Read Angami Naga Samuel Kerieu 19 Bible Online

Samuel Kerieu 19 - Angami Naga bible

Samuel Kerieu 19

¹Saul-e David biewaketuo rhükeba se puo nuou Jonathan mu puo khro kezhako ki pushü. Derei Saul nuou Jonathan-e David ngu puo neithor,

²süla puo David ki, “A puo Saul-e n biewaketuo le bate ho, süla no soduü n kireiliecie, sidi mharapuo rüshü bataliecie.

³A a puo ze di n keba lieu nunu n la puo ze kerüchütuo, sidi a sikelieko se n ki pushütuo” sishü.

⁴Jonathan-e David kevi dzeko pie puo puo Saul ki pushü di sie, “Kediu bu puo kituo-u David gei phoumawa hie zocie, puo n gei kejo puorei chü mo zocü la, sikecüumonyü puo chükeshüko n la vithor zo.

⁵Puo puo phou khrie mo zo di Filistinko dukhrishü, mu Jihovae Israelko la kuokelie kezha phi khashüe. No rei süu ngu di n nei zo. Di siro kiüdi puoca kejü nu mu kejokejü David dukhri di phoumatieya ga?” sishü.

⁶Sitse Saul rei Jonathan die rünyülie mu rüse zo di sie, “Jihova rheiketuo mhie a puo dukhriwalie lho zo” sita.

⁷Süla Jonathan-e David kielie di mha süko se puo ki pushü. Sidi Jonathan-e David ze Saul ki la vorshü, sidi puoe hadzü tuoi Saul kinu ba lata.

⁸Situo di Filistinko ze terhü tei puo la vorta. Süki David-e vo di Filistinko ze terhü chü. Ru puoe süko re peto seta, sidi uko bu puo mhodzü ta phi.

⁹Derei Jihova kinu terhuo kesuo la vor Saul kebi lalie, mu puoe puo dzie nu rüngou pie ba, siro sükisü rei David-e puo mhodzünu bazha khou keba ki,

¹⁰Saul-e puo ngou peyiepie David tshiepie sozha gei shüwatuoü sie, derei David-e süu rüdalie di rüngouu sozha gei tshiepfü zhata. Sidi süzhü David ki nunu talie di tuota.

¹¹Sitse Saul-e khise David biekewa le di puo themia ketsepie David ki shü di puo la bata. Derei David kimia Mikal-e puo ki, “No tsiezhü talie di n phou kelalie mo liro, sodu n biewatuoü bate ho” sishü.

¹²Sidi Mikal-e khirki nunu David peteshü di puo bu ta pralie di tata.

¹³Sitse Mikal-e terhuomiarhi[24] puo pie thezhü nu zhülie tsiu temvümie kezhüpie tsükhe nu shüwa di pfhe pie whepiezhüwa.

¹⁴Süki Saul-e themia ketseshü di David telietuoü vor tse Mikal sie, “Puo suo batelie” isiwata.

¹⁵Derei Saul puo themiako ketse la di uko bu uko thuo vo David mehoshünu di sie, “Puo zhü nunu puo pie vorliecie, sitse a puo dukhriwatuo mu” sita.

¹⁶Süla uko kinu tuo le ru, terhuomiarhi[25] puo mu temvümie kezipie puo tsü chüpie zhü ngulie.

¹⁷Sitse Saul Mikal ki, “No kiüdi hakemhie chü di a sewa di a ngumvüu bu tata ga?” ita. Sitse Mikal Saul die kela di, “Puo a ki, ‘No a bu talie mo liro a n dukhriwatuo’ sitelie” sita.

¹⁸Siro David-e ta la parlie di tuo se Rama nu Samuel ki vor di Saul puo gei chükeshü pete pie puo ki pushü. Sitse puo mu Samuel unie rüdei se Naioth nu vo lhou bata.

¹⁹Süki mia “David-e Rama nu Naioth nu ba ho” ishü.

²⁰Süla puoe David telietuoü di puo themia ketseshü. Derei ukoe siedzekesi kro puo Samuel bu krüta chü di siedzekesidie pu ketha ngushü tse, Ukepenuopfü ruopfüu Saul themiako gei rei vorta, sidi uko rei siedzekesidie puta.

²¹Saul-e süu sishü tse, puo themia ketse sashü, ru süko rei siedzekesidie pu lata, süsie Saul-e va seu themia kekrei ketse lashü, süko rei siedzekesidie pu lata.

²²Thelatho-u puo thuo Rama nu votuoü tuoshü. Sidi puo Seku nu dzükhou kezhau khieki vorlie di sie,[26] “Samuel mu David unie kirapuo ba ga?” idi ketsoshü. Sitse mia puoe sie, “Harie Rama, kijü nu Naioth nu ba ho” sishü.

²³Süla Saul-e Rama nu Naioth nu vor, siru Ukepenuopfü ruopfüu puo gei vorta, sitse puo Naioth nu vorlie kemochie tuo phi mu phi di siedzekesidie puta.

²⁴Sidi puoe puo pfhenei rei rhuowa di Samuel mhodzünu nu siedzekesidie pu tuota. Sidi puoe sünhie zhate mu teizeizha pete methuozhü tso. Hau la, “Saul rei siedzekesiko donu mia puo me?” idi ketso tuote.