Read Angami Naga Samuel Kerieu 10 Bible Online

Samuel Kerieu 10 - Angami Naga bible

Samuel Kerieu 10

¹Sidi Samuel-e tierpouu chülie di rupie Saul tsü gei shüshü mu puo meboshü di sie, “Jihovae n kenhepie Puo kayie themia Israelko kedi chüliete. Noe Jihova themiako mho kedi chütuo, sidi ngumvümia uko houpfükebako donu uko yalietuo. Mu hau n bu Jihova themiako mho dituoü n kenhekelie zasiu zo.

²No thie a kinunu tuoshü ro no Benjamin kijü tierie ki Zelza nu Rachel mekhruchü khieki nu mia kenie ze kesetuo. Mu unie-e n ki, ‘No gada pfhüketuoko nguliete, sirei harie n puoe gadako dze la puo noumeca monyü n la puo nou kemezhie di: A nuo la kedipuo chü ro vituorümu, sibatelie,’ isituo.

³Süsie no sünunu tuo zo vo Tabor nu phriebo-u tsolie kemochie tuo volie; sitse sünu mia se Bethel nu Ukepenuopfü ki khotuoü ketuoko ze kesetuo, uko mia puo-u temvünuo se, kekreiu niekhrüda se mu seu khubedzü chüzhü sü puo icü setuotuo.

⁴Siro ukoe n kelushü di niekhrüda kenie pie n tsütuo, mu noe süu uko dzie nunu pielietuo.

⁵Sidi no Gibiat-elohim[15] nu vorlietuo, mu sünu Filistinmia chüpahi razhüchü ba. Siro noe rünau care kepenuo ki vorlie tse siedzekesimia kro puo nyarübou, übou, luoü mu bazha keseko bu uko mhodzü rie di thechü kerükrie geinu süko khou di kerkezhü ze keselietuo, mu uko siedzekesidie putuoü di mele u kethelie lho tuota.

⁶Siro Jihova ruopfüu kuo se di n gei vortatuo, sidi no rei uko ze siedzekesidie putatuo, mu no themia kekrei puo chütatuo.

⁷Siro zasi hako n gei vorta liro, süki chü morokesuoko chüliecie, Ukepenuopfüe n ze tuoketa la.

⁸Siro no a mhodzü Gilgal nu kelie, sünu kethe ruosuo mu noune ruosuo chüketuo la a khor di avu keselietuo ho, derei a khor di n bu chüketuoko thashü kemochie zha thenie ketso a pfhe baliecie.”

⁹Sidi puoe Samuel kinu tuotatuoü rüreishü mumetha, Ukepenuopfüe thenou kekrei puo pie puo tsüwata, mu sünhie zasiko pete chü tsei vorta.

¹⁰Sidi unie-e sünunu Gilbia nu vorkezhü ki, siedzekesimia kro puo vor puo ze keselie, ru Jihova ruopfüu puo gei vorta, sidi puo rei uko ze siedzekesidie puta.

¹¹Sitse tsie mhodzü puo kesimiako puoe siedzekesimiako ze siedzekesidie puketa ngushü di huoniehuo üse, “Kish nuou gei chüketa hau kiüte mu? Saul rei siedzekesimia te me?” sita.

¹²Siro sünu mia puoe sie “Siro uko puo supuo mu” sita. Süla “Saul rei siedzekesi chüte me?” icü die hau pu kemeyieta,

¹³Sidi puoe siedzekesidie pu thewa tse, puoe puo kinu vota.

¹⁴Siro Saulnuo nieu unie ngushü mu unie ketso di, “Nnie kirapuo vo ga?” isi. Siru puoe sie “Gadako pfhütuoü volie, derei hienie süko mhakipuorei tuo ngu mota tse, hienie tuo Samuel ki votelie,” sishü.

¹⁵Sitse Saul nieu sie, “Samuel nnie ki kedipuo pu shiü a ki pushücie,” sita.

¹⁶Siro Saul sie puo nieu ki, “Puoe hienie ki Gadako ngulieketa pulie” isishü, derei Samuel puo ki pukeshü kedikechü dzeu we pie puo nieu ki pu mota.

¹⁷Tsiu Samuel-e themia kie kengupie Mizpa nu Jihova mhodzünu shülie.

¹⁸Puoe uko ki[16], “Jihova, Israel Kepenuopfü hakemhie puya; ‘Ae Ijipt nunu n ze parshü mu Ijiptmia nie pese mu pechüpenyükezha kediko pete dzie nunu nieko kelashü.’

¹⁹Ae nieko ngumvümia dzie nu mu nie kemezhiekecü nunu nie kelashü, derei nieko thie Ukepenuopfü mha kepeka nie gei kevorko mu nie kemezhiekecü peteko nunu nie kelakeshüu meliewate, sidi a ki, ‘Molie kedi puo bu hie mho dicie’ ite. Sizoü liro tsie nie seyieseyie mu chienuochienuo di, nie thuo nie khapie Jihova mhodzünu shüliecie” sita.

²⁰Sidi Samuel-e Israel seyieseyie di ze vorcü ki, Benjamin yieu kedalie.

²¹Tsiu Samuel-e Benjamin seyieu nu kikrukikru di ze vorlie tse, Matrit kikru kedalie. Süsie Matrit kikru nu mia puopuo keda vor ru Kish nuou Saul za nu parta. Derei uko puo pfhü sie tse puo ngu mota.

²²Süla uko Jihova ketso di, “Themiau hanu vor ba mo mo ga?” isie. Sitse Jihova sie, “Co, puo mhadzeko donu rüshü ba ho” sita.

²³Süla uko ta vo puo zelie; sidi puo ze themiako donu vorshü, ru harie puo bouka nunu mia kekreiko pete ki rükrieta.

²⁴Tsiu Samuel-e themia pete ki, “Harie nieko Jihovae kedakelie themiau mehoshüi, themiako donu puo kemhie puorei jü zo die?” si. Sitse themiako shie peto di sie, “Kediu bu rheikechau chücie” sita.

²⁵Süsie Samuel-e kedikechü zhoko, vatsha menuopie themiako kieshü. Sidi puo süko pete pie leshüda nu thulie di Jihova mhodzünu khapie zhüwa. Siro Samuel-e themiako ketsewa di u bu u kinu vo phreta.

²⁶Mu Saul rei Gibia nu puo kinu vota. Siro Ukepenuopfü u melou nyükeshü miavimia kro puo puo ze vota.

²⁷Derei miasuomiaruomia kro puo thuo sie, “Kedipuo mhie di themia hau u kelalie vitie shi?” sita. Sidi uko Saul pese di mhapuorei se vor puo tsü mo. Derei puo kemekrie izo. Siro Ammonmia kediu Nahash-e Gadmiako mu Reubenko pesethor zo. Sidi puoe Israelmia shüphrakeshü bu par kelho la uko mhi u zatsa kerüla phrewa. Sidi Israelko Jordan ciekepra ki, Ammonmia kediu Nahash bu u mhi kerülawa kemo puorei tuo mota. Derei mia nyie thenie Ammonmia dzie nunu talie di Jabesh-gilid nu vota.