Read Angami Naga Ruth 3 Bible Online

Ruth 3 - Angami Naga bible

Ruth 3

¹Süsie khunhie puo niapfü Naomi-e puo ki, “A nuopfü, a n bu lhou n neiketuo la kerülei puo pfhüshü morosuote.

²Siro tsie Boaz, no puo kituopfüko ze ketuou u seyiemia zo. Harie, tsiezhü puo shienu telha hetuoüya.

³Süla no dzü rüluwa di tier pie n kenhelie, siro n pfhenei kevithoko chü selie di tuo shieu nu leliecie, derei puo bu mhacümhakrielie kemochie no supfü puo shikecü puo bu siwa hiecie.

⁴Mu puo zhüketuo chüu si balie; di puo zhüta tse, ke di puo phi hieshülie di süki zhüliecie; sitse puo n bu kedipuo chü morosuo shikecü n ki pushütuo ho” sishü.

⁵Sitse Ruth-e sie puo ki, “No a ki kepu peteko chü zotuo” sishü.

⁶Sidi puo shieu nu tsulie, mu puoe puo niapfü puo ki kepu pete chülie.

⁷Siro Boaz-e mhacümhakrielie di puo nou puo neilie, sidi telha kengupie kezhü phiki tsu zhüta. Sitse Ruth-e pesikhuoi ke puo phi hieshü di süki zhüta.

⁸Süsie khisoteiluo ki mhapuo themiau kerieshü, sidi puo rükhepa tse thenumiapfü puo puo phi ki zhücü ngulie.

⁹Sitse puoe sie, “No supuo ga?” ishü. Ru puo sie, “A n kituopfü Ruth lie; süla n pfhetie kelhapie a wheliecie, kekreilamonyü noe a kinumia kepenuotho[5] puota zeru.”

¹⁰Sitse puoe sie, “A nuopfü, Jihova bu japie n tsücie; kekreilamonyü noe therieu kirei tsie n kedietho thakuoshüte, mu noe khriesamia puo thuo mhajü rei nyi rei süko siemedzita mokecü la.

¹¹Süla a nuopfü, tsie no michie hie a n kecha pete chüshütuo; kekreilamonyü a rüna nu themia pete rei no thenu kemiathopfü puo zokecü si batakecü la.

¹²Siro ae n seyie kepenuomia zoükecü ketho zo, sirei a ki n penuokuokecü n seyiemia puo baluo.

¹³No tsiezhü pfhe baliecie, mu khise puo n gei keseyiekecü[6] mhatho-u chüshütuoü ro, vi zo, puo bu süu chüshülie. Mhanuü puo n gei keseyiekecü[7] mhatho-u chülie lho ro Ukepenuopfü rhei ketuo tuoi a n gei keseyiekecü[8] mhatho-u chüshütuo. Süla tsie teisolie kemochie haki zhü zoliecie” sishü.

¹⁴Sidi Ruth-e teisolie kemochie puo phiki zhüzhü, derei puo teisotie mhangu pevi kemo nu sieta, kekreilamonyü Boaz-e sie, “Miapuorei bu thenumiapfü puo shieu nu vorzhükecü si hiecie,” iketa la.

¹⁵Siro Boaz-e puo ki, “No dzie keba pfheu se a ki vorshülie di teshü kelha thalie,” sishü. Mu puoe süu teshü thalie tse, Boaz-e telha zharha sorou medoshü di hapfü bouka gei shü, sidi puoe rüna nu vota.

¹⁶Puoe kinu vorlie tse, puo niapfüe puo ki, “A nuopfü no kimhiei ro?”[9] idi ketso. Sitse puoe themiau puo gei kedipuo chüshü shikecü pete se puo ki pu di

¹⁷sie, “Puoe barli lha zharha sorou hako khashü di a ki, ‘N bu methuo di n niapfü ki la volie lho’ itelie” sishü.

¹⁸Sitse Naomi-e sie, “A nuopfü, n nou jü di pfhe balie, kedipuo kemhiei vortie shi silie kemochie, kekreilamonyü puoe thie mhatho-u chü tseilie kemochie themiau rüleitalie lho” sita.