Read Angami Naga Ruth 4 Bible Online

Ruth 4 - Angami Naga bible

Ruth 4

¹Siro Boaz-e kharuu nu khorlie di sünu balie tse, harie puo pukeba keseyiekecüu[10] vor. Sitse puoe sie, “Yha! a zeu no haki vor di balie” sishü. Sitse süue puo ki vor di ke balie.

²Siro Boaz-e rüna nu phichüko mia ker kielie di uko ki, “Haki baliecie” sishü. Ru uko ke balie.

³Sitse puoe sie puo ze keseyiekecüu[11] ki, “Moab nunu la vorketapfü Naomi-e úko siezeu Elimelek vie lietsa puo ze tieyalie.

⁴A hau n ki putuoü ba: No haki kebako mu a rüna nu phichüko mhodzünu hau khrü nyü ro khrüliecie. No süu rhalietuoü ro, rhaliecie, derei moü liro a ki pushü di a bu rhaliecie; kekreilamonyü no süu rhaketuo niepuu zo, mu n sieu sü a zo,” sita. Sitse themiau sie, “A süu rhalietuo,” sita.

⁵Sitse Boaz la sie, “No Naomi mu Moabmiapfü Ruth unie dzie nunu kijüu khrükelie nhie, kesiamia kayie za khapie balieketuo la kesiau kimiapfü sa khrülie morosuo,” sishü.

⁶Sitse themiau sie, “Sita liro a süu rhalie kenjü, a a thuo a kayie[12] kebvükewa prei-e ru. No n thuo a mese nu süu rhaliecie, a süu rhalie kenjücü la” sita.

⁷Süteiki Israelmia donu rhakelie mu kedzieyiekecü mhatho zasi thezho puo chüya: mu süu mha zekeshüue puo phikou rhuolie di pie kekhrüu tsüshüya; mu hau Israelmia donu zhapu kechü zho puo.

⁸Sidi keseyiekecüue Boaz ki, “N thuo süu khrüliecie,” sita, sidi puo phikou lhoushü.

⁹Sitse Boaz-e sie phichüko mu themiako ki, “Ae thie Naomi dzie nunu Elimelek, Kilion mu Mahlon vie pete khrülieketa niekoe zhapuko zo.

¹⁰Sizomonyü ae Mahlon kimia Ruth, Moabpfü rei khrülie di pie a kimia chüliete, süusü puo kayie geinu kesiamia za pie balieketuo la, tsiu kesiamia za bu puo siedzüriemia donu, mu puo keba kharu nunu jüta molieketuo la. Hako pete la thie niekoe zhapukote,” sishü.

¹¹Sitse phichüko mu kharu nu kebako pete sie, “U zo, hieko hau kengu zhapukote eru, Jihova bu n kinu kevor thenupfü chüpie Rachel mu Leah unie-e Israelmia kiu chükeshü mhiekelieu chüliecie; Efratha nu n nuonuo pelhoulie mu Bethlehem nu n za kemeyieu chüliecie,

¹²tsiu Jihova bu thenu hapfü geinu n seyie pelhoushü di n kiu bu Perez kiu Tamar-e penuopie Juda ketsü kemhieiliecie,” sishü.

¹³Sidi Boaz-e Ruth lielie di pie puo kimia chüta. Siro unie keze lhoulie tse Jihova japie puo tsüshü, mu puo nuonipfülie di thepfunuomia puo penuolie.

¹⁴Sitse thenupfükoe Naomi ki, “Jihova bu thetshekepfüu chücie, puoe thie ketso rei n seyie[13] pejüwa mo, mu puo bu Israelmia donu meyiemeluo tuokelieu chüliecie!

¹⁵Puoe n kerheiro chü kesa lashü mu no tsaketa nu nourhie kecüu chüliete. Kekreilamonyü n miepfü n khrieyakezhapfü thepfu thenie ki rei vikuocüpfü, puoe n tsunuo puo penuopie n tsüshüte.”

¹⁶Sidi Naomi-e unuoyo chüpie puo merü gei shülie di theke bata.

¹⁷Tsiu puo zanuopfükoe puo zathoshü, di sie, “Naomi la thepfunuomia puo penuoliete ru” idi puo za thopie Obed chüshü; puoe David nuo puou Jese puou zo.

¹⁸Hako Perez nuosenuoyieko: Perez-e Hezronnuo puo,

¹⁹Hezron-e Ramnuo puo, Ram-e Aminadabnuo puo,

²⁰Aminadab-e Nahshonnuo puo, Nahshon-e Salmon nuo puo,

²¹Salmon-e Boaz nuo puo, Boaz-e Obed nuo puo,

²²Obed-e Jese nuo puo, mu Jese-e David nuo puo.