Read Angami Naga Samuel Kerieu 16 Bible Online

Samuel Kerieu 16 - Angami Naga bible

Samuel Kerieu 16

¹Jihovae Samuel ki, “No kedithechie puo Saul la n nousuo batuo ga? A puo bu Israel mho kedi kechü meliewata üro? Tier pie n hiekia tshulie, sidi tuoshülie, a n ketsepie Bethlehemmia Jese kinu shütuo; kekreilamonyü a puo nuoko mia puo bu kedi chütuoü kedapie bate” sita.

²Derei Samuel-e sie, “A kikidi volie ta? Saul-e hau si ro a dukhriwa zotie” sita. Jihovae puo ki pu la di, “No thuünuo yopuo ze volie di sie, ‘A ruosuo chüpie Jihova tsütuoü vorwe’ siliecie.

³Sidi Jese kiepie ruosuokechü nu shüliecie, sitse n bu chüketuou tha n kieshütuo. Noe tier pie ae thakeshüu kenhepie a tsüwatuo” sita.

⁴Sitse Samuel-e Jihova kepu kemhiei chülie di Bethlehem nu la vorlie. Sitse rüna pehükoe pe zo di puo ki vor di sie, “No noune se vorzhü zo mo?” idi ketso.

⁵Sitse puoe sie, “Uwe, noune se di voryawe, a ruosuo chüpie Jihova tsütuoü vorzhüwe; nie chü kemesalie, di a ze ruosuo kechüu nu vocie” sishü. Sidi puo Jese mu puo nuonuoko chü kemesalie di uko kie pie ruosuokechüu nu shü.

⁶Sidi ukoe vorlieta tse, puoe Eliab mehoshü di, “Jihovae kenhekelieu sü Jihova mhodzünu tha toute” isitha.

⁷Derei Jihovae puo ki, “Chazou kenguu mehota hie, morei puo da kerükrie mehota hie, kekreilamonyü, a puo khawate. Jihovae themia mha kemeho mhiei mehoya mo. Themia we chazou miau mehoya, derei Jihovae thenouu mehoya” sita.

⁸Süsie Jese-e Abinadab kieshü, sidi puo bu Samuel mhodzünu tuo phi. Derei Samuel-e sie, “Jihovae hau rei kedalie mote” sita.

⁹Süsie Jese-e Shama bu Samuel mhodzünu tuo phi, derei Samuel-e sie Jese ki “Jihova hakoha puorei kedalie mote” sita.

¹⁰Hai di Jese-e puo nuonuo thepfu thenieko bu Samuel mhodzünu tuo phi, derei Samuel-e sie “Jihova hako puorei kedalie mote” si.

¹¹Sitse Samuel-e Jese ki, “N nuonuo hako rübei zo me?” sidi ketsota. Ru puoe sie, “Tsie rei kemedzütho-u baluo, derei puoe tekuo pfhe tuoyalie” si. Sitse Samuel-e Jese ki, “Mia ketseshü di puo ze vorliecie, mu puo vorlie kemochie hieko ke balie lhote” sita.

¹²Sidi puoe mia ketseshü di puo ze vor, ru harie puochü ngu kemesa, puo mhi zivi mu ngu zhü secü puo. Sitse Jihovae sie, “Sielie di puo kenheliecie, themia hau ho” sita.

¹³Süla Samuel-e tier hiekiau nu kebau chülie di puo dzürieko mhodzünu nu puo kenhelie, sitse sünhie yawinu Jihova ruopfüu David gei kuo phi vorta. Süsie Samuel-e sielie di Rama nu vota.

¹⁴Siro Jihova Ruopfüu Saul geinu lata, sidi Jihova kinu kesuo ruopfü puo vor puo kebilie.

¹⁵Sitse Saul kituokoe puo ki, “Harie Ukepenuopfü kinu kesuo ruopfü puoe n kebi se bate.

¹⁶Hieko niepuu bu die khashü n kituoko tsü di uko bu bazha pe kesimia puo pfhücie. Sitse Ukepenuopfü kinu kesuo ruopfüu n gei kevor ki puo süu peshüshü ro no vilietuo” sishü.

¹⁷Süla Saul-e sie puo kituoko ki, “Tsie vo di bazha pe kesimia puo pfhü se a ki vorshücie” sita.

¹⁸Sitse kituoko mia puoe sie, “Harie a Bethlehemmia Jese nuo puo, bazha pesi sekecü puo ngu, puoe terhü miavimia puo mu kuo se. Puo mhakesi die puya, mu ngu zivi pere zo. Siro Jihova puo ze tuo” sishü.

¹⁹Sitse Saul-e mia ketsepie Jese ki shü di sie, “N nuou David, tekuo pfheyakezhau ketsepie a ki shücie” si.

²⁰Sitse Jese-e Gada puo gei niakhrüda, khubedzüpou puo mu tekuonuo puo se puo pie dashü David tsü di puo ketsepie Saul ki shü.

²¹Sidi David-e Saul mhodzünu vor thalie tse, Saul-e puo ngu puo neithorta, sidi David bu puo rünyie kepieu chüta.

²²Siro Saul-e mia ketsepie Jese ki shü di puo ki, “A David ngu a neithorte, mu puo bu a lietho nu ba zotacie” sita.

²³Siro Ukepenuopfü kinu kesuo ruopfü Saul gei vor puo kebilie ro, David-e puo bazha chüpielie di peshüya; süki Saul-e mecielie di vitaya; tsiu kesuo ruopfü puo geinu pratataya.