Read Angami Naga Samuel Kerieu 22 Bible Online

Samuel Kerieu 22 - Angami Naga bible

Samuel Kerieu 22

¹David-e sünu nu tuota di vo Adulam tsiepfüu nu vota; siro puo siezedzürieko mu puo kinuko süu sikeshü ki uko sünu puo ki tsu.

²Siro themia kehoupuorei kemezhieketuoko; thepupfüketuoko, mu kehoupuorei lhou kemezhieketuoko puo ki vo kengulie, sidi puo bu uko mho kezhau chülie. Siro puo zeketuoko phrükeshü mia krie dia meseta.

³David-e sünunu Moab kijü nu Mizpa nu vor. Sitse puo Moab kediu ki, “Ukepenuopfü a la kedipuo chüshütuo shi silie kemochie, n pezie rei a puo mu a zuo bu vor di n ze bacie” sita.

⁴Sidi puoe uko khapie Moab kediu ki bawa di tuota, mu ukoe David tsiepfü nu kebachie puo ze bata.

⁵Sitse Gad siedzekesiu David ki, “Tsiepfüu nu ba sa hietacie, sielie, sidi Juda kijü nu votalie” sishü. Süla David tuota di vo Hereth tsau nu vota.

⁶Saul-e David mu puo zeketuoko ngukecü sishü. Saul-e Gibia nu kerükrie gei seibo puo khro ba, puo dzie nu rüngou theze se, mu puo kituoko pete puo khieki houpfü tha.

⁷Sitse Saul puo khie houpfüketha puo kituoko ki, “Tsie rünyüliecie, nie Benjaminko. Jese nuou lie mu khubelie pie nieko tsü, sidi nieko pete chüpie nyie mhokezha chü tsiu krie mhokezha chütieya üme?

⁸Süla nieko pete rei sie a perhiete me? Nieko miapuorei a nuoue Jese nuou ze kedova keba thashü a kie mo ze, nieko miapuorei a la puo nousuo mo morei a nuou a kituou nouchüpie puo bu sier a petsou, a pfhe baketa thie hakemhie baketa thashü a kie mo ze” sita.

⁹Sitse Edom-u Doeg, Saul kituoko mhokezhau puo die kela di sie, “Jese nuoue Nob nu, Ahitub nuou Ahimelek ki vokezhü nguwe;

¹⁰puoe puo la Jihova ki mhaketso, kecükekrie pie puo tsüshü, mu Filistin-u Goliat zhiechau pie puo tsüshü” sishü.

¹¹Sitse kediu mia ketsepie Ahitub nuou Ahimelek zievo-u, tsiu puo puo kinumiako pete, Nob nu keba zievoko kieshü; siru uko pete kediu ki vor.

¹²Sitse Saul sie, “Tsie rünyüliecie, Ahitub nuou,” si. Sitse puo lasie, “A haki bawe, a niepuu” sishü.

¹³Saul puo ki, “Kiüdi no a perhieya ga? No mu Jese nuou, niekhrüda mu zhiecha puo pie puo tsüshü mu puo la Ukepenuopfü ki mha ketso, sidi puo bu sie a perhie, a pfhe di thie hakemhie bate” sita.

¹⁴Süsie Ahimelek kediu die kela di, “N kituoko donu supuonie David kemhie diethokecü ba ga? Puoe kediu nyau chü, sidi n kepuko chü mhailieya[31], mu puoe n kinu therhupfü.

¹⁵A thie nu puo la Ukepenuopfü ki mha ketso keriethoü ba me? Si mo zo! kediu bu puo kituou, morei a puo kinuko pete gei mhapuorei pu pedata hiecie, n kituou mha hako kecü rei kezha rei si mo zokecü la” sishü.

¹⁶Sitse kediu sie, “No sia petuo zotuo, Ahimelek, no mu n puo kikru pete” sita.

¹⁷Sidi kediu puo houpfü ketha kepfheko ki, “Sielie di Jihova zievoko pete dukhriwacie, uko dzie rei David gei bakecü la; ukoe puo taketa si zo, derei süu se a ki pu mo zo” sita. Derei kediu kituokoe uko dzie chapie Jihova zievoko geishü mota.

¹⁸Sitse kediu sie Doeg ki, “No Doeg sie di zievoko perhiecie” sishü. Sitse Edom-u Doeg-e sie zievoko bie; sidi teisozha sünhie puoe zievoko linen boulie kerütshu seketha mia hiethethaepengou dukhriwa.

¹⁹Sidi puoe zhiecha pie zievoko nadiu Nob biewa; thenu rei thepfu rei nhicumia mu nuoranuomia rei, mithu, mu tekuo, mu gada puoe zhiecha pie biewa.

²⁰Derei Ahitub nuou Ahimelek nuonuoko donu mia puo, Abiathar ta pralie di ta David ki vota.

²¹Sidi Abiathar David ki Saul Jihova zievoko dukhriwaketa pushü.

²²Sitse David sie Abiathar ki, “A teisozha sünhie nu Edom-u Doeg sünu keba ngukeshü ki, puoe Saul ki pushü tou zoketuo sita zo. N puonuoko kiu pete kerheiro sü a laü molie kenjüwe.

²³A ze batalie, mu michie hiecie; kekreilamonyü a kerheiro pfhü ketuou sü n kerheiro rei pfhütuo zo; sirei no a ze di khrukhrekecü nu balietuo” sishü.