Read Angami Naga Samuel Kerieu 20 Bible Online

Samuel Kerieu 20 - Angami Naga bible

Samuel Kerieu 20

¹Siro David-e Rama nu Naioth nunu tata. Sidi puo Jonathan mhodzünu vor sidi sie, “A kedipuo chüwata ga? A kejo kicüpuota ga? Siro n puo mhodzü a kephouma kedipuo ba di puoe a kerheiro pfhü tuo zota ga?” sishü.

²Sitse puo sie, “Kenyüthor! No siatalie lho. A puoe mha kezha rei kecü rei se a pesi mo di mhapuorei chüya mo, mu kiüdi a puo mha hau a ki pekhrewatuo mu? Silie kenjü zo!” sita.

³Derei David rei rüse di, “N puoe no a khrieya ücü si pevi se ba ze; mu puoe lecü, ‘Jonathan bu hau silie lho, moro puo puo nousuota rei si mo’ ilie vi. Derei ketho zo, Jihova rheiketuo mhie mu no rei rheiketuo mhie, süu ba zo, kesia hienie donu phicha puo zote” sita.

⁴Sitse Jonathan sie David ki, “No mhakehoupuo pu zo shierei, a süu chüshütuo” sishü.

⁵David sie Jonathan ki, “Sodu khrü sate, mu a kediu ze ba di mhacü morosuo; derei a bu tuotacie, di a bu zha se nhie thevatie ketso a thuo a kevie se batacie.

⁶Mhanuü n puoe a ba moketa si toulieta ro, no sie, ‘David puo nadi Bathlehem nu voketuo la a ki cha beitelie; kekreilamonyü teiciekepra kikru pete keze di ruosuo teiu ütelie’ siwacie.

⁷Mhanuü puoe sie, ‘Viwe’ isi liro süu n kituou la vituo; derei mhanuü puo puo noumeyieta liro, puo mha kesuo rhü baketa siliecie.

⁸Süla n kituou gei tseiüvishücie, kekreilamonyü noe n kituou ze kemesa dietseidiekho[27] puo chüliete. Derei mhanuü kejo huo a gei ba ro, n thuo a dukhriwacie. Kiüdi no a ze n puou ki la votuo ga?” ita.

⁹Jonathan sie, “Süu bu n ze kepecietacie! Mhanuü a puoe mha kesuo süu se n gei vortuoü pepikelie a silieta ro, a n ki pu lhoü me?” sita.

¹⁰Sitse David sie Jonathan ki, “Mhanuü n puo puo nei mo di n die kelata ro supuonie süu se a ki putuo ga?” ita.

¹¹Jonathan David die kela di, “Vorlie, a vu keze lie nu tsu khe” ita. Süla unie keze lie nu vo.

¹²Jonathan sie David ki, “Jihova Israel Kepenuopfü za se puya! Sodu hateiki morei zha se nhie a puo ketsoshü, sidi mhanuü puoe David gei keviu chütuoü ba zo ro, a süu ketsepie morei se n pesilie lhotuo memu?

¹³Derei mhanuüu a puoe n gei mha kesuo chütuoü le bata ro, Jihova bu Jonathan gei sükemhie morei sükezie rei chüshücie, mhanuü a süu se n pesilie mota, mu n ketsewa moro, sidi n bu khrukhrekecüra volie mota ro. Jihova bu n ze tuolie, puoe a puo zeketuo mhiei.

¹⁴Mhanuü a tsie rei rhei ba zo ro, Jihova kekhrie pie a pekieshücie; derei mhanuü a siata ro,

¹⁵n kedietho kekhrieu bu a kiu nunu lata hie zocie, mhanuü Jihova thuo kijüu zie geinu David ngumvümia kehoupuorei dathewa zo shierei,” ishü.

¹⁶Hakemhie di Jonathan-e David kiu ze dietseidiekho chüshü di sie, “Jihova bu David ngumvüko pfhü se parkelieu chüliecie” sishü.

¹⁷Jonathan-e David bu puo khriekecü la rüse la; puoe puo thuo puo kerheiro khriekecü mhie puo khriekecü la.

¹⁸Jonathan sie puo ki, “Sodu sü khrüsa; n rükra batie, n chüu methuotaketuo la.

¹⁹Siro kenuonhie, no tuo zo votacie; no thiedzü rüshü bakelie chüu nu la votacie, sidi ketsieu khieki baliecie.

²⁰A theütsie ciepie mha vakeshü tuoi, tsie se cieshütuo.

²¹Süsie a thepfumia yopuo ketseshütuo, di ‘Vo di theütsieko pfhüliecie’ ishütuo. Mhanuü a thepfunuoyo ki, ‘Mehoshülie, theütsieko n khie hatsa zhü ho, süko chüliecie’ ishü ro, no la vorlie, kekreilamonyü, Jihova rheiketuo mhie, n la khrukhrete mu kemichie ba mote.

