Read Angami Naga Samuel Kerieu 17 Bible Online

Samuel Kerieu 17 - Angami Naga bible

Samuel Kerieu 17

¹Tsiu Filistinmiako terhü chütuoü di u rüpfhünuo kie kengulie, sidi Juda nu keba Soko nu kengulie, di Soko mu Azeka donu keba Efes-damim nu razhüchü keselie di bata.

²Sitse Saul mu Israelmiako vo kengulie, sidi Ela razha nu razhüchü di Filistinmia ze terhü chüketuo dojülie.

³Siro Filistinko kijüthou puo gei mu Israelko rei kijüthou kekrei puo gei thalie, mu unie donu razha puo zhü.

⁴Süki Filistinmia razhüchü nunu miavimia puo puo za Goliat, Gathmia puo tuo par, puo cha thu sorou di pfü puo.

⁵Puoe puo tsü gei merenyi tsüre pfü, tsiu thegi boulie puo mesi merenyi shekel nyie pengou mese puo boulie.

⁶Siro puo phinie gei merenyi phiso se, mu puo boukanie donu merenyi rüngou puo khepfü.

⁷Siro puo ngou seiu pfhekedomia jübo tuoi, mu puo ngounyüu mesi thegi shekel krie sorou, tsiu mia puo bu puo zhü pie di puo mhodzü tuo.

⁸Sidi Goliat-e tha zolie di Israelko kie shie di sie, “Kiüdi nie terhü chüketuo la par jiepfü tha ga? A Filistinmia puo moü me mu niekoe Saul kituoko moü me? Nie donu mia puo kedalie di puo bu ker a ze kesecie.

⁹Mhanuü puo a ze kegeilie vi di a geiwa ro, hie nie diechütatuo, derei mhanuü a puo penyüwa di puo geiwa ro, nie hie diechü di hie kituo chütatuo” sita.

¹⁰Siro Filistin-ue sie, “A thie Israel chieyawe! Mia puo khashü di hienie bu kegeicie” sita.

¹¹Saul mu Israelmia pete Filistin-u die sishü tse u dzüzei mu michie pie mhapuo chütataya.

¹²David-e Bethlehem Juda nu Efratmia Jese ükecüu nuo. Jese-e puo nuo thepfumia thetha nyi, Saul kedi teiki puoe phichü di tsatota.

¹³Siro Jese nuo thepfu phichü seko Saul siemedzi terhü nu vota. Terhü nu voketa thepfu seko za; nuorieu Eliab süsieso-u Abinadab mu useu liro Shama.

¹⁴Siro David-e nhicutho. Mu phichütho seko Saul siedzi chütuoya,

¹⁵derei David we puo puo kuo pfhetuoü di Saul kinunu Bethlehem nu la vortataya.

¹⁶Mu Filistin-u teisoduü, mu thevatie metsei teisozha hiedia uko chie.

¹⁷Süki Jese-e sie puo nuou David ki, “Tsie n dzürieko la thoulha kethuokewa efa puo, siro niekhrüda ker hako selie, di ta mhai n dzürieko razhüchü nu tsucie.

¹⁸Siro chis da ker hako se vo uko mho kezhau tsücie, sidi n dzürieko kedipuo mhietuo shiü mehoshü di dielie se vorcie.”

¹⁹Ukoe Saul mu Israel pete ze di Ela razha nunu Filistinmia ze terhüchü ba.

²⁰Sitse David-e khise rüna sielie di puo kuoko pie kuopfhemia puo peleshüwa, puoe mhanyako pfülie, di Jese-e pukeshü mhiei tuo vota. Puoe tuo razhüchüu nu vorlie, mu süki rüpfhünuoko kegeituoü terhüpfhe chü di rüyachü nu pra tha.

²¹Sidi Israelmia mu Filistinmia, rüpfhünuo mu rüpfhünuo kegeituoü dojü se tha.

