Read Angami Naga Samuel Kerieu 13 Bible Online

Samuel Kerieu 13 - Angami Naga bible

Samuel Kerieu 13

¹Saul-e kedi chükelie ki puo kelhouzha cie serta,[17] mu puoe cie hiediaekenie[18] Israel mho kedi chü.

²Saul-e Israelmia nyie se kedalie; mia nyie kenie Mikmash nu puo ze ba mu Bethel chazoukhru rüna gei sa, siro mia nyie puo ketsepie Benjamin rüvie Gibia nu Jonathan ze bata. Puoe kekreiko we mia puopuo di ketsepie u thuo u kinu shüwa.

³Tsiu Jonathan-e Geba nu keba Filistin rüpfhünuo kro puo pekawa, mu Filistinko süu sishü. Siro Saul-e kijü peteu nu ketsü khoushü di sie, “Ibriko bu hau siliecie” ishü.

⁴Tsieu Israelmia pete rei Saul-e Filistin rüpfhünuo kro puo penyükewa, mu Israelkoe Filistinko pesekeshü dze sishü, sitse themia kekielie di pete vor Gilgal nu Saul ze thalie.

⁵Siro Filistinko rei Israelko ze kegeituoü di, guragari nyie ser, gurakese themia nyie sorou mu themia krapie dzükezha khie theshünyo mhiei zocü keselie, di ukoe Bet-aven niathutsa Mikmash nu razhü chü balie.

⁶Tsiu Israelmiakoe ngumvümiako uko houpfü keba ngushü tse uko noukemezhieta (kekreilamonyü rüpfhünuo geteiketa la), süla uko vo tsiepfüko nu, keciekiko nu, tsiekrieko nu, mekhruko nu, mu dzükhouko nu rüshü bata.

⁷Mu Ibriko huomia Jordan cie se Gad nu Gilid kijü nu rei vota. Saul we süki zorei Gilgal nu ba zo, mu themiako michie pezo di puo ze bata.

⁸Siürei Samuel-e chiekeshü mhiei puoe zha thenie puo pfhe ba, derei Samuel Gilgal nu vor mota, tsiu Saul themiako rülili di rüzu jü vota.

⁹Süla Saul-e sie, “Kethe ruosuo mu vitho ruosuo se a ki vorshücie” sishü, sidi puo kethe ruosuou khashüwa.

¹⁰Sidi puoe kethe ruosuou khashüwa mumetha, Samuel vor tsolie, mu Saul-e puo kelutuoü puo ki phi.

¹¹Sitse Samuel-e sie, “No kedipuo chüwata ga?” si. Saul-e puo ki, “Themiako khawa di ta sedeketa ngute, siro no rei puotei chiekeshü nu vorlie mote, tsiu Filistinkoe vor Mikmash nu razhü chü baketa ae ngushü,

¹²Süla a, ‘Filistinko tsiemutsie tsur a whuolie vite, mu süki ae Jihova medo rüsa moluo’; idi lete, süla a bu moliekenjü di kethe ruosuo puo chüshüwate” sishü.

¹³Sitse Samuel-e sie, Saul ki, “No kenya mhatho puo chüwate, noe Jihova n Kepenuopfü n bu chünukeshü die khakeshüko zelie mote, no süko chülieücüwe Jihovae tsieha n kedi chüpie Israel mho kechachie bawatuo muru.

¹⁴Derei tsiewe n kedikechü ba salie lhote, Jihovae puo thuo puo noule mhiei di mia puo kedaliete, sidi puo bu Jihova themiako krüta chütuoü bate. Kekreilamonyü noe Jihova die kha n ketsüko chüüzelie moteru” sita.

¹⁵Sidi Samuel-e Gilgal[19] nunu tuota. Siro themiako Saul rüpfhünuo chütuo üdi puo siemedzita; ukoe Gilgal nunu tuo se Benjamin kijü Gibia nu vota. Süki Saul-e puo ze ketuo themiako phrü sie ru süko mia krie sorou tuo.

¹⁶Sidi Saul mu puo nuo-u Jonathan siro themia unie zeketuoko pete Benjamin kijü nu Geba nu bata, mu Filistinko rei, Mikmash nu bata.

¹⁷Siro Filistin rüpfhünuoko mhapekatuoü kro se chü di par, süko kro puo Shual kijütsa Ofra kevotsa,

¹⁸mu kro kekreiu Bet-horontsatie, siro kro seu rayha kevatsa Zeboim razhau kengu tierie chautsa vota.

¹⁹Süki Israel kijü pete nu rükreimia puorei tuo mota, kekreilamonyü Filistinkoe, “Ibrimia bu zhiecha mu rüngou chü suotuo zo” ibaketa la.

²⁰Sidi Israelmia pete rei Filistinko ki tsu di zhie, kathi, seidurü mu zhiepfhinuoko ü chü.

²¹Siro uko kathi mu zhie ü kechü zha shekel se za kenie tsiu seidurü, zhiepfhinuo mu thegithe ü kechü la shekel se za puo pie chü.

²²Sidi terhü chüketuo teisozha nhie Saul mu Jonathan unie dzie nu zo kemosie, unie ze keba rüpfhünuoko miapuorei dzie nu zhiecha morei rüngou puorei ba ngulie mota. Derei Saul mu puo nuou Jonathan dzie nu we ngulie.

²³Sitse Filistin chüpahi-e Mikmash chau ze prata.