²²Derei mhanuü a khriesayo ki, ‘Meholie, theütsieko n tse vote ho,’ ishü ro tataliecie; kekreilamonyü Jihova n ketsepie kepetse nu shüwate.

²³Siro no mu a pukeshüu dzetsa liro, Jihova thuo avu donu kechachie la zhapuu chüshütuo” sishü.

²⁴Süla David lie nunu puo thuo puo kevie se bata. Siro khrüsa vorta tse, kediue theheu nu mhacütuoü kebalie.

²⁵Kediu ke puo ba nu balie, kekrei teiki mhie, sozha khieki bau nu. Sitse Jonathan vor thalie, tsiu Abner-e Saul khieki balie; derei David bau we methuo bata.

²⁶Saul sünhie die yopuo rei pu mo; kekreilamonyü puoe lecü, “Mha puo puo gei vorte mo ki shi; puo mesa mo bata mecie, ketho zo puo mesa mo bate” iba.

²⁷Derei zha kenie nhie khrüsa zhau sie nhie, David chüu methuo lata. Sitse Saul sie puo nuou Jonathan ki, “Kiüdi Jese nuou thehe nu ndu rei thie rei vor mota ga?” ita.

²⁸Sitse Jonathan-e Saul die kela di, “David a ki Bethlehem nu votuoü cha beitelie;

²⁹puo sie, ‘A bu vocie; kekreilamonyü a kikru nadiu nu ruosuo puo chütuoüya, mu a dzürieko a bu sünu ba morokesuo pute. süla tsie, mhanuü a n nei chülieü ro a bu vo a dzürieko mehoshücie’ itelie. Mhaca hau la puo kediu mizhüu gei vorlie mote” ishü.

³⁰Sitse Saul-e Jonathan gei puo noumeyiethor zota. Puo sie puo ki “No mharhikemo thenu puo zhokesuo nuou! No, n thuo thenga chü rei, mu n zuo thuo puo nga whe motuo rei Jese nuou ya ücü a si mo me?

³¹Jese nuou kijü zieu gei rheiketuo chie no morei n kedi rei sedelie kenjücü la. Themia ketseshü di puo ze a ki vorliecie, puo bu sia petuo zotuo” sita.

³²Sitse Jonathan-e puo puo Saul kela di, “Kiüdi puo dukhriwatuoüya ga? Puo kedipuo chüwata ga?” sita.

³³Derei Saul puo biewatuoü puo rüngou peyieshü; süla sünunu Jonathan-e puo puoe David dukhriwatuoü pepi se baketa silieta.

³⁴Sidi Jonathan-e puo nei mo se di mizhü geinu sieta, di thekhrüu nu teisozha kenie nhie mhacü mota, puoe David la puo nousuo phita, mu puo puoe puo bie kethengakeshü la.

³⁵Siro teisolie tse Jonathan-e David ze pethopie keba teiu ze lie nu tsu, mu thepfunuo yopuo puo zetuo.

³⁶Puoe thepfunuoyo ki, “Ta vo di theütsie a ciekeshüko pfhüliecie” sishü. Mu thepfuyo takezhü ki, puo theütsie ciepie süyo mhotsa shüshü.

³⁷Siro thepfuyo Jonathan theütsieko teketsu chüu tsolie tse, Jonathan thepfuyo kie la di sie, “Theütsieko n tse vota mo me?” sishü.

³⁸Jonathan thepfuyo kie di, “Mhailie, rükrilie, thata hie” sishü. Sidi Jonathan zeketuo khriesayo theütsieko pa kengulie di se puo niepuu ki vor.

³⁹Derei thepfuyo mhapuorei si mo, Jonathan mu David unie rübei mha hau dze kesi zo.

⁴⁰Jonathan puo rünyieko khapie thepfuyo tsüshü di puo ki “Tuoshülie, hako pfü nadi nu volie” sishü.

⁴¹Sidi thepfuyo tuota mumetha David ketsie pfhepie[28] keba khieki nu sielie di puo zie pesupie kijü zerepfü zhüta. Puo va se nerhu tsushü, sidi unie huohienuo mebo di kra bata; David kra pekrakuota.

⁴²Sitse Jonathan sie David ki, “N nou mene di tuotalie, kekreilamonyü avu kenienie rei Jihova za nunu rüsewate, sidi sie, ‘Jihova bu avu donu, mu a seyie mu n seyie donu kechachie batuowe’ iwate ru” sishü. Sidi puo sielie di tuota; mu Jonathan la nadiu nu vota.[29]