Read Angami Naga Samuel Kerieu 23 Bible Online

Samuel Kerieu 23 - Angami Naga bible

Samuel Kerieu 23

¹Siro ukoe David ki, “Filistinkoe Keila ze kegei thate, mu shieko nu mha rügu bate” sishü.

²Süla David-e Jihova ketso di sie, “A bu vo di Filistinko whuotuo mo mo ga?” idi ketsoshü. Sitse Jihova sie David ki, “Vo di Filistinko ze kebiecie sidi Keila kelashücie” sishü.

³Derei David themiako sie puo ki, “Mehoshücie, we Juda nu thuo rei michie ba; siüro we Keila nu vo di Filistinmia rüpfhünuo perhiekecü we kithede puo michie ta?” sita.

⁴Sitse David-e Jihova ki mha ketso lashü ru Jihova puo die kela di, “Uwe, sielie di Keila nu kecie; kekreilamonyü a Filistinko pie n dzienu shüwatuo” sishü.

⁵Süla David mu puo themiako Keila nu ke, sidi Filistinko ze kebie, uko kicükiri whuo ze vorta, sidi uko penyü pesuo sewa. Hamhie di David-e Keila nu kelhouko kelashü.

⁶Siro Ahimelek nuou Abiathar ta Keila nu David ki kevo ki, puoe puo dzie nu zievo boulie se tsur.

⁷Sitse mia David-e Keila nu voketa dze Saul ki pushü. Siru Saul sie, “Ukepenuopfü puo khapie[32] a dzie nu shüwate; kekreilamonyü puoe kharu mu cakha keba rüna nu le di puo thuo puo khapfü bate” sita.

⁸Saul-e terhüchütuoü di themia pete kiepie Keila nu ke, David mu puo themiako retuoü di.

⁹Siro David-e Saul puo petsou di mha kesuo rhükeba silie tse, puo zievo Abiathar ki, “Zievo pfheneiu se haki vorliecie” sishü.

¹⁰David sie, “He-i Jihova, Israel Kepenuopfü, Saul a la nadiu pekawatuoü di Keila nu vorkezhü n kituou si toute.

¹¹Mu süla n kituou sikelie mhie Saul ker zotuo me? He-i Jihova, Israel Kepenuopfü, a n ki chaya, n kituou ki pushücie” sishü. Sitse Jihova sie, “Puo ker zotuo” si.

¹²Sitse David sie, “Keila nu themiako a mu a themiako khapie Saul dzie nu shüwatuo me?” sidi ketso. Sitse Jihova sie, “Uko n teshütuo” sita.

¹³Süla David mu puo themiako, uko mia krie sorou mese, sielie di Keila nunu tuota, sidi ukoe volie kevira vota. Süki mia Saul ki David Keila nunu taketa pushü tse, puo uko whuo vo mota.

¹⁴Siro David-e rayha nu dahou kemeteiko nu babata, sidi Zif rayha nu kijüthou rüna gei tuota. Saul-e teisonhie puo pfhü zo, derei Jihovae puo khapie puo dzie nu shüwa mo zo.

¹⁵David-e Horesh nu Zif rayha nu keba ki Saul puo kerheiro pfhü tuoketa silie.

¹⁶Siro Saul nuou Jonathan-e silie di Horesh nu David ki vor; sünunu puoe Jihova geinu puo chü kemeteishü.

¹⁷Puoe sie puo ki, “Michieta hiecie; kekreilamonyü a puo Saul dzie-e n pfhülie kenjü; noe Israel mho kedi chütuo, mu a n sieso-u chütuo; a puo Saul zorei hau si ba zo” sishü.

¹⁸Sidi unie kenienie rei Jihova mhodzünu keze dietseidiekhochü; siro David-e Horesh nu ba zota, mu Jonathan kinu la vota.

¹⁹Sitse Zifmiako Gibia nu Saul ki khor di sie, “David Jeshimon pekhro tsatie, Hakila kijükhru gei Horesh dahou kemetei nu hieko donu rüshü ba.

²⁰Süla tsie, he-i kediu, n thuo kehoukipuorei ker kenyü ki kerliecie; mu hieko meseu sü puo tepie kediu dzie nu keshüu zo” sita.

²¹Sitse Saul sie, “Jihova bu japie nie ketsüu chüliecie, nie a ngumezhiekeshü la!

²²Vo di va puo meho tou lashülie; puo kirapuo ba tou shi pfhülie, mu supuonie sünu puo ngu shi si sebalie; kekreilamonyü mia a ki pucü puoe puo do vi se üsiya.

²³Lutsahatsa mehoshülie sidi puo kirapuonu rüshü baya shi thechüko pete si se balie, sidi thedze ketho tou-u se vor a ki pushücie. Sitse a nieko ze votuo, sidi mhanuü puoe kijüu nu ba liro a Juda nyienyiekecü pete donu puo pfhütuo” sita.

²⁴Süla ukoe sielie di Saul mhodzü rie Zif nu vota. Mu David mu puo themiakoe Jeshimon pekhrotsa kijü razha Maon nu ba.

²⁵Saul mu puo themiakoe puo pfhü tuo. Siro mia David ki pukeshü ki, puo tsiekrieu gei keta sidi Maon rayha nu bata. Siro Saul süu sikeshü ki, puo David whuo zo Maon rayha ketso ker.

²⁶Saul-e kijüthou lutsa vota, mu David mu puo themiako kijüthou kekreitsa vota. David Saul therhielietuoü rükri tata, Saul mu puo themiakoe David mu puo themiako telietuoü penuo vorketa la.

²⁷Sitse dieliemia puo Saul ki vor di sie, “Rükri vorlie; kekreilamonyü Filistinko kijü nu vor re bate,” sita

²⁸Süla Saul-e David whuo sa mota, sidi Filistinko perhie vota; süla thechü süu za pie Takelie Tsiekrieu üya.

²⁹Süsie David-e sünunu tuota sidi vo En-gedi tsiekrie kemeteiu nu bata.