²²Sitse David-e puo vienya pie mhanya kepfheu dzie nu shüwa, di ta rüyachü nu tsu di puo dzürieko kelushü.

²³Sidi puoe uko ze kerüchü ketha ki, Gath nu Filistin miaviu Goliat ücüu Filistin rüpfhünuo donunu tuo par di hadzü mhiei uko chie lashü. Mu süki David-e puo pfhe si.

²⁴Siro Israelko themiau ngu tse, michiepie mhapuochü di ta phreta.

²⁵Sitse Israelkoe sie, “No themia parkecüu ngushü nhie? Puo Israelmia peseketuo la par zo. Siro puo dukhrikeliemia kediue puo kinyi üse puo chü penyishütuo. Sizomonyü puo nuopfü rei pie puo ki penyituo, mu puo kikru bu Israel nu khezhanuo khruo mo di lhoutuo” sishü.

²⁶Süki David-e puo khieki ketha themiako ki, “Israelmia pese ketha Filistin-u dukhriwa di Israel geinu zhase chükewau gei kedipuo chüshütieya ga? Zhürekemo Filistin-u supuo di puo bu rheiketuo Ukepenuopfü rüpfhünuo peseya ga?” sita.

²⁷Sitse ukoe themiau dukhrikelieu gei kedipuo chüshütuoü shicü puo ki pu lashü.

²⁸Süki puo dzürie phichütho-u Eliab-e puoe themiako ze kerüchü ketha sishü, sitse puoe David gei puo noumeyiethorta di sie, “Kedipuo ca la no hanu tsur ga? Tekuokoyo pie rayha nu suomia peleshüwa ga? N nou kerüzha kemharhükecü a si ba, no terhü kegeikecü mehotuoü tsurcü ze” sita.

²⁹David-e la sie, “A kedipuo chüwa di no haita ga? A mha ketsokeshü ze?” sita.

³⁰Sidi puo rürei kekreiko ki phi di sükemhie pu lashü, sitse themiako khinyhü tuoi puo die kela lashü.

³¹Mu David diepuko si vo Saul tsota, sitse Saul-e David kelieshü.

³²Süki David-e Saul ki, “Mia puo bu rei Filistin hau la puo melou thachüta hie, n kituou vo puo ze kegeituo” sita.

³³Derei Saul-e sie, “No Filistin-u ze kegeilie kenjü, no sü medzü baluo, mu puoe puo khriesa nunu terhümiavi chüsierte” sita.

³⁴Derei David-e sie Saul ki, “N kituoue puo puo kuoko pfhe tuoya. Mu süki Losha morei thega zorei vor tekuoko te seta ro,

³⁵ae süu whuo zo vo telie di dukhriwa mu süu me nunu tekuoyo kela lalieya, siro süu a petsou sier ro a süu meco mezalie di süu teshüpie vü di süu vükhriwaya zo.

³⁶N kituou hamhie di losha mu thega rei dukhriwa mu puo zhü rekemo Filistin hau rei pie süko mhie toushü zotuo, puoe rheiketuo Ukepenuopfü rüpfhünuoko pie kezhase thakecü la” sishü.

³⁷Sidi David-e “Losha dzietse nunu mu thega dzietse nunu a kelakeshü Jihovae Filistin hau dzie nunu rei a kelashü zotuo” sita. Sitse Saul-e sie, “O! siro tuo volie, mu Jihova bu n ze tuokelieu chücie” sishü.

³⁸Sidi Saul-e puo rünyieko khapie David gei shü. Puo puo merenyi tsüre mu thegi boulie pie David bu selie.

³⁹Siro David-e Saul zhiechau pie puo rünyie gei shülie di tuo dojü sie, derei tuolie lhota, puoe süko se mezhie mokecü la. Sitse puoe sie Saul ki, “A hako se tuolie kenjü, a hako se mezhieya kemo la” sita. Sidi David-e süko rhuo phrewa.

