Read Angami Naga Ruth 2 Bible Online

Ruth 2 - Angami Naga bible

Ruth 2

¹Tsiu Naomi nupfu kinumia mhanyi phikecümia puo, Elimelek chienuomia puo ba, mu puo za Boaz.

²Khunhie Moabpfü Ruth-e Naomi ki, “A bu suomia nei chülietie shiü sümia lie nu tsu di sie pfhücie” sita. Naomi-e puo ki, “Tsulie, a nuopfü” ishü.

³Mu puoe tsu. Sidi puo vor liekereko sietsa nu sie pfhütuo. Mu puoe vor Elimeleknuo kinumia Boaz lie nu tuocü ngulie.

⁴Siro süteiki Boaz-e Bethlehem nunu vor. Sidi lie kereko ki, “Jihova bu nieko ze tuoliecie” sishü. Sitse uko rei sie puo ki, “Jihova bu ja n ketsüu chücie” ilashü.

⁵Sitse Boaz-e puo liereko kemeho kituou ki, “Hapfüha suomia rüü ga?” isi.

⁶Sitse liekereko kemeho kituou puo ki, “Hapfüha Moab kijü nunu Naomi zekevor Moabmiapfülie.

⁷Sitse hapfü sie, ‘A n ki chayalie, a ngumezhie di a bu liekereko sietsa nu sie pfhülieyi’ sitelie. Sidi puoe vor, mu tsienu rüleikelieu zomoü khise nu tsie ketso mhachü temo tha zo,” sishü.

⁸Sitse Boaz-e sie Ruth ki, “A nuopfü, no a die siliecie, mia kekreimia lie nu vo sie pfhü hiecie, morei hanunu tuota hiecie, derei haki a zetuopfüko penuo baliecie.

⁹Siro liekereko meho di a zetuopfüko sie nu tuolie, mu a khriesako bu n kebvü suo ükecü pushüwate ho. Mu no terhütaü mha ro, vo di khriesako dzüü se vor keba mhabouko nunu krielieliecie” sishü.

¹⁰Sitse puoe puo zie pesulie di nuke kijü tsuta, di sie puo ki, “Kiüdi a nie n mhinguki n khriepfü hade chüliete shi, no a rüli lekecü ha, a sü solhimiapfü puo ze mu,” isi.

¹¹Siru Boaz puo ki, “N nupfu siaketa yawinu no n niapfü gei kedipuo puo chüshü shiü, siro kimhiei zo di n puo n zuo tsiu n kepenuo rüna vawa di no thiedzü si mo zokecü themiamia ki vorte shicü thapie a kie phreshüwate.

¹²Jihova bu no mhatho chükeshü pete la n zhakhra chüshücie, tsiu Jihova Israel Kepenuopfüu, no puo shükhro vor rüzhülieketau bu n zhakhra chü tseishücie” sishü.

¹³Sitse Ruth-e sie, “A niepuu, a bu n khriepfü seilie üthienyü, a sü n kituopfüko puorei ze ketou mo zorei noe die kevi pupie n kituopfü nou thupeluoshüte eru” sishü.

¹⁴Siro mhakecü tei vor tse, Boaz-e puo ki, “Hatsa vorlie, mu niekhrüda pielie di kekhrodzü nu se cülie” sishü. Sidi hapfüe ke liekereko ze balie tse, puoe lhako kethuokecü rei khapie puo tsüshü, mu puoe süko cü pevükelie sie rei pesha salie.

¹⁵Süsie hapfüe sie pfhütuoü sieta tse, Boaz diekhashü di puo liekereko ki, “Puo vo liekhro donu siepfhü zorei puo ruo hiecie,

¹⁶sizomonyü liekhro nu telhakre zorei petepie zhüwaliecie, puo bu süko pa kengulieketuo la, mu miapuorei bu puo kerhie hiecie” sishü.

¹⁷Sidi Ruth-e khinhie nu theva ketso sie pfhü kengulie. Sidi pfhükelieko nyülie, mu barli efa puo meseta.

¹⁸Mu puoe süko toupfü rüna nu vorlie, mu puo niapfüe puo kidepuo toupfü vorlie shiü ngushü. Sizomonyü puo khinhie nouva cü kepeshako rei se par puo niapfü tsüshü.

¹⁹Sitse puo niapfü sie puo ki, “No thie kirapuonu mhachü ga? Suomia lie nu sie pfhü ga? N rüli lekeshüu bu theja kepfüu chücie” sishü. Süla puo sie, “A puo lie nu sie pfhü pfüliekecüu za Boaz lie” idi se puo niapfü ki pushü.

²⁰Sitse Noami-e sie puo miepfü ki, “Jihova bu ja phipie Baoz tsücie, mu Jihova bu japie kesiamia mu kekreimia gei tseiüvikeshümia tsücie,” sishü. Tsiu Noami sie puo ki, “Themia süu u chienuomia, u ze kepenuo perekecümia zo[4]” sishü.

²¹Sitse Moabpfü Ruth-e sie, “Puoe a ki pu sa di, ‘Lie re tseilie kemochie no a liethoko ze bataliecie,’ silie” ishü.

²²Tsiu Naomi-e puo niapfü Ruth ki, “No puo kituopfüko ze vokelieu n la vikuotuo, kekreilamonyü kekreimia lie nu tsu ro mia n pesewa rei silie lho mu” sishü.

²³Süla thoulha mu Barli lieyie tei tseita kemochie Ruth-e Boaz kituo rüüko ze bata, sidi Ruth-e puo niapfü ze lhou bata.