Read Angami Naga Samuel Kerieu 12 Bible Online

Samuel Kerieu 12 - Angami Naga bible

Samuel Kerieu 12

¹Siro Samuel-e Israel pete ki pu di sie, “Harie nieko a bu chünukecüko chüshüwate, sidi nieko mho diketuo puo khashüwate.

²Mu tsie nieko kediu bu nie chathatuo. A zowe tsate mu a tsü rei rüpoute, sirei a nuonuoko we nieko ze ba zo. Tsiu a a nhicu nunu vor thie ketso nieko chatha vor.

³Siro harie, a haki ba ba ze, nieko huomia a gei kenyakecü huo nyi me? Jihova mhodzü mu kenhekelie kediu mhodzünu pushüliecie. A mia thudo lielie me? morei huomia gada lielie me? A huomia sewa me? A supuo pesewa ga? morei a supuo dzie nu theso lielie ga? Sikecü huo nyi ro tsie pushülie, siro a tsie süu chükemezhüwatuowe” sita.

⁴Sitse ukoe sie “No hieko sewa mo, morei hie pese rei mo mu mia puo dzie nu rei theso lielie mo” sishü.

⁵Siro Samuel sie, “Nieko a geinu kekrükecü ngulie mo ükecü Jihova mu kenhekelie kediu rei thie a zhapukota zo,” sishü. Siru ukoe sie, “U zo, puo sü u zhapuu zo” sita.

⁶Siro Samuel-e themiako ki pu sa di, “Mosa mu Aron kedakelieu Ijipt nunu nie puonuoko ze parkeshüu sü Jihova zo.

⁷Süla tsie nie tha nu tha zolie, sidi a bu Jihova mhodzünu nu Jihovae nieko mu nieko puonuoko gei kemiatho mhatho kezha chü di nieko kela ze vorkeshü dze pete nieko ki pushüthie.

⁸Jakob mu puo kinuko Ijipt nu tsukelie ki Ijiptmiako uko pese seta, sitse nie puonuokoe Jihova ki rükhruoshü ru Jihovae Mosa mu Aron unie ketseshü, di unie bu nie puonuoko ze par di uko bu thechü hanu lhoulie.

⁹Derei ukoe Jihova uko Kepenuopfü rükra mota, süla puoe uko zepie Hazor rüpfhünuo mhokezhau Sisera tsiu Filistinko mu Moabmia kediu tsüshü di uko bu uko ze terhüchü.

¹⁰Süki ukoe Jihova ki meheimelo di sie, ‘Hieko phoumawate, hieko Jihova khawa di vo Baal mu Ashtarot rhuoko lie chü tuote. Derei tsie ngumvümia dzie nu hieko kelashücie, sitse hieko n lie chütatuolie’ sishü.

¹¹Sitse Jihovae Jerubal, Barak, Jeftha mu Samson uko ketseshü, sidi puoe nie ngumvümia lutsahatsa pete nunu nie shüphrashü di nie bu kemichie kejü nu lhou.

¹²Sirei Ammonmia kediu Nahash vor nieko perhietuoüta ru Jihova nie Kepenuopfüe nieko mho di ba zoü rei nieko a ki, ‘Molie, kedi puo bu hie mho di zocie’ site.

¹³Süla tsiewe harie, niekoe kedakelie kediu mehoshücie, Jihovae kedi puo khapie nieko mho shüshüte ho.

¹⁴Mhanuü niekoe Jihova preilie di puo lie chü, puo dieze, siro puo die khakeshüko petsouta molie liro, tsiu nieko mu nieko mho di kebau rei Jihova rhulie liro mha pete puotou volietuo.

¹⁵Derei mhanuü nieko Jihova dieze mota, mu puo diekhakeshüko petsouta liro, puoe nie puonuoko perhieketa tuoi nieko rei perhietatuo.

¹⁶Süla tsie tha zolie di Jihovae nie mhingu kinu mha kezha chüshütuoü ketha mehoshücie.

¹⁷Thie thoulha lieyie teisozhau moü me? A Jihova kieshütuo, sitse puoe tei bu se mu rüshü, süze niekoe Jihova ki kedi puo chakecü puo mhodzünu phoumathorketa silietuo” sishü.

¹⁸Sidi Samuel-e Jihova kieshü, sitse sünhie Jihovae tei bu se mu rüshü, ru themia pete Jihova mu Samuel preipie mhapuo chüta.

¹⁹Tsiu themia pete sie, Samuel ki, “N kituoko bu siata molieketuo la n Kepenuopfü Jihova ki chacie, kekreilamonyü hiekoe kedi puo cha di hau pie hie kephouma kekreiko chü pekraliete” sita.

²⁰Süki Samuel-e themiako ki, “Michieta hie; nieko mha kesuo chüwata zo, sirei Jihova therhieta hie, derei nie melou pete se Jihova lie chü zolie.

²¹Nieko kemethuo rhuoko sie whuota hie süko mha kevi puorei chüshülie lho morei nie kelashülie lho, sükoe kemethuo zocü la.

²²Jihovae puo die phrashüte, mu puoe puo themiako khawalie lho, Jihova nieko bu puo themia chüketuo puo medoliete.

²³Tsiu a la zo we a bu nieko la cha sei balie mota di Jihova gei jowa hie üthienyü. Siro harie a mha keviu mu kemezhüu thashü nieko pekietuo.

²⁴Jihova khrüprei zolie di nie melou pete se dietho di puo lie chülie. Sidi puoe mha kezha kedithede nie la chüshüte shi leshücie.

²⁵Derei nieko phouma tha zocü sie nieko rei mu nieko kediu rei pekawatuo” sishü.