Read Angami Naga Samuel Kerieu 2 Bible Online

Samuel Kerieu 2 - Angami Naga bible

Samuel Kerieu 2

¹Siro Hana-e kechachü sa di sie, “A noue Jihova geinu puo nei bate, Ukepenuopfü[3] geinu a kekuo piesieshüte; a tie-e a ngumvümia ki kuolie vite, a kuokelie nunu a nei baketa la.

²“Jihova kemhie Kemesa Kekrei tuo mo; n rübei sie kekrei jü; Ukepenuopfü kemhie Tsiekrie kekrei tuo mo.

³Kemholiekecü die pu sa hietacie, kemelhacü die bu n tie nunu par sa hietalie; Jihovae kesikele Kepenuopfücü la, Puoe mia mhathoko mejüya.

⁴Miavimiako theü bietshewate, derei meca kemomia kekuo se u chie phaliete.

⁵Ketshukelhuo chükebako niekhrüda la u thuo u khapie zhakhramia chü tuote, derei merü ketuoko we mha vakelieko pie u kelhuo chüliete. Nuojüpfü nuo thenie penuo; mu kekra kebapfü thedzükou bate.

⁶Jihovae biekhrüshü, tsiu chü perhei lashü; puoe mia ze Sheol nu tsu, tsiu se la siershü.

⁷Jihovae chü pejüshü, tsiu chü penyishüya. Puoe huo chü kerünuoshü, tsiu chü kerükrieshü.

⁸Puoe nyophe nunu kejümia phou sesiershü, tsiu mige kepupie keba nunu ketsopfhümia piesieshü; puoe süko bu kedinuoko donu baketuo chüshü, uko bu therhu kayie wetuoü di.[4] Kijüu mvüdzeko Jihova gei bacü la, puoe kijüu chüpie süko gei shü.

⁹“Puoe puo kemesako rüguolietuo derei kerüzhüko we dapie kezei nu shüwatuo, miapuorei puokuopuohie nu thalie lhocü la.

¹⁰Kehoupuorei Jihova kepetsoumia tseütsatatuo; Kerükrietho-u teigei nu teikese tuoishütuo, Jihova kijü vala ketso capi chütuo, puoe puo kediko chü pekuoshütuo, mu puoe kenhekelieu kekuo piesieshütuo.”

¹¹Süsie Elkanah-e Rama nu puo kinu la vorta, derei unuoyo we Eli zievo-u ze Jihova lietho chü bata.

¹²Siro Eli nuonie ziezhü mothorta; unie gei Jihova rhukecü puorei jüta,

¹³tsiu zievomiae themiako gei chüshü kezhüko rei üse mhaü mota; sidi themia kehoupuorei vor ruosuo chü di themuo bekeba ki, zievo kituoue themuo rukecü rata sei puotie pro secü puo pie vor meya,

¹⁴sidi süu se themuo li kehoupuo nu rei shü di themuo rukelie pete zievo-u thuo lielieya. Sidi unie-e Israelmia Shilo nu kevorko pete gei mhatho sükemhie chüta.

¹⁵Sizomonyü chüshuo thekecü mhodzü rei zievo-u kituou vor di ruosuokechü themiau ki, “Zievo-u bu the cüketuo la themuo khashücie, kekreilamonyü puoe n kinu themuo chakewau lielie lho, derei chürhei rübei lietuo” isitaya.

¹⁶Sidi mhanuü themiaue puo ki, “Chüshuo thewa periecie, di süsie nu n thuo pie kenyüde pieliecie,” iliro kituoue sie, “Lie lho, tsie khashüwalie, moliro a thuo n kemvüchü di chülietuo,” itaya.

¹⁷Süla khriesanie kephouma hau Jihova mhiki zhathorta, kekreilamonyü unie-e Jihova ruosuo se kemethuo chüketa la.

¹⁸Derei süki Samuel we nhicu zorei linen efod se puo chie phapfü di Jihova mhodzünu lietho chü baya.

¹⁹Siro teiciekepra puo zuoe puo la boulie kerütshu yopuo chülie di puo nupfu unie ruosuo chütuoü kekhor ki kha puo tsüya.

