Read Angami Naga Samuel Kerieu 15 Bible Online

Samuel Kerieu 15 - Angami Naga bible

Samuel Kerieu 15

¹Siro Samuel-e Saul ki, “Jihovae a ketseshü di a bu n kenhepie Israel mho kedi chüshüte. Süla tsie Jihova dieko rünyüliecie.

²Krodiko Jihovae hakemhie puya, ‘A Amalekmia pechüshütuo, ukoe Israelko Ijipt nunu kepar ki uko cha dze di uko petsoukecü la.

³Süla tsie kho Amalekmia whuocie, sidi uko peka lotsowalie, mhanyamhara pete rei pekawaliecie. Miapuorei pesha hie, thenu thepfu, phichü nhicu mu mithu, tekuo, ut, mu gada pete dukhriwalie’ ” sishü.

⁴Süsie Saul-e puo themiako kie kengupie Telaim nu shülie, mu süko phrü kesie thephi rüpfhünuo mia nyiekrie kenie mu Juda themia nyie ker.

⁵Sidi Saul-e puo themiako ze Amalekko nadi nu khorlie di süu reketuo la razha nunu pfhezhü.

⁶Sitse Saul-e sie Kenmiako ki, “Nieko Amalekmia donunu tuotaliecie, moro a uko pekakecü ki nieko rei sa pekawatuo, Israelko Ijipt nunu kepar ki niekoe uko ngumezhiekeshü la,” sishü. Sitse Kenmiako Amalekko ki nunu tuota.

⁷Sidi Saul-e Havila nunu vo Ijipt kijü niathutsa keba Shur ketso Amalekko biewa.

⁸Tsiu puoe Amalekko kediu Agag perhei telie derei zhiecha pie keshako we dukhri phrewa.

⁹Sidi Saul mu puo themiakoe kediu Agag mu thudo, tekuo nuonuo siro mithu nuo keluoko mu viükecüko pete peshalie, sirei ukoe lie nyü kemo puoma kejüko pete peka lotsowa.

¹⁰Süsie Jihova die Samuel ki vor di puo ki,

¹¹“A Saul pie kedi chükeshü la a rünou mote, puoe a siekemedzi nunu tsiesiete, di a diekhakeshü ze mote” sita. Sitse Samuel-e süu la puo nei mo seta, sidi puoe teizeizha pete Jihova ki kraba tso.

¹²Süsieduü Samuel-e rüna sielie di Saul ze kesetuoü vo, derei mia Samuel ki “Saul-e Karmel nu vo di, sünunu puo za nu kuokelie zasi tsie puo seshü di tuo Gilgal nu tsute” si.

¹³Mu Samuel-e vor Saul tsolie tse Saul-e puo ki, “Jihova bu japie n tsücie, a Jihova diekhakeshüko chü tseiwate” sita.

¹⁴Derei Samuel-e sie, “Siro a nyieto nu tekuo keruo pfhe mu mithu kemo pfhe hako kiüta ga?” sita.

¹⁵Sitse Saul-e puo die kela di, “Ukoe Amalekmia dzie nunu hako se vor, ukoe tekuo mu mithu kevithoko pie n Kepenuopfü Jihova ki ruosuo khashütuoü di peshalie, derei keshako we peka lotsowate” sishü.

¹⁶Samuel sie Saul ki, “Thalie, nzhü Jihovae kedipuo a ki pu shiü a se n ki pushütuo” ilie. Sitse Saul rei sie “Pushüliecie” ishü.

¹⁷Sitse Samuel sie, “No n mhiki n le pecü balie vi, derei no Israel seyie krütau chü ba moü me? Mu Jihovae n kenhepie Israel mho kedi chüshü zo.

¹⁸Sidi Jihovae puo lietho puo la n ketseshü di, ‘Vo kephouma Amalekko peka lotsowacie, uko peka tseiwa kemochie süko ze terhü chücie’ ishüe.

¹⁹Siliro no kiüdi Jihova dieze mota ga? Mu kiüdi kepeka vieko se n medochü di Jihova mhodzü ki mhakesuo hako chüta ga?” sita.

²⁰Sirei Saul-e sie, “A Jihova dieze chü zo, Puo a ketsekeshü mhie a vo di Amalekko peka lotsowa mu kediu Agag teze vorta zo.

²¹Derei rüpfhünuokoe mha pekakelie nu tekuo mu thudo, siro viükecüko pete pieliete, sidi süko se vor Gilgal nunu n Kepenuopfü Jihova ki ruosuo khashütuoüte” sita.

²²Sitse Samuel-e sie, “Jihova pfhe zekecü kirei kethe ruosuo, tsiu ruosuo khakeshüe vikuo üte me? Dieze ruosuo kechü ki vikuo, siro kerünyüe mvüdo keluou ki vikuo;

²³Siro mia petsoukecüe themoukecü kephouma mhie zo, tsiu u nou kekhrüe mha kesuokechü terhuorhi kerüsuomia mhie zo. Noe Jihova die meliewaketa la, puo rei n kedi meliewate” sita.

²⁴Sitse Saul-e Samuel ki, “A phoumawate, a Jihova die mu n die vajowate. A a themiako preiketa la uko medo-u chüwate.

²⁵Süla tsie n ki chaya, a kejo vashü di a ze vocie, sidi a bu rei Jihova rüsuocie” sishü.

²⁶Derei Samuel sie, “A n ze volie lho. No Jihova die meliewaketa la, tsiu Jihova rei n bu Israel mho kedikechü meliewate” si.

²⁷Sidi Samuel tuotatuoü rüreishü tse, Saul-e puo pfhephrie teshüshü ru cierhawata.

²⁸Sitse Samuel-e sie puo ki, “Thie yawinu Jihovae n geinu Israel kedi cierhawate, sidi khapie n zanuomia n ki vikuokecü puo tsüwate.

²⁹Israel zayieu tijü morei rüdirülie lho, puo themia tuoi puo nou rüdirüliketuomia mokecü la,” sita.

³⁰Derei Saul-e sie, “A phoumawate, sizorei a n ki chaya, no a themia pehüko mu Israel mhodzü a rhushü zocie. Tsiu a ze vo di a bu n Kepenuopfü Jihova rüsuocie” sita.

³¹Süla Samuel-e rürei lalie di Saul siemedzi vo, di Saul bu Jihova rüsuo.

³²Süsie Samuel-e, “Amalekko kediu Agag ze vorcie” sishü. Sitse Agag-e michie se di vor, puo lekecü, “Siaketuo preikeba teiu sü vor toute” itha.

³³Derei Samuel-e sie, “N zhiechau geinu thenupfümia nuonuo bie pejükewa tuoi, n zuo rei thenumia donu nuojüpfü chütatuo,” sita. Sidi Samuel-e Gilgal nu Jihova mhodzünu Agag dukhripie khrie phaphawa.

³⁴Süsie Samuel-e Rama nu khota, derei Saul-e Gibia nu puo kinu vota.

³⁵Siro Samuel-e puo se ketso vo Saul ngu la mota, derei Samuel-e Saul la puo nousuo phi. Tsiu Jihovae Saul pie Israel mho kedi chükeshü la rünou mota.