a rei sünu ba zotuo. N themia pie a themia chütuo, tsiu n Kepenuopfü pie a Kepenuopfü chü zotuo.

¹⁷No kirapuo nu siatuo shi, süra nu a rei siatuo, mu süra nu a khru zotuo. Kesia thuo n kinunu a chükhowa zotuoü mo ro, Jihova bu sükemhie tsiu sükezie rei chüpie a gei shü üthienyü,” sita.

¹⁸Ruth-e puo ze vota zotuoü le terütakecü Naomi ngushü tse, puoe mha pu sa mota.

¹⁹Sidi unie-e Bethlehem nu tsolie kemochie tuo vor. Tsiu unie Bethlehem nu vorlie tse, rüna nu themia pete unie dze kepu bouta; sidi thenupfükoe sie, “Hapfüha Naomi zo memu?” sita.

²⁰Sitse puoe uko ki, “A üse Naomiü[1] hietacie, a üse Mara[2] üliecie, kekreilamonyü Kekuotho-u[3] a bu kemezhie hi vorte.

²¹A ketshu chü di pra, derei Jihova a bu methuo di a ze la a kinu vor. Kiüdi a üse Naomi üdi kielietuo mu? Jihovae a pechü phishüte, mu Kekuotho-ue kekakemhe se a tsüshüe” sita.

²²Sümhie di Naomi-e Moab kijü nunu la vorta; tsiu Ruth, Maobpfü, puo miepfü sa puo ze vor. Mu unie-e barli re sede baketa ki Bethlehem nu vorlie.