²⁰Siro Eli-e japie Elkanah mu puo kimia unie tsü di sie, “Jihova bu thenu hapfüe cha di khapie Jihova tsü lakeshüu sou nu nuosenuoyie pelhoushükelieu chücie,” sishüya. Mu unie tuo la kinu vorta.

²¹Siro Jihovae Hana ngumezhieshü, sitse puoe nuonipfülie di thepfumia se mu thenumia kenie penuolie. Siro unuoyo Samuel-e Jihova mhodzünu zhamiemie sielie.

²²Süki Eli-e tsatota. Mu puoe puo nuonie Israelmia pete gei kedipuo chü shikecü pete sishü, siro unie-e kedipuo mhie di dzüpfheki care nu chaliekechü thenumiako zezhüya shikecü dze si phreshü.

²³Süla puoe unie ki, “Nnie kiüdi mha sükemhie chüya ga? A nnie themia hako pete gei mhatho kesuo kechü dze mia kinu site.

²⁴Suotuo zo ho, a nuonie, a Jihova themiako kinu nnie dze kesi thedze kevi mo.

²⁵Mhanuü mia puoe kekreiu gei jowa rei kekreimia puoe kephoumau la Ukepenuopfü ki chalie vi, derei mia puo nie Jihova gei phouma ro supuonie puo zhapu ta?” sishü. Sizorei puo nuonie-e unie puo die rünyü mota. Jihovae unie bu siaketuo puo medoketa la.

²⁶Tsiu Samuel-e phichü miemie sie di Jihova mu themia khrie rei pfülie.

²⁷Siro Ukepenuopfü themia puo Eli ki vor di sie, “Jihovae hakemhie puya, ‘A n puonuo kinumiako Ijipt nu Faro kinu miadie chüketuo ki a thuo a pie uko pengu kemecietsuoishü moü me?

²⁸Ae Israel seyie pete donu puo kedapie a zievo chütuoü, a rüsuoba gei ruosuo khashütuoü, mharekethengu thetuoü mu a mhodzünu efod chiepha se ituoüshü. Siro ae Israelko ruosuokechü vie mi pie thekecü pete pie n puo kinumiako tsüshü.

²⁹Di siro no kiüdi a ki nu ruosuo khakeshü vieko mehou hi zota ga? Siro kiüdi a kirei n nuonie rhukuo di a themia Israelkoe ruosuo khakeshü pete nu kevithoko kedase nie thuo nie chü peluo bata ga?’

³⁰Süla Jihova, Israel Kepenuopfüe puya, ‘A n kinumia mu n puo kinumia bu kechachie a mhodzünu tha di chalie chütuo’; ishü ketho zo. Derei tsie Jihovae puya, ‘Süu bu a kinu pecietacie; a tsiewe a rhuyakezhamia rhutuo, mu a peseyakezhamia se mhatho moütatuokecü la.

³¹Harie puoteiu vorzhie, süki a n kekuo mu n puonuoko kekuo dathewatuo, sidi n kinumia donu ketsamia puo bu rei sierlie lho,

³²sidi no a kiu nunu thedzükekou chü di Israel gei mha kevi theja khakeshüko mehou di mehotuo, mu n kinu zowe miapuorei lhou puotei cülie lho.

³³Siro a ruosuoba geinu chüwa kemo n themiau zorei puo bu puo nou kesuo mhidzü pekru mu puo melou nunu thekrü chütuo, n kikru nu mia pete rei zhiecha se chütuo.

³⁴Siro n nuo Hofni mu Finehas unie khunhie vachü siatuo, mu süu n la zasi puo chütuo.

³⁵Tsiu ae kemiatho zievo puo sesiertuo, mu puoe a kele kemedo mhiei chü di chalie chütuo. Siro ae ki ba toulieketuo puo chüshü puo tsütuo, sidi puoe kechachie a kenhekelieu mhodzü thatuo.

³⁶Siro n kinu peshakelie pete rei vor raka morei niekhrüda yopuo zorei cha di sie, A khapie zievoko mia puo mhatho nu shücie, sidi a bu kecüca huoyo rei ngu cücie’ isituo.”