Read Angami Naga Samuel Kerieu 21 Bible Online

Samuel Kerieu 21 - Angami Naga bible

Samuel Kerieu 21

¹David-e Nob nu zievo-u Ahimelek ki vor. Sitse Ahimelek pekhrukhru di David ze kesetuoü vor, sidi sie puo ki, “Kiüdi miapuorei n ze mo di n rübei ga?” si.

²Sitse David-e Ahimelek zievo-u ki, “Kediu mhatho puo pu a peleshü di a ki, ‘A n ketseshükezhü mhatho hau dze, mu a n bu kedipuo chünushü shikecü miapuorei bu si hiecie’ ite. A sikecü la mu thechü sikecü la khriesamiako ze kesetuoü chiepie ba.

³Süla tsie n dzie nu kedipuo ba ga? No niekhrüda pengou morei mhakehoupuorei haki kebau kha a tsücie” sita.

⁴Sitse zievo-u David ki, “A dzie nu tsie kemesa niekhrüda zo moro niekhrüda kekrei ba mote, khriesako thenumia geinu u thuo u kelakrei seketuomia mo mo ga?” sishü.

⁵Sitse David zievo-u ki, “Kethowe a mhatho chütuoü di parketa sie thenumia bu hie khieki vor mote; hai di rüvekecü nu zorei khriesamia mhabouko sü mesa zo; siüro thie uko mhabouko kidepuorei mesa batuo ga?” sishü.

⁶Süla zievo-u kemesa niekhrüda pie puo tsüshü; Kepekie Niekhrüda sie niekhrüda kekrei bakemo la, süusü Jihova mhodzünu nu se par, süko sou nu niekhrüda kele kha lashüwatuo üdi süu chüwa.

⁷Teisozha sünhie Saul kituomia, Jihova mhodzünu khapie keba mia puo ba; puo zae Doeg, Edommia, Saul kuopfheko donu kezhatho-u.

⁸David-e sie Ahimelek ki, “N dzie nu zhiecha morei rüngou ba mo me? A zhiecha morei a rünyie se vor mote, kekreilamonyü kediu mhatho-u rükri di chü morosuoketa la” sishü.

⁹Sitse zievo-u sie, “Filistin-u Goliat, no Ela razha nunu dukhrikewau, zhiechau ba, süu zievomia pfhenei khapie kezha sietsa pfhe puo nu dzepie zha, mhanuü n thuo süu selietuo üro, süu seliecie; süu sie kekrei hanu ba mo” sishü. David sie puo ki, “Süu kemhie kekrei tuo mo zo; süu pie a tsüshücie” sita.

¹⁰David-e sünhie Saul kinunu tata; sidi puo Gath nu kediu Akish ki vota.

¹¹Sitse Akish kituoko sie puo ki, “Hau kijüu nu kedi David moü me? Uko u dowhuo di tsali chü ketsie di, ‘Saul we nyienyie dukhri, mu David we nyie kerür dukhriwawe!’ isi ketuou mo me?” sita.

¹²Siro David-e die hako pie puo noushü se seituota, mu Gath Kediu Akish prei se bata.

¹³Süla puo uko mhodzü puo zho chü pekreiwa, sidi puoe uko mhodzünu kenyamia do chüta[30]. Puoe care kikhako rhata, mu puo mhitsie bu kru puo tiemie gei tsu.

¹⁴Sitse Akish sie puo kituou ki, “Mehoshücie, themiau nyate; kiüdi nieko puo ze a ki vor ga?

¹⁵A kenyamia se sa morosuo baü di nieko themia hau ze vor puo bu a mhodzünu kenyamia kechü chü tieya me? Themia hauha bu a kinu lertieya me?” sita.