⁴⁰Süsie puoe puo the pielie mu rücü nunu ketsie kemeju pengou papie puo kuopfhe likhuo nu shülie mu puo tsiedeiro puo dzie nu selie di Filistin-u mhodzünu phi.

⁴¹Sükisü Filistin-ue puo rünyie kepieu bu puo mhodzü rie di tuo David penuo phir.

⁴²Sidi puo phir tse David ngushü di puo peseta, David-e nhicu ba zoluo mu mephrü mu ngu zivikecü la.

⁴³Süla puo David ki, “No aü tefü üdi kethe se a ki vorzhü me?” sita. Filistin-ue puo rhuoko za se David rüseta. Sidi Filistin-u David ki,

⁴⁴“Haki phirlie, a thie n chüko pie teirako mu lie nu nhachüko vachüshütuo” sita.

⁴⁵Sitse David-e Goliat ki, “No we zhiecha, rüngou mu rünyie se di a ki vorzhie, derei a we Krodiko Jihova no uko peseyakezha Israel rüpfhünuo Kepenuopfüu za se n perhietuoü phirzhie.

⁴⁶Thie teiso Jihovae n khapie a dzie nu shüwatuo, sidi a n biewa di n tsü zielietatuo. Sidi Filistinmia kesiamoko pie teirako mu ketsa nu nhachüko tsüwatuo, sidi kijü pete bu Israel nu Ukepenuopfü puo tuoükecü silietuo,

⁴⁷tsiu haki ketha pete bu Jihovae zhiecha rüngou se morei puo themia kelashüya mo ücü silietuo, terhüu Jihova vie zokecü la, puoe nieko khapie hieko dzie nu shüwatuo” sita.

⁴⁸Süsie Filistin-ue tuo David penuo phir, süki David rei puo ze kegeituoü di ta rüyachüu nu phirlie.

⁴⁹Sidi chakhrie puo dzie se puo likhuo nunu tsierünuo puo chü se par di puo tsiedeiro nunu kedeishü di Filistin-u teikhie pephowa, mu ketsieu zo puo teikhie nu leta, sidi puo te kijü tsu zerepfü zhüta.

⁵⁰Sidi David-e puo tsiedeiro mu ketsie rübei se Goliat penyülie, süu pie Filistin-u pewa mu puo dukhriwa. Mu David dzie nu zhiecha tuo mo.

⁵¹Süsie, David-e ta vo Filistin-u mo gei thalie, tsiu sidi puo bouu nunu puo zhiechau shüzoulie di se Goliat dukhriwa mu puo tsü zielieta. Filistinkoe uko miaviu siaketa ngushü tse, uko tata.

⁵²Sitse Israelko mu Judako sielie di Filistinko whuo zo tsu Gath mu Ekron kharu ketsota. Sidi Filistinmia rüzakelieko Sharaim chau nunu vo Gath mu Ekron chau ketso tetsu zhüta.

⁵³Süsie Israelko Filistinko whuoketuo nunu rürei la kevor ki razhüchüko pete rei peka phrewa.

⁵⁴Siro David-e Goliat tsüu chülie di pie Jerusalem nu vorta, derei Filistinko rünyieko pie puo dzüpfheki nu zhüwa.

⁵⁵Süki Saul-e David Filistin-u perhietuoü di tuoketa ngukeshü ki puoe sie rüpfhünuo mhokezhau Abner ki, “Abner, khriesau supuo nuo ga?” idi ketso. Süki Abner sie, “No rheiketuo mhiei, he-i kediu, a si molie” sishü.

⁵⁶Kediu lasie, “Khriesa hau supuo nuo shikecü ketso se vorshücie” sita.

⁵⁷David-e Filistin-u geilie mumetha Abner-e puo ze Saul mhodzünu vorshü mu süki puoe Filistin-u tsü pietuo zo.

⁵⁸Sitse Saul-e sie puo ki, “Khriesau no supuo nuo dimu?” idi ketso. David lasie, “A n kituou Bethlehemmia Jese nuolie” sishü.